ڈاکٹر اختر شمار دی ” اختر شماریاں”

اس کے نزدیک غمِ ترک وفا کچھ بھی نہیں
مطمئن ایسا ہے وہ جیسے ہوا کچھ بھی نہیں
کل بچھڑنا ہے تو پھر عہد وفا سوچ کے باندھ
ابھی آغازمحبت ہے گیا کچھ بھی نہیں
ایسے بہت سارے شعراں دے خالق’ خشبو نال معطر’ باد نسیم دے نرم جھونکیاں وچ لپٹے’ زبان و بیان تے اسلوب تازہ دے نال عمیق مشاہدات’ نازک احساسات’ تلخ تے شیریں تجربات تے شدت جذبات نوں شعری قالب وچ ڈھالن تے مکمل دسترس رکھن والے ڈاکٹر اختر شمار 17اپریل 1960 نوں راولپنڈی دے پنڈ سہال چکری وچ محمد اکبر خاں دے ہاں پیدا ہوئے۔ والدین نے اوہناں دا نام محمد اعظم خان رکھیا لیکن اوہناں نے عظمت دے پیدائشی تصور نوں قبول نہ کیتا تے اپنی قسمت آپ بنان لئی اختر شماری شروع کر دتی۔
ایسے اختر شماری توں اوہناں دے اندر شاعر نمودار ہو گیا۔ شعرو سخن وچ اوہناں نے استاد شاعر بیدر حیدری توں تربیت پائی۔ خالد علیم دسدے نیں کہ ڈاکٹر اختر شمار اپنے عہد دے ہم عصر شاعراں وچ ممتاز شاعر سن۔ اوہناں دے والد گرامی بہت عرصہ تک ملتان وچ آباد رہے تے ڈاکٹر اختر شمار نے بی اے تک تعلیم ملتان وچ حاصل کیتی جد کہ ایم اے اردو اسلامیہ یونیورسٹی بہاولپور توں کیتا تے اوہدے مگروں اپنے درس و تدریس دا آغاز گورنمنٹ کالج قصور توں کیتا۔
مگروں گورنمنٹ کالج لہور توں ہوندے ہوئے ایف سی کالج تک پہنچے تے حیدر دہلوی’ احوال و آثار دے عنوان نال مقالہ لکھ کے پی ایچ ڈی دی ڈگری حاصل کیتی۔ ترقی دے اگلے زینے اتے پہنچے تے ایف سی کالج لہور وچ شعبہ اردو دے چیئر پرسن دے طور تے کم کرن لگے۔ ایس توں پہلاں جامعہ الازہر (مصر) وچ پڑھاندے رہے تے چیئرمین ادبیات اردو’ عین الشمس یونیورسٹی (مصر) وی رہے۔ 80 دی دہائی وچ جدوں ملتان توں شہر لہور وچ سکونت اختیار کیتی تے اوہناں دی ساہواں وچ اولیا دی سرزمین دی محبت تے اپنے شہر دی خشبو اوہناں دی رگ رگ وچ وسدی ہوئی سی۔
آج بھی رگ رگ میں ہے تیرے شہر کی گرمی
اپنے لہو میں ہم ملتان لیے پھرتے ہیں
ڈاکٹر اختر شمار نے درس و تدریس’ شاعری توں مشاعریاں دے سٹیج تے کالم نگاری تک لمی مسافت طے کیتی۔ ایس دوران اوہ تجربات تے مشاہدات دی جہناں دنیاں توں گزرے’ نال گہرے ادبی مطالعے نے ذہن نوں جہڑی بلند آہنگی تے وسعت بخشی۔ اوہناں دے شعری سفر دی ابتدا 1984 وچ ہائیکو روشنی دے پھل پیش کرن توں ہوئی۔ اوہناں دے دوجے شعری مجموعے روشنی کے پھول’ کسی کی آنکھ ہوئے ہم’ یہ آغاز محبت ہے’ جیون تیرے نام ہمیں تیری تمنا ہے،آپ سا کوئی نہیں’ اور تم ہی میری محبت ہو’ مادری زبان میں اکھیاں دے وچ دلاور میلہ چار دیہاڑے شائع ہو ئیاں۔ اوہناں دی نثر نگاری نوں ویکھو تے مسلم تہذیب و فکر کا مطالعہ’ پنجابی ادب رنگ’ بھرتری ہری ایک عظیم شاعر’ میں بھی پاکستان ہوں’ ہم زندہ قوم ہیں’ ویلے دی اکھ’ دنیا مسافر خانہ اے’ خطوں میں دفن محبت’ آداب خود آگاہی’ موسی سے مرسی تک’ لاہور کی ادبی ڈائری’ جی بسم اللہ جیئی شاندار کتاباںشامل نیں۔ ڈاکٹر صاحب زندہ دل’ محبت پرور تے رومانٹک بندے سن۔ ڈاکٹر محمد اجمل نیازی دا اک جملہ یاد آ رہیا اے کہ رومانٹک بندا ای اصل وچ انقلابی بندا ہوندا اے۔ اوہ جدوں محبت دے مرحلے توں لنگھدے نیں تے اپنی اکھاں توں بہندے اتھرو نوں ستارے وانگوں ویکھدے تے اپنے مسیحا نال دل بیمار دی حالت اتے اک نظر پان تے دیر نہیں کردے۔
