سردار سوہی…پنجابی فلماں دے مہان اداکار

سردار سوہی نومبر1949وچ چڑھدے پنجاب دے پنڈسنگرور وچ پیدا ہوئے۔ایس ویلے پنجابی فلم انڈسٹری جو پوری دنیا وچ وکھرا مقام رکھدی تے پنجابی فلماں سردار سوہی تو بنا ادھوریاں نیں کیونکہ پچھلے کجھ سالاں وچ پنجابی دیاں سپر ہٹ فلماں وچ سب تو زیادہ پسند کیتے جاون والے کردار سردار سوہی رہے نیں،مثال دے طور تے جے انگریز فلم دی گل کرئیے تے انگریز فلم چڑھدے لہندے پنجاب سنے پوری دنیا وچ سب توں زیادہ مشہور ہوئی تے سب تو زیادہ دیکھی جاون والی فلم اے جنے پنجابی انڈسٹری نوں وی آسمان نال لادتا تے ایس فلم وچ سردار سوہی دے کردار نوں لوکاں بوہت زیادہ پسند کیتا۔سردار سوہی دے سفر دا آغاز تھیٹر توں ہویا اوہناں منے پرمنے تھیٹر دے استاداں نال لگاتار 12سال تھیٹر وچ کم کیتا تے اوس توں بعد فلماں وچ کم کرن دا سفنا لے کے ممبئی گئے۔تھیڑ وچ بھرواں کم کرن دی وجہ توں سردار سوہی نوں کم ویلے وچ ای کم ملنا شروع ہوگیا تے ڈائریکٹرتے درشکاں نیں وی اوہناں دے کم نوں پسند کیتا تے ہن تک سردار سوئی ہن تیک بے شمار فلماں کرچکے نیں تے ولن دے طور تے وی سردار سوہی نوں وکھرن شناخت ملی،اوہناں دے منفی کردارں نوں کئی ایوارڈ وی مل چکے نیں۔سردار سوہی پاکستان فلماں دے وی شیدائی نیں اوہناں نے دسیا کہ میں جدوں وی پنجابی فلماں ویکھدا سی میرا من کردا سی کہ اینا ں فنکاراں نال کدوں ملاقات ہوووے گی،اوہناں دی ناصر چنیوٹی نال فلم وی آرہی اے،اوہناں نیں دسیا کہ پاکستان فنکاراں نال جدوں وی ملاقات ہوئی بڑے کھلے دل نال پیار مان دیندے نیں۔سردار سوہی پنجابی فلماں دے سارے وڈے ستاریاں نال کم کرچکے نیں تے اوہناں دا کہنا پنجابی فلم انڈسٹری بالی ووڈ نوں ٹکر دیندی اے تے ساڈی پنجابی فلماں تسی فیملی نال وی بہہ کے ویکھد سکدے کیونکہ فلماں وچ مزاح تے کوئی نہ کوئی چنگا سنہیا ہندا اے۔سردار سوہی چاہندے نیں دوویں پنجاب مل کے فلماں بناون مل کے کم کرن کیونکہ پنجاب دے لوک آپس وچ پیار کردے نیں پرسارے رولے سیاست داناں نیں۔ اسی ناٹک تے فلماں دے راہیں وی پیار محبت امن دا سبق دینے آں۔سردار سوہی بالی ووڈ دیاں کجھ فلماں وی کرچکے نیں۔سردار سوہی ایک ودھیا اداکار ہون دے نال نال اک ودھیا لکھاری وی نیں جنہیاں نیں کئی فلماںتے ڈرامیاں دے ڈائیلاگ لکھے نیں۔سردار سوہی نے اپنی ماں بولی نال بوہت پیار کردے نیں ایس لئی اوہناں نے بالی ووڈ نوں خدا حافظ آکھیا تے پنجابیاں نیں وی ایناں نوں بڑا مان سمان دتا اج پوری دنیا وچ فین موجود نیں۔سردار سوہی نیں دھرمندر،اوم پوری،گپی گریوال،امریندر گل،ایمی ورک سنے کئی وڈے وڈے فنکاراں نال کم کیتا۔ہن وی اک فلم پاکستانی ناصر چنیوٹی نال تے پنجابی دی کئی نویاں فلماں آرہیاں نیں۔سردار سوہی نے لہندے پنجاب پاکستان وچ پنجابی فلماں نوں ڈاھڈا پیار دین تے شکریہ ادا کیتا تے ایہہ ارداس کیتی کہ لہندا پنجاب نہ صرف ویکھن آئیے بلکہ صبح لاہور شوٹ ہووے تے شام نوں امرتسر شوٹنگ ہووے۔ دوویں پنجاب رل کے کم کرن کیونکہ فن تے فنکاراں دی کوئی سرحد نہیں ہندی بلکہ فنکاراں ملکاں دے درمیان پل دا کردار نبھاندے ہوئے امن پیار محبت تے بھائی چارے دا پرچار کردے نیں۔