عتیق انور راجہ دے ناں اِک شام

ملک دے منے پرمنے شاعر ‘ ادیب’ کالم نگار’ دانشور تے سماج سیوک جناب عتیق انور راجہ دے چاہن والیاں نے اوہناں دی خدمات دے اعتراف وچ اک تقریب دا پربندھ بی بی سی نیوز دے دفتر سول لائن گوجرانوالہ وچ کیتا۔ ایس باوقار تقریب وچ گوجرانوالہ دے نامور کالم نگاراں’ شاعراں’ ادیباں تے دوجے شعبہ ہائے زندگی نال تعلق رکھن والی شخصیات نے بھرویں رلت کیتی۔ تقریب دا آغاز تلاوت کلام پاک توں کیتا گیا۔ مفتی عمران صاحب نے قرآن پاک دی تلاوت کیتی فیر درودوسلا پیش کیتا گیا۔ تقریب نوں دو حصیاں وچ تقسیم کیتا گیا۔ پہلے حصے دی صدارت سینئر قنون دان ‘ کالم نگار تے منے پرمنے سیاسی رہنما سلیمان کھوکھر نے کیتی جد کہ نقابت محترمہ راحت ثمر نے کیتی۔ تقریب وچ موجود تمام حاضرین جہناں وچ جناب سلمان کھوکھر’ شوکت ڈار’ مہر امین ‘ راجہ افضال عزیز ‘ مہرامین ‘ عرفانہ امر’ مفتی عمران صاحب’ سجاد سردار وڑائچ ‘ عاصم شہزاد ‘ عثمان اشرف’ رفاقت حسین’ سیف اللہ مرزا’ ثقلین افضل’ روبینہ ناز’ سونیا صاحبہ شامل سن۔ایہناں ساریاں نے عتیق انور راجہ لئی اپنی عقیدت دا خوبصورت انداز وچ اظہار کیتا۔ مقررین نے آکھیا کہ پچھلے کئی سالاں توں عتیق انور راجہ ادب دی خدمت کر رہے نیں۔ عتیق انور راجہ نے دین محمد لائبریری نوں ازسر نوآباد کروان وچ کلیدی کردار ادا کیتا تے عوام وچ کتاب نال محبت نوں اجاگر کرن دی ہرممکن کوشش کیتی۔ سلمان کھوکھر نے راجہ صاحب دی خدمات نوں بڑے خوبصورت انداز وچ خراج تحسین پیش کیتا تے مستقبل وچ ہور کامیابیاں دی دعا کیتی۔ راحت ثمر نے راجہ صاحب نوں عہد ساز شخصیت قرار دتا تے آکھیا اسیں عہد عتیق انور راجہ وچ جی رہے آں۔ عرفانہ امر نے راجہ صاحب دے نال کئی سالاں دے ادبی سفر اتے چانن پایا تے اپنے شعراں دے ذریعے راجہ صاحب نوں خراج عقیدت پیش کیتا۔ روبینہ ناز نے راجہ صاحب دی جدوجہد نوں جہاد قرار دتا۔ سجاد سردار وڑائچ نے علمی’ ادبی تے ثقافتی تقریباں دے تسلسل نوں راجہ صاحب دی انتھک محنت’ لگن تے بے لوث ہون دی وجہ قرار دتا۔ عثمان اشرف’ سیف اللہ ساجد’ عاصم شہزاد تے شوکت ڈار نے راجہ صاحب نال اپنی دوستی دے چنگے دناں دا ذکر خوبصورت لفظاں وچ کیتا تے آئندہ وی نال چلن دا عہد کیتا تے اوہناں لئی تعریفی کلمات آکھے۔ ساریاں نے اوہناں دی لمی عمر تے کامیابیاں لئی دعا کیتی۔ تقریب دے دوجے حصے وچ خوبصورت مشاعرے دا پربندھ وی کیتا گیا۔ مشاعرے دی صدارت جناب شوکت ڈار صاحب نے کیتی۔ دوجے شاعراں وچ رمضان تائب ‘ مطلوب حسین’ روبینہ ناز’ سیف اللہ’ راحت ثمر’ عرفانہ امر’ عتیق انور راجہ تے شوکت ڈار نے اپنا اپنا کلام سنا کے خوب سماں بنھیا۔ تقریب دے اختتام تے بی بی سی نیوز توں شروع ہون والے اک پروگرام جانباز دی کامیابی تے چینل دی ترقی لئی خصوصی دعا کیتی گئی۔ دعا دے فرائض جناب مفتی عمران نے ادا کیتے۔