وارث شاہ
بابا نجمی
لکھاں شاعر جمے وارث کوئی نہیں تیرا جوڑ
تیرے بعد کسے نہیں کیتی پوری تیری تھوڑ
تیری صفت کیہ لکھاں وارث قلم ایانی نال
تیریاں گلاں پڑھ پڑھ میرا وھدا جائے اقبال
دیس پنجاب دے سخنوراں دا تیرے سر تے تاج
چوچک نالوں ودھ کے دتا ہیر نوں توں اے داج
جہڑا دن وی چڑھدا جگ تے پھیلے تیرا ناں
شام سویرے دوے دعاواں تینوں بولی ماں
آتش جرأِت میر تے غالب اردو دے استاد
ہن ماں دھرتی جمدی کیوں نہیں وارث جہی اولاد
توڑ مروڑ کے تیریاں گلاں جگ وچ کرناں عام
وارث دی تھاں نجمی لا کے پیا کماواں نام
