غزل
سلیم نجمی
میرے دیس دی ویکھ لوکائی ہر پاسے
پائوندی پھردی حال دُہائی ہر پاسے
کہڑی کہڑی شے نوں ڈکا لائیے جی
مہنگائی نے ات اے چائی ہر پاسے
حاکم تیری سوچ توں صدقے جاواں میں
ساری خلقت کنج رلائی ہر پاسے
خشحالی دے خاب وکھ کے سبھناں نوں
چٹے دن توں لٹ مچائی ہر پاسے
اپنے ڈھڈ ودھا لَے سبھ وزیراں نیں
روندی دنیا نظریں آئی ہر پاسے
رشوت خور تے کنج کنج رسا گیراں نیں
اپنی اپنی کھیڈ رچائی ہر پاسے
نجمی یارا لے کے ناں تبدیلی دا
ہوندی پئی اے نت لڑائی ہر پاسے
