بجلی دی قیمتاں وچ استحکام یقینی بنان دی کوشش کر رہے آں: وزیراعظم

اسلام آباد: وزیراعظم عمران خان دا کہنا اے سرکار دی کوشش اے کہ بجلی دی قیمتاں وچ استحکام نوں یقینی بنایا جاوے۔ وزیراعظم عمران خان دی زیر صدارت بجلی دی قیمتاں وچ ممکنہ کمی لیان دے حوالے نال اعلیٰ سطح دا اجلاس ہویا جہدے وچ وزیر برائے منصوبہ بندی اسد عمر، وزیر برائے توانائی عمر ایوب، وزیر برائے بحری امور سید علی حیدر زیدی، مشیر خزانہ ڈاکٹر عبدالحفیظ شیخ، معاون خصوصی ندیم بابر تے متعلقہ وفاقی سیکرٹری صاحبان تے دوجے سینئر افسراں نے رلت کیتی۔

اجلاس وچ بجلی دی قیمتاں وچ ممکنہ کمی لیان دے حوالے نال وکھو وکھ تجاویز تے غور کیتا گیا جد کہ وزیراعظم نے اجلاس نال خطاب کردیاں آکھیا توانائی دا شعبہ ملکی معیشت دی ترقی وچ کلیدی اہمیت دا حامل اے، صارفین تے صنعتاں نوں مناسب قیمت تے بجلی دی فراہمی، توانائی دے شعبے وچ اصلاحات تے ایہدے وچ ہون والے نقصانات تے قابو پانا سرکار دی اولین ترجیح اے۔

وزیراعظم عمران خان آکھیا ماضی دی حکومتاں ولوں کیتے جان والے معاہدیاں، ویلے سر انتظامی اصلاحات نوں پس پشت پان تے رسیل و تقسیم دے شعبے وچ ہون والے نقصانات نوں نظر انداز کرن نال توانائی دے شعبے وچ اج وکھو وکھ چیلنجز دا ساہمنا اے تے ایہدا سارا بھار عوام نوں برداشت کرنا پے رہیا اے۔ وزیراعظم دا کہنا سی سرکار اک توں 300یونٹاں تک استعمال کرن والے صارفین تے کمزور طبقے نوں ممکنہ حد تک ریلیف فراہم کر رہی اے پر ایہناں نوں عوام دی مشکلات دا بخوبی اندازہ اے۔