پنجابی ساہت کلا کیندر یو کے ولوں سلانہ ساہتک سماگم

پنجابی ساہت کلا کیندر یو کے ولوں سالان ادبی تقریب سائوتھال وچ کروائی گئی جس وچ انگلینڈ بھر چ رہندے لہندے اتے چڑھدے پنجاب دے لیکھکاں توں اَڈ گلاسگو، چنڈی گڑھ، آسٹریلیا، کینیڈا توں آئے لکھاریاں وی رلت کیتی۔ تقریب دی شروعات کردیاں منپریت سنگھ بدھتی کلاں نے آئے پروہنیاں نوں جی آیاں کہیا۔ سماگم دی پردھانگی ڈاکٹر مہیندر گل، مہندر پال سنگھ دھالیوال، کلونت کور ڈھلوں، جسوندرتیاں، امین کنجاہی، ڈاکٹر دوندر کور، دلو برسمن بلواروی، نزہت عباس، پرکاش موبل، سبھاش بھاسکر اتے سنتوکھ ہیئر نے کیتی اتے پہلے بھاگ چ جسوندر رتیاں دے ناول کنڈیا لے ساک بارے ڈاکٹر دوندر کور نے پرچہ پڑھیا جس تے بعد وچ بھرویں چرچا ہوئی ایس موقعے اتے پنجابی ساہت کلا کیندر ولوں اُگھے شاعر درش بلندوی نوں پنجاب ساہت اتے جسونت کور نوں پنجابی گیت سنگیت وچ پائے یوگدان لئی سنتمانت کیتا گیا، جنہاں دیاں کامیابیاں بارے گرنام سنگھ گریوال اتے کلونت ڈھلوں نے جانو کروایا۔ پنجابی بھاشا وچ اے لیول تک دی پڑھائی کرن والے یو کے دے جم پل نوجوان دوندر جیت سنگھ گریوال نوں سنتمانت کیتا گیا دوجے بھاگ وچ دونویں پنجاب دے لکھاریاں دیاں کتاباں جاری کیتیاں گئیاں۔ ساگم دی کارروائی منجیت کور پڈا اتے عظیم شیکھر نے نبھائی کوی دربار وچ کویاں نے اپنیاں رچناواں پیش کیتیاں۔
یاد رہوے کہ ایہ تنظیم اپنے پنجابی ادب دی سیوا بڑے چر توں کر رہی اے۔ ایس توں علاوہ لندن وچ وسدے ہوئے لہندے تے چڑھدے پنجاب دے لکھاریاں دیاں کتاباں نوں وی بڑے اہتمام نال مُکھ وکھالی کیتی گئی۔ پنجابی کہانی کار سلیم خان گِمی جی دے ناں اتے بنے ہوئے ادارے گمی فائونڈیشن دے تحت چھاپیاں گئیاں کتاباں وی ریلیرز کیتیاں گئیاں۔ شگفتہ گمی دی کتاب ” کینسر تے اوہدیاں قِسماں” نوں خاص طور تے ریلیز کیتا گیا۔ ایس تنظیم دا پردیس وسدے لوکاں نوں اِک تھاں تے کٹھے کرن دا عمل بڑا ای سوہنا اے۔ ایہہ تنظیم چوکھے عرصے توں اد ب دی سیوا پئی کردی اے۔ ایس دے بعد سیکرٹری عظیم شیکھر جی پچھلے دنیں لہور وچ ہوئی کانفرنس وچ شامل ہوئے سن تے اوہناں ولوں پڑھے گئے پرچے نے تقریب وچ شامل لوکاں نوں بہوں متاثر کیتا سی۔ اوہناں دا کہنا سی کہ جد تیکر سبھ لوک اپنی ماں بولی واسطے ہلا مار کے اگے نہیں ودھدے اوہناں چر بولی نوں نہ تے بچایا جا سکدا اے نا اگے ودھایا جا سکدا اے۔
ایس تنظیم دا مُڈھلا ٹیچا اپنی بولی ، اپنے ورثے نوں سانبھن دے نال نال اوہدی چرچا کرنا اے۔ اوہناں دا مقصد ایہہ ہے کہ لوک اپنی بولی نوں جیوندا رکھن تے اوس دے ادب وچ دنوں دن وادھا کرن۔ بڑی ہی ودھیا گل تے ایہہ ہے کہ ایس شہر لندن وچ دوہاں پنجاباں دے لکھاری اک مُٹھ ہو کے اپنی ماں بولی واسطے کر پئے کردے نیں۔
دوندر کور جی ہوراں نے اُچیچے طور تے رلت کیتی ایس توں وکھ شاہ مکھی وچ چھپیا ناول ”صوفیہ” دے کلھاری مہیندر پال سنگھ ہوراں نے وی رلت کیتی۔ یاد رہوے کہ گورمکھی توں شاہ مکھی وچ چھپن والیاں کتاباں ہُن دنوں دن ودھ رہیاں نیں۔ بہت جلد جسوندر سنگھ ہوراں دا ناول ”ساک کنڈیالے” وی شاہ مکھی وچ چھپن جا رہیا اے۔