جشن وارث شاہؒ دے موقعے تے کُل پنجاب مشاعرہ
پنجابی زبان دے انملے شاعر پیر سید وارث شاہؒ ہوراں دا مصرع اے ’’وارث شاہ اوہ سدا ای جیوندے نیں جنہاں کیتیاں نیک کمائیاں نی‘‘۔انج ای اک ہور صوفی شاعر حضرت سلطان باہوؒ ہوراں آکھیا کہ ’’نام فقیر تنہاندا باہُو قبر جنہاندی جیوے ہُو‘‘ایہ دو مصرعے لکھن دا مقصد ایہ دسنا اے، جے اپنے لئی تاں ہر انسان جیوندا اے،کماندا،کھاندا پیندا اے ۔پر بڑے گھٹ لوگ نیں جہڑے اپنے نال نال دوجیاں دے گھر دا وی دیوا بالدے نیں،اپنیاں لوڑا ں پوریاں کرن دے نال نال دوجیاں دیاں لوڑاں تھوڑاں دا وی چیتا رکھدے نیں ،انج دے لوگ ساڈے وسیب وچ بہوں گھٹ نیں۔پرجہڑے ہین ،،اوہ بڑے انملے نیں ۔پنجابی یونین دے چیئرمین تے روزانہ بھلیکھا دے چیف ایڈیٹر مدثر اقبال بٹ ہوریں اوہناں لوکاں وچ شامل نیں جہڑے اپنے وسیب تے رہتل نال نا صرف جڑے ہوئے نیں سگوں اپنی زبان(ماں بولی) دے ودھا لئی وی دن رات اک کیتی بیٹھے نیں، میں پشلے کوئی اٹھاراں ورھیاں توں مدثر اقبال بٹ ہوراں نوں جاننا واں،بھلیکھا اخبار وچ کم وی کردا رہیا،ایس دوران میں ایس نتیجے تے اپڑیا واں کہ مدثر اقبال بٹ گھاٹے دا سودا کرکے وی اپنی زبان (پنجابی) دی ترقی لئے دن رات اک کیتی بیٹھا اے۔
مدثر اقبال بٹ پشلے کئی ورھیاں توں پنجابی اخبار بھلیکھا چھاپ رہے نیں۔سرکار ولوں گھٹ اشتہار ملن دے باوجود اوہناں حوصلہ نہیں ہاریا تے ایہ کم اج تیکر جاری اے۔اخبار دے نال نال مدثر اقبال بٹ ہوراں بھلیھا ٹی وی دا کم وی شروع کر دتا اے جہڑا کہ سارے پنجابیاں لئی وڈی گل اے۔پبجابی زبان دی سیوا لئی مدثر اقبال بٹ ہوراں مصطفیٰ ٹائون لہور وچ پنجاب ہائوس بنایا اے ۔
ہن تیکر کئی پنجابی کتاباں وی چھاپ چکے نیں تے نالے پنجاب ہائوس وچ ادبی تقریباں کرا رہے نیں جہڑا کہ بڑا سلاہن جوگ اے ۔ایہ ساری گل دسن دا مطلب اے ایہ کہ پیر سید وارث شاہؒ دے مصرعے موجب مدثر اقبال بٹ وی نیک کمائی کر رہے نیں تے انج دے لوگ صدیاں تیکر جیوندے نیں ۔اللہ دی ذات مدثر اقبال بٹ ہوراں نوں سلامت رکھے تے اوہ پنجابی زبان تے ادب دی سیوا کردے رہن۔26جولائی نوں پنجابی دی خدمت دے ایس پندھ نوں اگے ٹوردیاں ہویاں پنجابی یونین تے وارث پرھیا ولوں جشن وارث شاہؒ دے سلسلہ وچ اک بھرواں کُل پنجاب مشاعرہ کرایاگیا۔مشاعرے دی اگوائی منے پرمنے شاعر عرفان صادق ہوراں دے حصے آئی ۔
