شہباز شریف پارلیمان توں تنخواہ لے رہے نیں پر کم نہیں کر رہے: فردوس عاشق

اسلام آباد: وزیراعظم دی معاون خصوصی برائے اطلاعات و نشریات فردوس عاشق آکھیا اے قومی اسمبلی وچ قائد حزب اختلاف شہباز شریف پارلیمان توں تنخواہ لے رہے نیں پر کم نہیں کر رہے۔ فردوس عاشق اعوان نے ٹویٹ کردیاں آکھیا شہباز صاحب تسیں پارلیمان توں تنخواہ لے رہے او پر کم نہیں کر رہے، قوم دے بالاں دے وسائل تے ڈاکہ پان والے عدالت توں چھٹی لے کے بیرون ملک اولاد دے وسائل ودھان وچ مصروف نیں، بیرون ملک بیٹھ کے بیان داغن تے کیوں اکتفا کر رہے نیں؟ تسیں پاکستان آن توں کیوں گریزاں او؟ فردوس عاشق اعوان دا کہنا سی ”تمہی نے درد دیا کیا تمہیں دوا دو گے” دے مصداق عوام نوں مسئلیاں دی دلدل وچ دھرون والیاں دے منہ توں ایہناں دے حل دی گل قوم دے نال اک کھلا مذاق اے۔

معاون خصوصی آکھیا شہباز شریف دا حکومت تے تنقیدی بیان اوہناں دے اپنے دور دی کہانی اوہناں دی زبانی اے۔ تہاڈے دور دے بند کارخانے عوام دے ذہناں تے اجے نقش نیں جد کہ وزیراعظم عمران خان بند صنعت دا پہیہ چلا رہے نیں۔