غزل
ارشد منظور
ترا اتبار نئیں کرنا کدی وی
میں تینوں پیار نئیں کرنا کدی وی
ملن مینوں نہ آیا کر توں بیبا
ترا دیدار نئیں کرنا کدی وی
کنارے بیٹھ کے لیناں نظارہ
ایہ دریا پار نئیں کرنا کدی وی
میں پہلا پیار کر کے رج گیا واں
تے دوجی وار نئیں کرنا کدی وی
حیاتی وی گزر جائے گی بہہ کے
سفر بیکار نئیں کرنا کدی وی
جے اُس اِظہار کیتا نال میرے
تے میں اقرار نئیں کرنا کدی وی
اوہ وچھڑن دا کرے پکا جے وعدہ
تے میں انکار نئیں کرنا کدی وی
بڑے ارشد میں دکھڑے ویکھ لئے نیں
میں دل بیزار نئیں کرنا کدی وی