جد کہ اچیچیے پروہنیاں وچ جان کاشمیری،سید محمود بسمل،ڈاکٹر صغیر احمد صغیر،خالد ندیم شانی تے شاہ دل شمس شامل سن ۔مشاعرے دی میزبانی ہمیش طرح اعظم توقیر نے کیتی۔دوجے پروہنے شاعراں وچ جی ایم ساقی،اسلم شوق،احمد علی کیف،سلمان رسول،سید فراست بخاری،افی گجر،مشتاق قمر،رائے عابد علی عابد،وحید ناز،یوسف یار،طاہر ہاشمی،جی اے نجم،لطیف ساجد،احمد اقبال بزمی،وارث گگوی تے دوجے رلتی سن۔
مشاعرہ روایت موجب تلاوت قرآن کریم نال شروع ہویا جہدی سعادت جی ایم ساقی دے حصے آئی۔۔۔فیر وحید ناز تے منے پرمنے نعت خواں نبیل نظامی ہوراں نبی کریمؐ دیاں نعتاں سنا کے من موہ لیا۔مشاعرے وچ پڑھے کلام دیاں ونگیاں حاضر نیں
تیرے پچھے نیتی ہوئی اے
ساڈا دین ایمان نہیں ٹُٹنا
ویکھیں ساتھوں جان نہ منگیں
ساتھوں تیرا مان نہیں ٹٹنا
عرفان صادق
٭٭٭٭٭٭
عشق دا سُوتر کتتدے کتتدے
مُک گئی دل دی پونی پونی
ماہل ٹُٹی جد ساہواں والی
رُک گئے چرخے چلدے چلدے
جان کاشمیری
٭٭٭٭٭٭
محض چل کر سُوئے مقتل نہیں جانا ہے مجھے
بوجھ زنجیر کا بھی ساتھ اٹھانا ہے مجھے
اُس نے غیروں کی رفاقت پہ مجھے چھوڑا تھا
اب سرابوں سے اُسے ڈھونڈ کے لانا ہے مجھے
سید محمود بسمل
٭٭٭٭٭٭
بھاویں کوئی حیثیت نہیں
میں تیری ملکیت نہیں
لوکاں لئی توں میرا ایں
دس کھاں یار اذیت نہیں
ڈاکٹر صغیر احمد صغیر
٭٭٭٭٭٭
دل کا یہ شہر بھی لاہور ہوا جاتا ہے
اس جہانگیر کو اک نورجہاں دیکھتی ہے
آنکھ تو آنکھ ہے
ٓپھر خواب سجا لیتی ہے
یہ مری ڈھلتی ہوئی عمر کہاں دیکھتی ہے
خالد ندیم شانی
٭٭٭٭٭٭٭
نہ رانجھا ہے کوئی زندہ نہ کوئی ہیر زندہ ہے
جو وارث شاہ ؒ نے لکھی وہ اِک تحریر زندہ ہے
مری بے نور آنکھوں میں لٹی دل کی حویلی میں
کسی کے ہجر کی لٹکی ہوئی تصویر زندہ ہے
شاہ دل شمس
٭٭٭٭٭٭
غماں نوں ڈیک لا کے پی گیا واں
سمندر سی ، میں چا کے پی گیا واں
کدی ہاسے پیالے وچ نیں گھولے
کدی اتھرو ملا کے پی گیا واں
اعظم توقیر
٭٭٭٭٭٭
آپ کو آگ بجھانے کے لیے بھیجا تھا
آپ نقصان کی تفصیل اٹھا لائے ہیں
٭٭٭٭٭٭٭
ہمارے پیروں میں بیڑیاں ہیںملازمت کی
ہمارے وعدے ہماری چھٹی سے منسلک ہیں
لطیف ساجد
٭٭٭٭٭٭٭
رات ھنیری تارے کوئی نہیں
ڈونگھے پیر کنارے کوئی نہیں
جِت جاواں دے اگلی واری
ہارے آں پر ہارے کوئی نہیں
