مہان کامیڈین اکرام اداس دی پاکپتن وچ عید

حسنین مسعود

سانجھے پنجاب دی مشہور پنجابی فلم چل میرا پُت جیہڑی پوری دنیا وچ پسند کیتی گئی تے کاروبار دے لحا ظ نال وی کامیاب رہی۔مزیدار گل ایہ ہے کہ ایس فلم دے نال نال لہندے پنجاب دے نامور فنکار اکرم اداس دا ڈائیلاگ ”فیر کہندے نیں بوٹا گالھاں کڈدا اے”پوری دنیا وچ اینا مشہور ہویا کہ ایہہ ڈائیلاگ اوہناں دی شناخت بن گیا۔ایس فلم تو پہلاں وی اکرم اداس سٹیج دی دنیا دا وڈا نام سن تے ہن بین الاقوامی سطح تے جانے جاندے نیں۔ساڈا شہر پاکپتن اک پسماندہ علاقہ اے جتھے سیر وتفریح لئی پارک تے دوجیاں سہولتاں موجود نئیں ایس لئی لوکاں دی عید بور جئی لنگدی اے۔ایس عید تے ساڈے ستارے اکرم اداس نیں پاکپتن آون دی دعوت قبول کردے ہوئے عید میلہ وچ شرکت کیتی جوکہ پریس کلب پاکپتن وچ سجایا گیا سی۔اکرم اداس پاکپتن دے اک پنڈ نگر مرلے وچ کرکٹ میچ ویکھن لئی وی گئے تے عید اوہناں پاکپتن دے لوکاں نال پریس کلب منائی۔پاکپتن دی عوام ولوں اوہناں دا تاریخی استقبال کیتا گیا تے سیلفیاں لئی نوجواناں دا رش پئے گیا ۔عوام اکرم اداس نوں اپنے درمیان ویکھ کے بے حد خوش ہوئی۔اکرم اداس نے ایس پروگرام وچ گل بات کردے ہوئے عوام دا شکریہ ادا کیتا تے اوہناں دا کہنا سی میں سب نوں کہواں گا جِنھاں پیار عزت تے محبت ویکھنی ہووے اوہ اک وار پاکپتن دا چکر ضرو ر لاون،اوہناں نیں کہیا کہ نوجواناں نوں چاہیدا چنگے چنگے کماں وچ حصہ لین تے اپنے ملک تے قوم دا ناں دنیا وچ روشن کرن۔پروگرام و چ عرفان سحر ولوں صوفیانہ موسیقی پیش کیتی گئی۔پریس کلب پاکپتن وچ سابق صدر پریس کلب وقار جگنو،سماجی سیاسی شخصیت موتیا مسعود خالد،چیئرمین پریس کلب اے ڈی شاہد،صد رملک محمد علی،جزل سیکرٹری وارث شاہ،جزل سیکرٹری الیکٹرانک میڈیا افتخار بھٹی،حیدر علی شہزاد،مستنصرکامران بلوچ،خضر ولی چشتی،چوہدری عفان کمبوہ،عرفان خرم چشتی،ناظم تابلو،علی رضاسنے صحافی برادری تے اہلیان پاکپتن نیں وڈی تعداد وچ رلت کیتی۔تقریب توں بعد میک پاکستان گرین تے پریس کلب پاکپتن ولوں اکرم اداس نوں اعزازی یادگاری شیلڈ وی پیش کیتی گئی تے اوہناں نیں شجرکاری دا سنہیا دین لئی اپنے ہتھ نال اک بوٹا وی لایا۔وڈے فنکار تے ودھیا انسان اکرم اداس جی دے نال گزریا یادگار دن ہمیشہ یاد رہے گا تے اسی کھلا ویلا دین لئی اوہناں دا جناں وی شکرادا کرئیے اوہناں تھوڑا اے۔ رب ہمیشہ پیار محبت دے بے لوث رشتیاں نوں سلامت رکھے آمین۔