جمہوریت راس نہیں آرہی

عتیق انور راجہ

چلو من لینے آں کہ امریکہ نے تحریک انصاف حکومت ختم کرن لئی مداخلت یا سازش کیتی ہووے گی لیکن کیہ امریکہ نے حکمران جماعت نوں وی ایس مداخلت وچ اپنا آلہ کار بنا لیا سی؟۔ خان صاحب فرماندے نیں کہ اوہناں نوں تن چار مہینے پہلے پتہ چل گیا سی کہ اوہناں دے خلاف سازش تیار ہو رہی اے تے ایس طرحاں بہتر حکمت عملی نال اوہناں نوں اپنے ناراض ارکان اسمبلی نوں اپنا ہمنوا بنان دی کوشش کرنی چاہیدا سی لیکن اوہ انج نہیں کر سکے۔ جمہوریت وچ ایہہ نہیں ویکھیا جاندا کہ ووٹ کاسٹ کرن والا ہیرا اے موتی اے‘ لوٹا اے یا کھوٹا‘ ایس نظام وچ جہدے کول اسمبلی رکنیت ہوندی اے اوہ دوران اجلاس اپنا ووٹ کاسٹ کر کے حکومت بنوان یا سٹن وچ اپنا کردار ادا کردا اے تے ایس طرح جدوں عمران خان صاحب دے خلاف تحریک عدم اعتماد قومی اسمبلی وچ پیش ہوگئی تے اوہناں دا کم سی کہ باوقار انداز وچ اوہدا سامنا کردے۔ اپوزیشن نوں حکومت بنان دیندے تے فیر جدوں اپوزیشن حکومت بنان مگروں مہنگائی کرن دی کوشش کردی‘ خان صاحب اسمبلی فلور اتے رج کے تنقید کردے۔ مگر افسوس انج نہیں ہو سکیا تے خان صاحب نے جتھوں تک ممکن سی تحریک عدم اعتماد دی کارروائی نوں تاخیر دا شکار کیتے رکھیا۔ ادھی رات نوں عدالتاں کھلیاں‘ قیدیاں دی وین سڑک اتے آ کے کھڑی ہو گئی تے پی ٹی آئی دے سپیکر صاحب نے اپنے قائد نال وفاداری نبھاندے ہوئے استعفیٰ دیندے ہوئے کرسی چھڈ دتی۔ صدر پاکستان ڈاکٹر عارف علوی صاحب نے شہباز شریف کولوں وزیراعظم دا حلف لین دے بجائے اپنی طبیعت خراب کر لئی۔ اینے وڈے منصب اتے بیٹھے ملک دے آئینی سربراہ کولوں ایسے کم دی توقع نہیں کیتی جا سکدی سی لیکن ایس ملک وچ سب کجھ ہوندا رہیا اے تے حقیقت تاں ایہہ ہے میرے ملک وچ جمہوریت شخصیات دے گرد ای گُھمدی رہندی اے۔ پیپلز پارٹی بھٹو، نون لیگ شریفاں تے تحریک انصاف دی تے گل ای وکھری اے۔ انج لگدا اے عمران خان نے تحریک ا نصاف نوں اک منفرد قسم دی جماعت بناد تا اے جہدے وچ تحریک ا نصاف دے ورکرز نوں باور کروا دتا گیا اے کہ اوہناں دا رہنما جو وی آکھے ‘ جدوں وی آکھے اوہنوں فوری سچ تسلیم کر لینا اے۔ جہڑا ایس جماعت وچ شامل ہو جاوے اوہدی سیاست‘ اثاثیاں‘ دیانت‘ لیاقت تے کردار اتے کسے نوں سوال نہیں چکن دتا جاوے گا۔ لیکن جہڑے خان صاحب توں اپنے رستے وکھرے کرن گے اوہ غدار‘ کرپٹ‘ چور تے مفاد پرست کہلان گے۔ اوہناں دا سوشل میڈیا اتے ٹرائل ہووے گا۔ ایہہ سب ویکھدے ہوئے خوف محسوس ہوندا اے کہ ایہہ متشدد تے جنونی سوچ عوام نوں اک دوجے دی گردناں اُڈان تے مجبور نہ کر دیوے۔ ہن خان صاحب حکومت توں وکھ ہون مگروں سڑکاں اتے نکل آئے نیں تے اوہ ویلے توں پہلاں انتخابات دی گل کر رہے نیں۔ ایسے وچ اک عام شہری دا ایہہ سوال بندا اے کہ جے پی ٹی آئی قیادت الیکشن لئی واقعی تیاراے تے نویں الیکشن چاہندی اے تے قومی اسمبلی دے نال نال پنجاب‘ سندھ‘ کے پی کے تے بلوچستان اسمبلیاں توں اکٹھے استعفے کیوں نہیں دے دیندی۔
صاحبو‘ مجھے کیوں نکالا توں میں نہ مانوں ہار تک دا سفر اک عجیب ای نظارہ پیش کر رہیا اے۔ میرا خیال اے کہ ایہ سب صاحبان اقتدار دا پارلیمنٹ تے پارلیمنٹیرینز نوں عزت دین دے بجائے دوجیاں ول ویکھن دی سزا اے۔ کاش عمران خان نوں وی پنج سال پورے کرن دتے جاندے لیکن ایسا تے میرے ملک وچ ورھیاں توں ہوندا چلیا آ رہیا اے۔ ساڈے سیاست دان اقتدار حاصل کرن لئی کدی ایمپائر ول ویکھدے نیں کدی عالمی مالیاتی اداریاں دے اگے ملکی معیشت گروی رکھ دیندے نیں تے کدی اپنے اقتدار نوں دوام بخشن لئی عالمی ڈنڈے دی ایسی شرطاں من لیندے نیں جہناں دا خمیازہ ملک وچ تباہی تے بربادی دی صورت وچ سامنے آندا اے۔ اج ایہہ دسن دی لوڑ نہیں کہ ساڈے سیاست دان کہدے کہن تے بھٹو دے خلاف سڑکاں اتے نکلے سن تے فیر مرد مومن مرد حق ضیاء الحق دی پالیسیاں پاروں ملک وچ نشہ تے اسلحہ کیویں آیا۔ بھٹو دے اثر نوں گھٹ کرن لئی ایم کیو ایم دے ننھے پودے نوں کیویں پانی دتا گیا۔ بے نظیر دی حکومت کہنے کہدی حمایت نال سٹی۔ نواز شریف دا تختہ کیوں الٹ دتا گیا فیر بے نظیر تے نواز شریف دی حکومتاں ختم ہون وچ ساڈے سیاستدان کیویں مہرے بندے رہے۔ ایٹمی دھماکیاں مگروں جدوں مشرف نے نواز شریف نوں پابند سلاسل کیتا۔ فیر پیپلز پارٹی دی حکومت ختم کروان لئی میاں نواز شریف کیویں عدالت پہنچے تے لمی جلاوطنی مگروں میاں نواز شریف اقتدار وچ آئے تے پس پردہ طاقتاں نے کیویں اوہناں نوں گھیر لیا۔ بس بہت ہو گیا ہن ایہہ سلسلہ رکنا ضروری اے لیکن ایہدے لئی سیاسی قائدین نوں اپنی پارٹیاں دے اندر جمہوریت لیانا ہووے گی۔