سپ پوڑھی دا کھیڈ

پچھلے وزیراعظم عمران خان اقتدار توں اترن دے بعد سوشل میڈیا’ جلسے جلوساں تے لانگ مارچ دے راہیں نویں مخلطو حکومت تے مسلسل دباء پا رہے نیں تے کسے حد تک اوہناں نوں لوکاں وچ پذیرائی وی مل رہی اے جد کہ نویں چنے وزیراعظم میاں شہبازشریف نوں عالمی کساد بازاری تے ملک دے ماڑے معاشی حالات دی وجہ نال ملکی معاملیاں تے مضبوط گرفت رکھن وچ مشکل پیش آ رہی اے۔ایس بحث وچ الجھے بناں کہ عمران خان دی تحریک انصاف مضبوط دو جماعتی نظام نوں مدھدی ہوئی کیوں تے کیویں اقتدار وچ آئی اسیں اوہناں دی حکومت دی ساڑھے تن سالہ کارکردگی دا مختصر جیہا جائزہ لینے آں۔
2018ء وچ وزیراعظم بنن دے بعد عمران خان حکومتی معاملیاں نوں چلان لئی اک اجہی ٹیم بنان وچ نکام رہے جو نہ صرف ایہ کہ اوہناں دے وژن نوں لے کے اگے ودھدی سگوں حکومت دے سارے تھماں نوں نال لے کے چلدی۔ نااہل’ ناتجربہ کار تے حد توں ودھ خوداعتماد وزیراں دی اکثریت مضبوط بیوروکریسی دی مدد دے بناں اپنیاں وزارتاں وچ کارکردگی وکھان وچ نکام رہی تے ملک دے دو وڈے صوبیاں وچ جتھے تحریک انصاف دی حکومت سی وزرائے اعلیٰ دے غلط انتخاب تے وزیراعظم دی مسلسل پشت پناہی نے حکومتی کارکردگی نوں ہور گہنا دتا جہدے نال نہ صرف عوام سگوں حکومتی پارٹی دے ممبران وی اپنی ٹیم دی کارکردگی تے عدم اطمینان دا اظہار کرن لگے۔ حکومتی ٹیم دے کپتان عمران خان جہناں توں قوم خاص کر نویں نسل نوں بہت ساریاں توقعات سن بعض وجوہات پاروں اپنی ٹیم نوں مکمل گرفت وچ نہ رکھ سکے تے ملکی معاملیاں توں ہولی ہولی دور ہوندے گئے۔ پارلیمنٹ وچ وزیراعظم دا جانا بڑا گھٹ گیا۔ نتیجے دے طور تے پارٹی ممبران تے اتحادیاں دے نال رابطے وی گھٹ گئے۔ وفاقی کابینہ دے اجلاس باقاعدگی نال ہوندے تے بناں سوال جواب مطلوبہ منظوریاں لین دے بعد ختم ہو جاندے۔ وزیراعظم دی عدم دلچسپی دا فائدہ چک کے کجھ قریبی بندے اہم قومی معاملیاں تے اثرانداز ہون لگے جہدے نال قومی سلامتی دے اداریاں نوں وی چنتا ہون لگ پئی۔ حکومت وچ شامل کجھ وزیر’ مشیر’ اعلیٰ حکومتی عہدیداراں تے وزیراعلیٰ دی کرپشن دیاں داستاناں زبان زدعام ہو گئیاں تے وزیراعظم عمران خان دی خاموشی تبدیلی دے خواہش مند لوکاں لئی اچنبھے دا کارن بنی۔ ٹیکسٹائل’ ماحولیات’ ہائوسنگ تے صحت دے شعبیاں وچ حکومتی کارکردگی کجھ بہتر رہی۔ خاص کر کرونا ورگی وباء نوں روکن لئی حکومت نے بلاشبہ بڑا کم کیتا پر لوکاں نوں توقع سی کہ عمران خان دی حکومت توانائی’ زراعت’ معاشیات’ آبی وسیلے’ تعلیم’ روزگار تے آبادی تے کنٹرول ورگے اہم مسئلیاں تے دھیان دیوے گی جہناں نوں پی ٹی آئی حکومت نے نظرانداز کرکے روزمرہ دے کماں نوں پہل دتی’ توانائی تے وزیراعظم عمران خان نے اک کمیشن بنایا جہدی سفارشات ردی دی ٹوکری دی نذر ہو گئیاں۔
پچھلے دور حکومت وچ پاکستان دی سفارتی تنہائی روز روشن وانگوں واضح سی’ گنتی دے کجھ عالمی لیڈر پاکستان دے دورے تے آئے۔ سعودی ولی عہد محمد بن سلمان عمران خان دی خاص دعوت تے پاکستان آئے تے فیر ساڈے سدابہار وزیر خارجہ شاہ محمود قریشی دے اک غیرذمہ دارانہ بیان نے آپسی تعلقات وچ دراڑ پا دتی۔ مغربی ملک تے امریکہ نوں سب توں ودھ سمجھن والے عمران خان دے دور حکومت وچ اوہناں ملکاں دے نال تعلقات وچ سردمہری دی وجہ سمجھ نہیں آ سکی۔ پاکستان دے دوست ملک چین دے نال دولّی تعلقات وچ گرمجوشی وی گھٹ گئی۔
سیاست سپ پوڑھی دا کھیڈ اے اقتدار تے طاقت توں محروم عمران خان فیر اقتدار دی کرسی تے بیٹھ سکدے نیں پر ایہدے لئی اوہناں نوں اپنے آپ نوں بدلنا ہووے گا۔ خودپرستی تے انا دے خول چوں نکلنا ہووے گا۔ ملک دے حقیقی مسئلیاں تے دھیان دینا ہووے گا۔ قابل’ دیانتدار تے تجربہ کار ٹیم تشکیل دینی ہووے گی۔ متوازن خارجہ پالیسی بنانی ہووے گی’ وسیلیاں دی منصفانہ تقسیم یقینی بنانی ہووے گی۔ ملک دی ترقی تے بقا نوں ہر چیز تے پہل دینی ہووے گی۔ سیاسی حلیفاں تے حریفاں دے نال رواداری تے برداشت دا رویہ اپنانا ہووے گا۔ پچھلے ورھیاں وچ پھیلی کرونا وباء تے حالیہ روس یوکرین جنگ نے عالمی معیشت تے تباہ کن اثرات پائے نیںتے ساڈا ملک وی ڈاڈھی مشکل تے دباء وچ اے جد کہ ساڈے موجودہ تے ماضی دے حکمران اک دوجے نوں معاشی انحطاط دا ذمہ دار ٹھہرا رہے نیں۔ ملک تے معیشت نوں بچان لئی سارے فریقین نوں داخلی تے خارجی محاذ تے پکی پیڈی حکمت عملی اپنانی ہووے گی کیوں جے ملک ڈیفالٹ ہویا تے نقصان بلاتفریق ساریاں دا ہووے گا۔٭٭