غزل
انور ندیم علوی
عشق دا سودا ترکڑی نال تے تلیا نہیں
ویکھ لوو منصور سولی تے وی چپ رہندا نہیں
ویلے دے فرعون ویکھے نیں تے میں ہاماں وی
کالیاں راتاں نوں چانن میں کدے لکھیا نہیں
غم دا بدل ٹٹ کے تے اس دل تے ورھیا سی کدی
صبر دا دریا کنارے توں مگر رڑھیا نہیں
سوچ دے ویہڑے دے وچ اڈدے نیں جگنو پیار دے
دور اے میتھوں بڑا ای پر مینوں بھلیا نہیں
سچ دی خاطر کوئی سولی تے وی ٹنگ دیوے ندیم
سامنے باطل دے ہر گز سر مرا جھکدا نہیں
