چہرے توں نقاب سِرکن والا اے

اکرم شیخ

اوہنے اک واری نہیں کئی واری ایہ دعویٰ کیتا اے کہ مغرب نوں میرے توں بہتا کوئی نہیں جان دا۔ ظاہر اے اوہدی ساری جوانی مغرب وچ گزری اے جتھے اوہ اک پلے بوائے سی۔ ایسے پچھوکڑ اوہدے بے گنت سکینڈل وی موجود نیں جہناں چوں اک سیتا وائٹ دا وی اے جہنے اک دھی ٹیریان نوں وی جنم دتا سی جہدا ڈی این اے ٹیسٹ امریکی عدالت نے وی تسلیم کیتا۔ ایہ کڑی اج کل جمائما گولڈ سمتھ کول اپنے بھراواں نال برطانیہ وچ رہندی اے۔ جمائما پہلی باقاعدہ بیوی سی اوہ پاکستان وچ لہور دے زمان پارک وچ وی رہی۔ پر فیر اوہ اپنا وسدا سسرالی چھڈ کے پیکے چلی گئی۔ اوہنے برطانوی قنون دے تحت طلاق دے دتی۔ ایس طلاق پاروں اوہنوں اپنے خاوند نوں اپنی خاندانی دولت چوں کناں حصہ دینا پیا ایہدے بارے اوہنوںپتہ اے یاں فیر اوہدے سابق پاکستانی خاوند نوں۔ ہن ایس دولت دے اوہدے پتر وارث نیں جمائما دا تعلق اک یہودی خاندان نال سی جہڑا برطانیہ دا دسواں وڈا امیر خاندان سی۔ جمائما اج کل جمائما خان نہیں جمائما گولڈ سمتھ اے۔
دوجی شادی ریحام خان نال ہوئی جہڑی اک پاکستانی نژاد پشتون سی جہڑی اک ٹیلی ویژن وچ موسم دا حال سنایا کردی سی ایہ وکھری گل اے کہ اوہ خان دے اندر دے موسم بارے کوئی جانکاری حاصل کر سکی تے نہ ای اوہنوں پتہ لگ سکیا پنجاب دے گرم موسماں جیٹھ ہاڑھ دیاں دھپاں دا انسانی مزاج اتے کیہ اثر ہوندا اے پر اوہ دھرنیاں وچ آئی بنی گالا دیاں تک پہنچ اختیار کیتی چھیتی ای اوہنوں پتہ لگ گیا کہ ساون بھادروں دیاں برساتاں وچ خان دی ضرورت تے مجبوری کیہ ہوندی اے اوہدے نال گزارا کرنا کناں مشکل ہوندا اے اک زنانی دے جذبیاں نال کیہ ہونی ہوندی اے فیر اوہنے وکھ ہونا ای بہتر سمجھیا اوہ سارے بھید جان چکی سی۔ جاندے جاندے اوہ ’’بلیک بیری‘‘ وی اپنے نال لے گئی جہدے وچ پیغامات تے خواہشات دا خزانہ سی اوس خزانے وچ پی ٹی آئی دیاں زنانیاں ولوں خواہشاں دے نمونے وی سن جہناں وچوں کجھ دا اوہنے اپنی کتاب وچ ذکر وی کیتا اے۔ کجھ ہور وی نیں جہڑے کتاب وچ شامل ہون توں رہ گئے یاں فیر اوہناں نوں ڈک دتا گیا۔
فیر وی اوہدے وکھ ہون بارے کوئی پکے اشارے ایس کتاب وچ موجود وی نیں تے نہیں وی‘ جہڑے کھوجی تے پوکھی جوڑ ہیلا کر کے بہت چھیتی سامنے لے آئون گے۔ ایس کتاب بارے آکھیا جاندا اے کہ ایہ ریحام توں دشمناں نے پیسے دے کے لکھوائی اے فیر وی ایہ سوال اپنی تھاں اے کہ ریحام خان جنہے اپنے پہلے خاوند نوں چھڈ کے پسند دی ایہ شادی کیتی صرف سال مگروں کیوں وکھ ہو گئی۔ حالاں خان نے بہت پہلے آکھیا سی کہ اوہ اک مشرقی زنانی نال ویاہ کرے گا پر اوہنے اک مغربی تہذیب وچ پلی بڑھی جمائما نال ویاہ کیتا اوہ مسلمان وی ہو گئی تے اوہنے مشرقی بیوی بنن لئی اپنا سب کجھ‘ سارا ماضی وی تیاگ دتا پر پتہ نہیں اوہ فیر وی گزارا نہیں کر سکی۔ فیر ریحام خان بھاویں برطانیہ وچ ای پلی بڑھی سی اوہ تاں اندروں مشرقی وی سی تے مسلمان وی سگوں پشتون روایت دی پابند وی۔ فیر وی اوہ گزارا نہیں کر سکی یاں فیر اوہ خان دی خودپرستی‘ انا پرستی نال نبھا نہ کر سکی۔ تشدد پسند جنسی تے اخلاقی مزاج نوں برداشت نہیں کر سکی چیتے رہوے کہ جنسی تشدد دیاں ہور وی بہت ساریاں روایتاں تے گواہیاں عام نیں جس دی نشاندہی ریحام خان دی کتاب وچ وی موجود اے۔
خیر گل ذرا لمی ہو رہی اے۔ تیجا ویاہ اک ہور زنانی نال ہویا جہدے چار پنج بچے وی سن تے اوہ اپنے خاوند نال زندگی گزار رہی سی۔ آکھیا جاندا اے کہ ایہ اوہ زمانہ سی جدوں خان وچ روحانیت دے امکان پیدا ہو چکے سن جہنوں ’’پیرنی‘‘ نے اندروں کڈھ کے باہر لے آندا۔ ایسے کارن ای اک ناستک تے کافر… بابا فرید جی دے سامنے متھا ٹیکن تے مجبور ہو گیا اوتھوں اوہنوں ریاست‘ حکومت تے حاکمیت دا فیض حاصل ہویا۔ تواریخی گل تاں ایہ وی اے کہ بابا جی نوں غیاث الدین بلبن نے بہت کجھ دان کرن دی کوشش کیتی سی پر اوہناں کجھ نہ لیا تے آکھیا سی فقیراں نوں دنیا دی بادشاہی‘ بادشاہواں دی نیڑتا دی ضرورت نہیں ہوندی۔ ایہ وکھری گل اے کہ بہت سارے لوکاں نوں ایتھوں بادشاہیاں ملیاں بہرحال… بابا جی دی مانی تے روحانیت دی علمبردار تے پرچارک ایس خاتون دے من وچ خورے کہڑی حرص تے ہوس نے گھیرا پایا کہ اوہ اپنا وسدا رسدا گھر چھڈ کے ایس پلے بوائے دے چکر وچ آ گئی یاں فیر اوہنے پتہ نہیں کہڑی چائے لایا سی کہ اوہ خاتون اول بنن لئی تیار ہو گئی۔ اج کل اوہ سارے سکینڈلز‘ ویڈیو‘ آڈیو دی زد وچ آئی ہوئی اے ساری کھوج پرکھ تے پچھ پرتیت اوہدے آل دوالے گھم رہی اے اوہدی سہیلی تے اوہدے پچھلے خاوند دے بچے وی گھیرے وچ آئے ہوئے نیں۔ گل ایتھے ای نہیں مُکدی سگوں اوہدی پسند جہدے وچوں اوہنوں اک سچی تے سُچی روح وکھالی دتی سی ہن اوہدے کولوں خلع لین لئی اوہ عدالت وی پہنچ گئی اے یعنی معاملہ کجھ بہتا ای خراب اے تے اوہ وسوں باہر ہو گیا اے بھاویں دیسی گھیو وچ دیسی ککڑ پکائونا بڑا پسند سی۔
سیاسی ماحول وچ اج کل ویڈیو‘ آڈیو ہر تھاں‘ سڑکاں‘ چوکاں تے تھڑیاں دا موضوع بنی ہوئی اے جہدے وچ کجھ ایہو جیہاں وی ہے نیں جہناں دی مسلم معاشرے دیاں روایتاں وچ انسانی اخلاقیات دی نفی کیتی گئی اے۔ رشتیاں دا عزت و احترام وی نہیں کیتا گیا ایہ پورا سچ اے یاں نہیں ایہناں دے لوکائی دے سامنے آن تے پتہ لگے گا میری جاچے ایہناں دا سیاسی فائدہ گھٹ ای ہووے گا کیوں جے جہدے بارے ایہ ویڈیوز تے اوہ اک پلے بوائے سی جہڑا مغرب وچ پلیا سی جتھے سیکس فری سوسائٹی اے رشتے نہیں۔ سیاسی فائدہ صرف صادق تے ایمن دے دعوے دی نفی نال ای ہو سکدا اے کرپشن تے اوہدے پکے ثبوت ای کجھ کر سکدے تے چہرے توں نقاب لاہ سکدے نیں۔ مننا اسیں فیر وی نہیں کیوں جے سیاست تے ساری ’’نہ‘‘ اُتے کھڑی اے۔٭