غم داڈیرہ
صائمہ ضیاء رانا
دل وچ غم نے لایا ڈیرا
میں ول یار کریں اک پھیرا
اکھیاں وچوں اتھرو وگدے
تیر ہجر دے سینے لگدے
ساڑے اگ جدائیاں والی
رات غماں دی ڈاہڈی کالی
ہر پاسے فیر دسے ہنیرا
میں ول یار کریں اک پھیرا
رسدے زخم فراقاں والے
دُکھ دی آتش تن من بالے
پِیڑ بدن وچ ہندی جاوے
ہر ویلے تیری یاد ستاوے
کٹیا جاندا دل ہن میرا
میں ول یار کریں اک پھیرا
چھڈ دے سارے جھگڑے جھیڑے
تھوڑے ساہ ہن رہ گئے میرے
آ ہن تھوڑے تیرے درشن کر لاں
صورت تیری نظریں بھر لاں
ایہ دنیا اک رہن وسیرا
میں ول یار کریں اک پھیرا
