نعت شریف

عبدالحمید نظامی

ذرے بن گئے سب ستارے اوہدے پاک نعلیناں دے
جگ وچ کھلر گئے کھلارے اوہدے پاک نعلیناں دے
جھولی اڈ کے منگن دے لئی آکے قوسِ قزح نے
سارے لے لے رنگ ادھارے اوہدے پاک نعلیناں دے
عشق دے رنگ وچ رنگے گئے نیں جہڑے وی عاشق صادق
ایہہ تے سب کمال نے سارے اوہدے پاک نعلیناں دے
چن وی رشک کریندا ہن تے ریہہ کے فلکاں دے اُتے
میں وی ہندے روپ جے دھارے اوہدے پاک نعلیناں دے
پلکاں نال بہاریاں دے کے چماں پاک نعلیناں نوں
ہوون تذکرے میرے بارے اوہدے پاک نعلیناں دے
حاتم سخی زمانیاں دے سب کئی سکندر تے دارے
منگتے ویکھے کئی وچارے اوہدے پاک نعلیناں دے
پا دتا اے سدھے راہ تے یار نظامیؔ نوں جنہاں
اسیں کے صدقے وارے وارے اوہدے پاک نعلیناں دے