انقلاب تے تبدیلی وچ فرق‘ہن کیہ ہووے گا؟

مطلوب وڑائچ

سابق وزیراعظم عمران خان دی سیاست تے اوہناں دے پونے چار سالہ حکومتی اقدامات تے گل ہو سکدی اے۔ اوہناں نال اختلاف کیتا جا سکدا اے پر اپنی حکومت دے خاتمے مگروں اوہ جس طرح اجتماعات کر رہے نیں تے جس طرح لوک رسپانس دے رہے نیں اوہدے توں لگدا اے کہ جس قوم نوں ہجوم کہیا جا رہیا سی اوہ ہن ہجوم قوم بن رہیا اے۔ عمران خان نے 10اپریل لئی لوکاں نوں اپنے اپنے شہراں وچ نکلن دی کال دتی سی۔ لوک وڈی گنتی وچ نکلے تے فیر باقاعدہ جلسیاں دا شیڈول جاری کیتا گیا۔ پہلا جلسہ پشاور وچ دوجا کراچی وچ ہو چکیا اے تریجا لہور وچ وی ہو چکیا اے۔
عمران خان نوں غیر روایتی سیاستدان کہیا جاندا اے تے اوہ سیاست وچ کئی کجھ غیرروایتی کر رہے نیں۔ جلسیاں وچ اوہناں نے رنگ بھرن لئی سازونغمات نوں متعارف کرایا تے ہن کراچی دے جلسے دے نال لوکاں نوں اپنے اپنے شہراں وچ نکلن لئی کہیا تے لوک واقعی وڈی گنتی وچ نکلے وی۔ میڈیا رپورٹاں موجب اینے لوک اینی وڈی گنتی وچ کدی نہیں نکلے۔ کراچی دا اجتماع وی مقامی تے عالمی میڈیا دے مطابق تریخی سی۔ عمران خان دی حکومت ختم کیتی گئی۔ عمران خان نے پشاور دے بعد کراچی وچ وی عدلیہ تے گل کیتی تے رات نوں عدالت کھولن تے دکھ دا اظہار کیتا تے ایہ گلاں اوہناں نے بڑی عزت و احترام دے نال کیتیاں۔ عمران خان دی حکومت گران وچ پاک فوج ول وی کجھ لوگ انگلیاں اٹھاندے نیں۔ سوشل میڈیا تے پاک فوج دے خلاف اک مہم جاری اے۔ جہدا فارمیشن کمانڈرز کانفرنس وچ وی سخت نوٹس لیا گیا۔ ماضی بعید نہیں ماضی قریب وچ اج دی سب توں وڈی حکومتی پارٹی ولوں پاک فوج دے خلاف کس طرح جرنیلاں دے ناں لے کے کردارکشی کیتی جاندی رہی تے عدلیہ دے بارے کیہ کجھ نہ کیتا گیا جہدے تے نہال ہاشمی‘ طلال چوہدری تے دانیال عزیز نوں نااہلیت دا سامنا کرنا پیا سی۔ایس پارٹی دی اعلیٰ ترین قیادت دے رسوا کن بیان وی ریکارڈ دا حصہ نیں۔ اج تحریک انصاف نوں وی اداریاں توں تحفظات نیں پر ایس پارٹی ولوں اوہناں دے خلاف اک لفظ نہیں بولیا گیا۔ عمران خان نے کراچی دے جلسے وچ شمالی وزیرستان وچ شہید ہون والے پاک فوج دے ست جواناں دا ذکر کیتا۔ اوہناں ایہ وی کہیا کہ نو ہزار فوجی تے نوے ہزار سویلین امریکہ دی جنگ وچ موئے اوہ ہور اجہی کسے جنگ دا حصہ نہیں بننا چاہندے۔ عمران خان سمجھدے نیں کہ اوہناں نوں ایس انکار دی وجہ نال اقتدار توں سازش راہیں وکھ کیتا گیا اے۔
اودھر عمران خان پاک فوج لئی اجہے ہمدردانہ جذبات رکھدے نیں۔ اودھر قومی اسمبلی دے اجلاس وچ علی وزیر تے محسن داوڑ پاک فوج د ے خلاف زہر اگلدے رہے۔ محسن داوڑ نے بھیانک الزام لایا کہ پاک فوج دے جہازاں نے افغانستان وچ سرحد تے وزیرستان تو ںنقل مکانی کر کے جان والے پاکستانیاں تے بمباری کرکے چالھی بندیاں نوں مار دتا۔ اودھر علی وزیر جو واڑ گران تے تے اوہدی تاراں نال جرنیلاں نوں پھاہے لان دی گل کردا سی تے اوہ وی پاک فوج تے زہر دے تیر برساندا رہیا۔ ایس اجلاس وچ ست شہیداں دا ذکر ہویا نہ ای علی وزیر تے محسن داوڑ دے ہاڑے تے کوئی جواب دتا گیا۔ مرکز وچ 16 جماعتی اتحاد دی حکومت دے قیام مگروں دو دیہاڑ پہلاں پنجاب وچ وی اتحادی حکومت قائم ہو گئی۔ حمزہ شہباز نوں وزیراعلیٰ بنایا گیا اے۔ اوہناں نوں 197 ووٹ ملے جہناں وچ 22 تحریک انصاف دے منحرف ارکان وی شامل نیں۔ اوہناں نے فلور کراسنگ کر لئی۔ اوہناں توں ووٹ کس اعتماد دے نال کاسٹ کرائے گئے اوہناں نوں کیہ سمجھایا تے دسیا گیا؟ ایس اجلاس وچ جو دھینگا مشتی ہوئی۔ ڈپٹی سپیکر نوں تشدد دا نشانہ بنایا گیا۔ دوست مزاری وی منحرف ارکان وچ شامل ہو گئے سن۔ سپیکر اسمبلی پرویزالٰہی جو وزارت اعلیٰ دے امیدوار سن اوہناں تے وی تشدد ہویا اوہناں دی بانہہ بھن دتی گئی۔ پولیس نوں ایوان دے اندر آنا پیا۔ اسیں کس قسم دی جمہوری مثالاں پیش کر رہے آں۔ مرکز وچ حکومت بدلی گئی پنجاب وچ وی انج ای ہویا۔
ایس تبدیلی دا بنیادی مرکز مسلم لیگ ن ای قرار پائی اے۔ تحریک عدم اعتماد لیاندی گئی تے پرویزالٰہی دی کدی زرداری صاحب نال کدی شہبازشریف تے کدی مولانا فضل الرحمن نال ملاقاتاں ہو رہیاں سن۔ عمران خان دے خلاف اوہناں دا اک تضحیک آمیز انٹرویو وی نشر ہویا۔ اوہناں دی دیکھا دیکھی دوجے اتحادی وی کھسکن لگ پئے تے فیر پرویزالٰہی تے وزیراعلیٰ بنن لئی پی ٹی آئی دے نال مل گئے پر اوس ویلے تک بہت سارا پانی پلاں دے تھلیوں گزر چکیا سی۔ ایہ پاکستان دی سیاست اے جہدے وچ کسے وی ویلے کجھ وی ہو سکدا اے۔ عمران خان دا بڑا مطالبہ فوری انتخابات دا اے جو پورا وی ہو سکدا اے عمران خان نے اپنے رویے نال سکرپٹ روک دتا اے۔٭٭