سپریم کورٹ ججاں تے الزام، سرکار نے اٹارنی جنرل توں استعفیٰ لے لیا

اسلام آباد: سپریم کورٹ دے ججاں دے خلاف الزام لان تے سرکار نے اٹارنی جنرل آف پاکستان انور منصور خان توں استعفیٰ لے لیا۔ اٹارنی جنرل آف پاکستان انور منصور خان عہدے توں مستعفی ہو گئے نیں۔ اوہناں نے استعفیٰ صدر مملکت عارف علوی نوں گھلدیاں چھیتی قبول کرن دی عرضی کیتی اے۔ انور منصور آکھیا میں کل رات نوں استعفیٰ دین دا فیصلہ کر لیا سی جہڑا اج گھل دتا اے۔

انور منصور نے دسیا پاکستان بار دے مطالبے تے استعفیٰ دے رہیا آں تے اوہناں دے نال ہور کم نہیں کراں گا۔ وفاقی حکومت نے سپریم کورٹ دے ججاں دے خلاف اٹارنی جنرل دے موقف توں لاعلمی تے لاتعلقی دا اظہار کر دتا۔

ترجمان وزارت قنون نے تحریری جواب عدالت وچ جمع کراندیاں آکھیا اٹارنی جنرل دے موقف توں وفاقی حکومت دا کوئی تعلق نہیں، اوہناں نے حکومتی ہدایات دے بغیر عدلیہ دے حوالے نال موقف اپنایا، وفاقی حکومت عدلیہ دا بہت احترام کردی اے تے آئین دی بالادستی وعدلیہ دی آزادی تے پورا یقین رکھدی اے۔

وفاقی وزیر قنون فروغ نسیم آکھیا وزیراعظم عمران کان، صدر عارف علوی، میری تے معاون برائے احتساب شہزاد اکبر ولوں سپریم کورٹ وچ جواب جمع کرایا گیا اے، اسیں عدالتاں دا احترام کرنے آں، انور منصور خان نے بغیر اجازت سپریم کورٹ وچ اچانک بیان دتا۔شہزاد اکبر آکھیا اسیں انور منصور خان توں استعفیٰ منگیا تے اوہناں نے دے دتا، سرکار ولوں ریفرنس وچ دلائل دا سلسلہ جاری اے۔

اٹارنی جنرل انور منصور خان نے پیر نوں جسٹس فائز عیسیٰ کیس وچ دلائل شروع کردیاں سماعت کرن والے سپریم کورٹ دے 10رکنی لارجر بنچ وچ شامل ججاں تے الزام لایا کہ اوہناں نے صدارتی ریفرنس دے خلاف مقدمے دی تیاری وچ جسٹس فائز عیسیٰ دی مدد کیتی اے تے اوہناں نوں مشورے دتے نیں۔

اپنا تبصرہ گھلو