غزل
رمضان شاکر
کیوں تیرا دل پیار دی حامی بھردا نہیں
دل وچ ہووے پیار تے بندہ مردا نہیں
غیراں نے کیہ بھار ونڈانا دکھاں دا
دل تیرا جے تیرے دکھڑے جردا نہیں
سچی گل اے پیار کرن توں ڈرنا واں
لوکاں چاری کہنا واں میں ڈردا نہیں
ٹٹیاں کرچاں جوڑ دوے تے مناں گا
شیشے وچ کمال تے شیشہ گردا نہیں
اتر بھلا کیہ پتھر دل تے ہاواں دا
پانی اندر لوہیا وی تے تردا نہیں
اپنے ہتھیں آپ لٹایا سدھراں نوں
تانہیوں میں الزام کسے تے دھردا نہیں
دل اپنے دا میں ای آپے ویری آں
میں تے شاکر سجن اپنے گھر دا نہیں
