پِلاک تے پاکستان کیلی گراف آرٹسٹس گلڈ دی سانجھ نال

پنجاب انسٹیٹیوٹ آف لینگوئج’ آرٹ اینڈ کلچر (پلاک) تے پاکستان کیلی گراف آرٹسٹس گلڈ دے اشتراک نال استاد خطاط تے مصور واجد محمود یاقوت رقم دی یاد وچ تعزیتی ریفرنس دا پربندھ کیتا گیا۔ جہدے وچ نامور خطاطاں تے ادیباں نے اوہناں دے فن خطاطی تے شخصیت دے پہلوواں اتے بھرواں گل بات کیتی جہناں وچ طارق شریف زادہ، گلزار نیازی، ڈاکٹر سمیرا جواد، سمیرا ساجد، عرفان قریشی، پروفیسر ڈاکٹر شفیق احمد، اخلاق احمد تے دوجے شامل سن۔اوہناں نے آکھیا کہ واجد محمود یاقوت رقم گوناگوں خوبیاں دے مالک سن۔ اوہ بیک وقت خطاط تے مصور سن۔ اوہناں دے شاگرداں دی فہرست بہت لمی اے۔ وہ انتہائی درجہ دے خوش اخلاق’ مہمان نواز’ بذلہ سنج’ شگفتہ مزاج’ عاشق رسولۖ تے دردمند دل رکھن والے انسان سن۔ ہر اک دا خندہ پیشانی نال استقبال کردے سن۔
طارق شریف زادہ نے آکھیا کہ فن خطاطی بہت مقدس پیشہ اے۔ جہدا آغاز کتابت وحی توں ہویا۔ حضورۖ نے حضرت علی نوں اولاد دی تربیت دے حوالے نال جہڑی نصیحتاں کیتیاں اوہناں وچوں اک خطاطی دا سکھنا وی شامل سی۔ حضرت امام حسین دے خط نوں ویکھ کے آپۖ نے بہت تعریف فرمائی۔