پِلاک ایوارڈز دی تقریب تقسیم انعامات

پنجاب انسٹیٹیوٹ آف لینگوئج’ آرٹ اینڈ کلچر (پلاک)’ محکمہ اطلاعات و ثقافت پنجاب دی چھتر چھاویں2021 وچ شائع ہون والی پنجابی کتاباں اتے ”پلاک ایوارڈ” دی تقریب تقسیم انعامات دا پربندھ کیتا گیا جہدے وچ نثری’ شعری’ تحقیق/تنقید دے شعبہ وچ بہترین کتاباں اتے اول’ دوم تے سوم آن والی کتاباں دے لکھاریاں نوںبالترتیب اک لکھ50 ہزار تے 30ہزار روپے دے نقد انعامات نال نوازیا گیا۔ ایس تقریب
دے اُچیچے پروہنے مدثر اقبال بٹ’ الیاس گھمن تے غلام حسین ساجد سن۔
نثری ادب وچ پہلا انعام شہزاد اسلم (دریاواں دے ہانی) تے زاہد حسن (کہانی اِک ماں دی) نوں مشترکہ طور تے دتا گیا۔ دوجا علی انور احمد (دوجی غلطی تے ہور کہانیاں) تے ڈاکٹر عرفان پاشا (”پرتن” کہانیاں) جدکہ تیسرا آکاش (اوم پریم کٹیا) نے حاصل کیتا۔ ایسے طرحاں شعری ادب وچ پہلا انعام اِرشاد سِندھو (تارا تارا کھیڈے) تے عامر سہیل (پندھ ہرن دی چوکڑی) نوں دتا گیا۔ دوجا شفقت حسین (کون کوئیاں دے جوڑ) تے تیجا پروین سجل (جاچڑ) نے حاصل کیتا۔ تحقیق/ تنقید دے شعبہ وچ پہلا انعام ڈاکٹر ارشد محمود ناشاد (مڈھلی پنجابی گرامر) تے مدثر بشیر (مسیتاں)، دوجا ثوبیہ اسلم (سیف الملوک ”مولے شاہ”) تے صغیر تبسم (اَساں چپ نہیں وَٹنی دھرتی تے) جدکہ تیجا ڈاکٹر نگہت خورشید (پنجابی ریڈیو ڈرامہ) نے حاصل کیتا۔
نثری ادب دے مُنصفین وچ ڈاکٹر حنیف چوہدری، ڈاکٹر محسن مگھیانہ تے ڈاکٹر کرامت مغل شامل سن۔ شعری ادب وچ غلام حسین ساجد، ڈاکٹر ارشد اقبال ارشد تے راجا نیّر شامل سن۔ایسے طرحاں تحقیق/ تنقید دے شعبہ وچ ڈاکٹر مجاہدہ بٹ، ڈاکٹر ریاض شاہد اور ڈاکٹر عبدالرزاق شاہد شامل سن۔
ایس موقعے تے مدثر اقبال، الیاس گھمن تے غلام حسین ساجد نے اظہار خیال
کردیاں ہوئیاں آکھیا کہ پنجابی زبان و ادب دے لکھاریاں وچ پلاک ولوں انعامات دا سلسلہ اک خوش آئند گل اے۔ ایس نال پنجابی زبان’ فن تے ثقافت نوں فروغ ملے گا۔ اوہناں آکھیا کہ ماں بولی نوں عزت دینا انج اے جیویں تسیں اپنے ماں پیو نوں عزت دے رہے او۔ شعبہ تعلیم وچ چار ہزاردے کول پنجابی زبان دے استاداں دی اسامیاںشامل کیتیاںگئیاں نیں۔ ایس دے علاوہ اوہناں آکھیا کہ پنجابی زبان نوں پرائمری سطح اتے لاگو کیتا جاوے۔ ڈائریکٹر پلاک محمد عاصم چودھری نے دسیا کہ ایس توں پہلاں پنجابی زبان و ادب دے لکھاریاں نوں 2017-18 وچ انعامات دتے گئے۔ ایہدے مگروں فنڈ نہ ہون کارن ایہہ سلسلہ تعطل دا شکار رہیا۔ ہن انشاء اللہ انعامات دا ایہہ سلسلہ سالانہ بنیاداں اتے جاری رہوے گا۔ ڈائریکٹر جنرل پلاک ڈاکٹر صغرا صدف نے انعامات حاصل کرن والے سارے لکھاریاں نوں مبارکباد پیش کیتی تے آکھیا کہ پنجابی دانشوراں دی سفارشاں اتے عمل کرن دی بھرواں کوشش کیتی جاوے گی۔ اوہناں نے معزز پروہنیاں نوں پھلاں دے تحفے وی پیش کیتے۔