طاہر ہاشمی
٭٭٭٭٭٭
کنڈیاں نال یرانہ لا کے ویکھ لیا
لیراں لیراں سوچ دے بانے ہو گئے نیں
اپنے اندر خواہشوں کی با رہا ترمیم کی
پھر بگڑتے کیوں گئے قسمت کے تیور اور بھی
رائے عابد علی
٭٭٭٭٭٭
بن عملاں دے کم نہیں آندی کوئی وی تدبیر
لکھاں واری بھاویں پڑھیے وارث شاہؒ دی ہیر
سید فراست بخاری
٭٭٭٭٭٭
آ وے ماہی رب ساون لایا
اتوں لہہ پئیاں رم جھم کنیاں
یار یاراں دے کول پئے وسدے
ساڈے دم تے اوکھیاں بنیاں
محمد یوسف یار
٭٭٭٭٭٭
جھوٹھ دا سودا وِکدا اے
اچھا خاصا وِکدا اے
احمد اقبال بزمی
٭٭٭٭٭٭
تیرے پنڈ نوں بس نہیں آئوندی
یار ،سفر دی چس نہیں آئوندی
۔۔۔۔۔۔۔۔۔
توں میرے لئی موہرا بنیا
میں تیرے لئی کھنڈ رہیاواں
احمد علی کیف
٭٭٭٭٭٭
میں منطقہ غم ہوں، آلام کا مسکن ہوں
رنج آب و ہوا میری دُکھ رقص کناں مجھ میں
سلمان رسول
٭٭٭٭٭٭
بھاویں لو نہ مانن دے
بھورا کوں تے چانن دے
چُپ کر بولن دے اوہنوں
چُپ کر ذات پچھانن دے
نصیر احمد
٭٭٭٭٭٭
ہتھاں وچ بس تالی ریہہ گئی
کجلے دی اکھ خالی ریہہ گئی
لوکاں شہر وسا لئے اینے
ویہڑے وچ بس ٹاہلی ریہہ گئی
مشتاق قمر
٭٭٭٭٭٭
پباں بھار ای چل کے عمر گزاری اے
دکھاں تے میں رل کے عمر گزاری اے
ویلے دی اس بھکھدی ریہندی بھٹھی اندر
لوہے وانگوں گل کے عمر گزاری اے
وحید ناز
٭٭٭٭٭٭
سوج ڈھا ل کے چانن کرنا پیندا اے
دیوا گال کے چانن کرنا پیندا اے
اوہد ی یاد نوںگھر دا رستہ دسن لئی
نھیرا بال کے چانن کرنا پیندا اے
جی اے نجم
٭٭٭٭٭٭
عشق تمے توں کوڑا ہندا
لوکی وانگ شہد دے چکھدے
ہجر فراق دے ناگ زہریلے
لوکی سانبھ سانبھ کے رکھدے
جی ایم ساقی
٭٭٭٭٭
شہباز کیہ زرداری نے
پیار وفا توں عاری نے
کرسی دے پجاری نے
سارے لوک مداری نیں
اسلم شوق
٭٭٭٭٭
ہاسا لکھ کے گھوری پڑھیا
کنا غیر ضروری پڑھیا
میم محبت ہووے گی
میم توں میں مزدوری پڑھیا
افی گجر
٭٭٭٭٭
توں لائے جہڑے دوستا
اوہ پھٹ سیندا پھرنا واں
زہر تیری جدائی والا
میں پیندا پھرنا واں
وارث گگوی
٭٭٭٭٭
مشاعرہ دے صدر دے پڑھن توں پہلاں مدثر اقبال بٹ ہوراں مائیک تے آ کے سارے پنجابی پیاریاں دا شکریہ ادا کیتا تے نالے اوہناں آکھیا کہ پنجاب ہائوس سارے پنجابیاں دی اپنی بیٹھک اے ،کوئی وی پنجابی پیارا جدوں چاہوے ایتھے کوئی وی تقریب رکھے اسیں اوہنوں جی آئیاں نوں آکھاں گے تے سیوا وی کراں گے۔
