غزل
عمران سلیم
پھُلاں دا جو رشتہ اے مہکار دے نال
اوہو رشتہ چہرے دا کردار دے نال
بے چینی بس دور اے میتھوں ایسے لئی
میں نہیں رکھدا سانجھ کسے مکار دے نال
یاری وچ کجھ گرمی سردی پھبدی اے
پیار دلاں وچ ودھدا اے تکرار دے نال
منزل کولوں دوری اوہدی قسمت اے
چلدا نہیں جو ویلے دی رفتار دے نال
اوہناں پاروں بس بدنامی ہوئی اے
کیتیاں سن جو گلاں میں دیوار دے نال
سچ دے پاروں مسند تے نہیں مل سکدی
رشتہ اے سچائی دا بس دار دے نال
سوچ سمجھ کے بنھیں توں دستار سلیم
ایتھے سر وی لہہ جاندا دستار دے نال