اک نظر ڈال کبھی میرے مسیحا مجھ پر
تیرا کیا جائے گا بیمار کو اچھا کر کے
اے محبت کے مراحل سے گزرنے والے
تو نے آنسو کبھی دیکھا ہے ستارہ کر کے
اوہناں دا اک ہور اہم حوالہ صحافت سی۔ لہور تے دوجے شہراں دے ادبی اخبار تے رسالیاں وچ کم کرن دے علاوہ اوہناں نے اک ادبی جریدہ بجنگ آمد دے نام توں جاری کیتا جہدے وچ ادب تے سیاست نوں وی اک نال شامل کیتا گیا۔ انج ایس طرح ادبی جریدہ نگاری وچ سیاسی رنگ دین دا اعزاز وی ڈاکٹر اختر شمار نوں حاصل ہویا۔ اک زمانے وچ ڈاکٹر اختر شمار نے لہور دے دو مشہور ادبی گروہواں دی جنگ نوں ایس پرچے وچ خصوصی اہمیت دتی لیکن اپنی غیر جانبداری اتے حرف نہ آن دتا۔
اوہناں نے اپنے اداریاں وچ ادبی گروہ بندیاں دی ہمیشہ مخالفت کیتی تے خود نوں وی کسے ادبی گروہ دا حصہ نہیں بنن دتا۔ ملک مقبول احمد اپنی کتاب مشاہیر ادب وچ لکھدے نیں کہ اوس دور وچ اوہناں دی غزل فنون تے ورقیاں وچ شائع نہیں ہوئی جد کہ اوہناں دے تعلقات احمد ندیم قاسمی توں وی عقیدت مندانہ سن تے اوہ ڈاکٹر وزیر آغا نوں اردو ادب دا عظیم ادیب وی تسلیم کردے رہے نیں۔
ڈاکٹر اختر شمار دا شمار پاکستان دے اوہناں مقبول تے مشہور شاعراں وچ رہیا جہڑے مشاعریاں وچ کلام پڑھن تے سامعین دا دل جتن دا فن جاندے سن۔ ایہہ آکھنا وی بے جا نہیں ہووے گا کہ اوہ اپنی شاعری تے پڑھن دے انداز نال پاکستان تے دنیا دے ہر اوس ملک وچ پسند کیتے جاندے سن جتھے جتھے اردو تے پنجابی بولی سمجھی جاندی اے۔ ملاقاتاں دا احوال بیان کردے ہوئے نوید صادق دسدے نیں کہ ڈاکٹر اختر شمار میرے بہت کول رہ چکے نیں۔اوہناں نال اکثر ملاقات رہندی۔ اوہناں نال میرا تعلق 1991 توں جڑیا تے کسے نہ کسے صورت قائم رہیا۔ پچھلے اٹھ سال وچ جدوں لہور وچ شفٹ ہویا تے اوہ میرے بہت کول رہے۔ ایتھے اوہناں نال ملاقاتاں دا سلسلہ ہور ودھیا۔ ڈاکٹر صاحب بہت مخلص دوست تے باکمال شاعر سن۔
اوہناں دی کلیا ت اختر شماریاں اتے اوہناںتوں عیدالاضحی دے موقعے تے میرا پلان بن رہیا سی کہ اوہدی تعارفی تقریب دا پربندھ کیتا جاوے مگر اللہ تعالیٰ نے ہور اوہدی مہلت نہ دتی۔ اوہ غزل’ نظم تے پنجابی شاعری دے نال نال حمد و نعت بہت عمدہ کہندے سن۔ا وہناں دے ہاں صوفیانہ آہنگ جہڑا اے اوہناں دی شاعری وچ اوہو اوہناں دی نثری تحریراں وچ وی ملدا اے۔ اک چنگے دوست دے وچھڑ جان دے صدمے توں اجے تک باہر نہیں آئے۔ اوہناں دی کلیا ت اختر شماریاں نوں شاعر علی شاعر نے اپنے اشاعتی ادارے رنگ ادب توں شائع کر کے اپنی ادب دوستی دا ثبوت دتا۔
یا مجھ کو اپنے پاں پر گرنے سے روک دے
یا میری لغزشوں کو عبادت شمار کر
5اگست نوں فیس بک اتے اوہناں دے بیمار ہون دی خبر پڑھی تے فوراً میں نوید صادق نوں کال کیتی تے اوہناں دی طبیعت دریافت کیتی تے پتہ چلیا اوہ آئی سی یو روم وچ نیں۔ اوہناں دی صحت یابی لئی دعا کرو۔ اوہ دن گزرن مگروں فیس بک اتے پوسٹ ویکھی کہ ہائے ڈاکٹر اختر شمار ایس المناک خبر نوں پڑھ کے میں نم دیدہ جیا ہو گیا کہ اجے اسیں قائم نقوی دا غم نہیں بھلے ساں کہ ایس غم توں پوری ادبی دنیا وچ صف ماتم وچھ گئی۔ اردو شاعری دے اک عہد دا خاتمہ ہو گیا۔