14اگست

عقیل شافی

ڈھڈوں بھُکھے حالوں مست
فیر وی منائیے چودہ اگست
چھتاں تے لاون لوکی جھنڈے
ٹوکری دے وچ مُکے گنڈھے
ہر دم ویلا لنگھدا سخت
فیر وی منائیے چودہ اگست
بے بے دے ہتھ خالی باٹا
اسی روپیے کلو آٹا
ساڈے جاگے سُتے بخت
فیر وی منائیے چودہ اگست
گودی چُکیا رووے کاکا
سُن کے ایٹم بم دھماکہ
پے گیا ساڈی جان نوں وخت
فیر وی منائیے چودہ اگست
مہنگائی نے توڑیا لک
ڈُب گئے سارے نکوں نک
آپو دھاپ دا آیا وقت
فیر وی منائیے چودہ اگست
کشمیر دا مسئلہ حل نہیں ہویا
دماغ وزیراں ول نہیں ہویا
دشمن نال ملاندے دست
فیر وی منائیے چودہ اگست
افسر بن گئے آکے باکے
خون خرابہ چوری ڈاکے
شافی دیس وچ پے گیا وخت
فیر وی منائیے چودہ اگست