دل نوں قرار نہیں

دُوجیاں نال رویے بہتر کرو، لوکاں واسطے آسانیاں پیدا کرو ربّ تہاڈے لئی آسانیاں کر دیوے گا

عتیق انورراجہ

لوکی روزے رکھ رہے نیں۔ راتاں نوں اٹھ اٹھ کے سجدے تے قرآن دی تلاوت کرن والیاں دی وی کمی نہیں لیکن اوہدے باوجود اج کل اکثر لوکاں دی زبان اتے اک جملہ ہوندا اے کہ دل نوں قرار نہیں ۔ اوہدی بہت ساری وجوہات بیان کیتی جا سکدیاں نیں۔ جیویں کہ اج ساڈی زندگیاں وچوں سچ ختم ہوندا جا رہیا اے تے جھوٹ دا بول بولا اے۔ جے اسیں اپنی زندگیاں وچ بہتری لیانا چاہندے آں۔ دل دے سکون دا سب توں آسان نسخہ گھٹ کھانا‘ گھٹ بولنا تے گھٹ سونا بیان کیتا جاندا اے۔ بزرگ آکھدے نیں کہ بوہتا کھان نال تے فضول گل بات نال انسان دا دل سخت تے مردہ ہو جاندا اے تے انسان ہر ویلے بے چینی تے بے آرامی محسوس کردا اے۔ انج ای دُوجے لوکاں نوں ویکھ کے جلن تے حسد نال جے اسیں بچ جائیے تے وی ساڈے لئی بہت آسانیاں نیں۔ موجودہ دور وچ انساناں دی اکثریت ہر ویلے ایہہ ای سوچدی رہندی اے کہ دُوجے لوکاں نے کہنی معاشی ترقی کر لیتی اے‘ کنا مال و دولت جمع کر لیتا اے تے اوہناں دی زندگیاں وچ کہنی آسائشاں نیں‘ ایہہ سب ویکھن مگروں انسان ہر جائز تے ناجائز ذریعے توں خود نوں وی ایسے مقام تک لے جان لئی تے چھیتی ترقی لئی ہر راستہ اپنان دی کوشش کردے نیں۔ ایس نس بھج وچ جہڑا تھوڑا سکون اوہناں دی زندگی وچ پہلے توں موجود ہوندا اے دوجیاں دی ویکھا ویکھی اپنا اوہ سکون وی ختم کر لیندے نیں۔ یعنی اج انسان دی پریشانی دا معیار وی بدلیا بدلیا جیا لگدا اے۔ اج دے انسان نوں بہت ساری سہولتاں صرف ایس لئی گھٹ لگدیاں نیں کہ ہائے دوجے لوک کہنی ترقی کر گئے نیں۔ انسانی تریخ وچ ایسا کدی وی نہیں ہویا کہ دنیا وچ وَسن والے سارے لوک امیر ہو جان یا سارے غریب رہ جان۔ ایس دنیا وچ طرح طرح دے مسئلے نیں جہناں نے انساناں نوں اپنے شکنجے وچ کسیا ہویا اے۔ کدھرے اچانک اَگ لگ جاندی اے تے لوکاں دا سب کجھ سڑ جاندا اے۔ کدھرے کسے اتے کوئی طاقتور دشمن حملہ آور ہو جاندا اے تے اوہنوں اپنی جان بچانی اوکھی ہو جاندی اے۔ کدھرے سڑک اتے چلدے چلدے اچانک کوئی ایسا حادثہ ہو جاندا اے کہ شادوشاداب خاندان اچانک اُجڑ جاندے نیں۔ کوئی ویاہ کر کے خانماں برباد اے تے کوئی چنگا رشتہ نہ ملن دی وجہ نال پریشان حال اے۔ کسے نوں اللہ پاک نے اولاد دی نعمت توں ای نہیں نوازیا تے کوئی نافرمان تے نالائق اولاد دی وجہ نال پریشان اے۔ الغرض اج کل ہر پاسے ناشکری دا راج اے جہدی وجہ نال لوکاں نوں اپنی زندگی عذاب جئی لگدی اے لیکن جے اسیں جائز انداز وچ ترقی کرن دی کوشش کرئیے تے لازمی طور تے اسیں خود وی حلال کھاواں گے تے اپنے بالاں نوں وی حلال کھوان دی کوشش کراں گے۔ حلال رزق گھر آوے گا تے شکر دے کلمات زبان اتے جاری ہون لگن گے۔ حضرت بابا فریدالدین گنج شکرؒ فرماندے نیں کہ حلال روزی کمان والے دے دل نوں اللہ عزوجل اپنے نور نال بھر دیندا اے۔ دوجے لوکاں دے بہتر لائف سٹائل نوں ویکھ کے پریشان ہونا چھڈاں گے تے ساڈے دلاں توں فضول خواہشاں ختم ہون لگن گئیاں۔ اج دے جدید دور وچ نویں نویں ایجاداں ہو رہیاں نیں جہڑیاں انسان نوں بہت ساری سہولتاں پہنچا رہیاں نیں۔ ایہناں سہولتاں دے میسر آن نال بظاہر انسان نوں زندگی دے امور وچ بہت ساری آسانیاں ملنی شروع ہو گئیاں نیں۔ انسان اپنے لائف سٹائل نوں بہت انجوائے وی کر رہیا اے مگر اوہناں ساری سہولتاں نے انسان دے اندر نفسا نفسی تے بے سکونی وی پیدا کردتی اے یا انج آکھنا چاہیدا اے کہ ایہناں سہولتاں نوں انجوائے کردے ہوئے انسان دا دل و دماغ پہلے توں وی ودھ پریشان ہو گیا اے۔ ہر کوئی اگے ودھن لئی دوڑ رہیا اے جہڑا ویلا اللہ تعالیٰ نے آرام کرن لئی بنایا اے اوہدے وچ وی کم وَل ای دھیان لگیا رہندا اے یا انج آکھنا چاہیدا اے کہ ا ج دا انسان بہتر زندگی گزارن لئی بس ہر ویلے اپنے آپ نوں مصروف رکھے ہوئے وے۔ سکون قلب کیویں ملدا اے ایس لئی قرآن پاک وچ اللہ پاک نے فرمایا اے کہ اوہ لوک جہڑے ایمان لیائے اللہ دے ذکر نال اوہناں دے دلاں نوں سکون تے اطمینان ملدا اے۔ اللہ پاک ارشاد فرماندا اے کہ جہڑا شخص نیک کم کرے گا خواہ اوہ زنانی ہووے یا مرد بشرطیکہ صاحب ایمان ہووے تے اسیں اوہنوں پرلطف زندگی دیاں گے تے اوہناں دے چنگے کماں دے عوض اوہناں دا اجر وی دیاں گے۔ رمضان کریم دا آخری عشرہ بڑی تیزی نال گزر رہیا اے کون جانے اگلے رمضان تک کہنوں زندگی مہلت دیندی اے۔ ایس لئی سانوں اج ای توں اپنا طرزعمل بہتر کرن دی کوشش کرنی چاہیدی اک چنگا انسان بنن دی کوشش کرنا ہووے گی۔ا پنے طرزعمل نال اپنے آسے پاسے رہن والے لوکاں نوں خوش کرن دی ہر ممکن کوشش کرنا ہووے گی تے سب توں اہم نقطہ جے اسیں کسے نوں خوشی نہیں دے سکدے تے سانوں کسے دی دل آزاری دا کارن وی نہیں بننا چاہیدا۔ ایہہ وی سمجھنا ہووے گا کہ ساڈے بہتر سلوک دا بوہتا حقدار ساڈے والدین تے قریبی رشتے دار نیں تے فیر جہڑے لوک ساڈے آس پاس رہندے نیں جے اسیں اوہناں نال وی چنگا سلوک کراں گے تے ساڈے دلاں نوں رب سکون دی دولت نال مالا مال کر دیوے گا۔