آبادی اور وسائل میں توازن حوشحالی کا ضامن سیمینار

محکمہ بہبود آبادی تے پلاک دے تعاون نال ”آبادی اور وسائل میں توازن خوشحالی کاضامن” دے موضوع اتے اک سیمینار دا پربندھ کیتا گیا جہدی صدارت منے پرمنے صحافی’ شاعر تے کالم نگار سعید آسی نے کیتی۔ مجلس ترقی ادب دے صدر’ شاعر تے کالم نگار منصور آفاق بطور اچیچے پروہنے شریک ہوئے۔ دوجے مقررین وچ ڈاکٹر طاہر احمد صدیقی، ڈاکٹر امجد، خواجہ آفتاب حسن، ٹھاکر لاہوری، حفیظ الرحمن تے ڈاکٹر صغرا صدف شامل سن۔
مقررین نے آکھیا کہ ایس ویلے دنیا نوں سب توں ودھ جہناں مسئلیاں دا سامنا اے اوہناں وچ سرفہرست آبادی وچ وادھا اے۔ کوئی وی ملک اوس ویلے تک ترقی دی منزلاں طے نہیں کر سکدا جدوں تک اوہدی آبادی تے وسائل وچ توازن قائم نہ ہووے۔ وسائل تے آبادی دے توازن وچ جدوں وگاڑ پیدا ہوندا اے تے اوہدے توں بہت سارے مسئلے جنم لیندے نیں۔ آبادی وچ بے ہنگم وادھا دے کارن زرعی زمین قصبیاں تے شہراں وچ تبدیل ہو رہی اے جہدے توں خوراک دے مسئلے پیدا ہو رہے نیں۔ انسان نوں اللہ تعالیٰ نے عقل سلیم عطا کر کے اشرف المخلوقات دے منصب اتے فائز کیتا۔ ہرانسان نوں کنبہ ودھان توں پہلاں ایہہ سوچنا چاہیدا اے کہ کیہ میں اپنے خاندان نوں اوہ سہولتاں بہم پہنچا سکنا واں جہڑی کہ معاشرے دا اک مفید شہری بنن لئی ضروری نیں۔ اولاد دی تعلیم و تربیت دی پہلی ذمہ داری اوہدے والدین اتے عائد ہوندی اے۔ وسائل دی کمی دے کارن اولاد دی ٹھیک تربیت دا نہ ہونا والدین لئی پریشانی دی وجہ بن سکدا اے۔ آبادی وچ وادھے دی سب توں وڈی وجہ اولاد نرینہ دا حصول اے۔ اج دے دور وچ مرد تے زنانیاں برابری دی بنیاد اتے زندگی دے سارے شعبیاں وچ پوری ذمہ واری نال اپنی خدمات سرانجام دے رہے نیں۔ لہور دے 7ہسپتالاں وچ زنانیاں لئی فلاحے مرکز قائم نیں جد کہ مرداں لئی صرف گنگا رام ہسپتال وچ ایہہ سہولت موجود اے۔
ایہناں سارے مسئلیاں دے حل لئی ضروری اے کہ معاشرے دا ہر فرد اپنی ذمہ واری نوں محسوس کرے۔ لوکاں لئی تفریح دے موقعے فراہم کیتے جاوے۔ اخباراں’ ٹی وی تے سوشل میڈیا اتے آگاہی دی مہم چلائی جاوے۔ ٹاک شوز’ ڈرامے تے شارٹ ویڈیوز دے ذریعے بہبود آبادی دے پیغام نوں عام کیتا جاوے۔ بوہتے بچے پیدا کرن والیاں لئی جرمانے دا نفاذ کیتا جاوے۔ اولاد نرینہ دے حصول لئی حکومتی سطح اتے صحت دی سہولتاں فراہم کیتیاں جان۔
ایس موقعے اتے ڈاکٹر صغرا صدف ڈائریکٹر جنرل پلاک نے آکھیا کہا ولاد لئی صرف خوراک دا انتظام کرنا کافی نہیں ہوندا۔ اوہدی تربیت جے صحیح پیمانے اتے نہ کیتی جاوے تے والدین لئی باعث ندامت ہوسکدا اے۔ ایسے طرح جے تسیں بچیاں نوں اپنی شفقت توں محروم رکھدے نیں تے اوہ اگے چل کے نفسیاتی مسئلیاں دا شکار ہو سکدے نیں۔ اوہناں نے آکھیا پلاک تے ایف ایم 95ہمیشہ قومی ایشوز اتے آگاہی دے پروگراماں نوں اہمیت دیندا رہندا اے۔
٭٭٭