پنجابی سیوک علی احمد گراتی دی ورھے گنڈھ

علی احمد گجراتی پنجابی زبان تے رہتل دا اک مان جوگ وکھالا اے۔ دن رات پنجابی زبان واسطے کم کردا پنجابی دھرتی دا ایہ سپُتر جتھے ماں بولی دا مان ایں اوتھے ہر پنجابی پیارے دی اکھ دا تارا وی اے۔ اج اوہناں دی ورہے گنڈھ دے موقع تے کجھ مہان پنجابی سیواکاراں ولوں انہاں نوں اچیچا طور تے ودھائی پیش کیتی گئی تے نال نال اوہناں دے کم دی سلاہناں وی کیتی گئی۔

پنجابی زبان دے کامے تے پنجابی سپُتر علی احمد گجراتی ہوراں نوں ڈھیر دعاواں دے نال ورہے گنڈھ تے لکھ لکھ ودھائیاں ڈاکٹر صغرا صدف ڈائریکٹر جنرل پلاک
ماں دھرتی پنجاب دے لجپال پُتر، پنج دریاواں دی شان، ماں بولی دے کامے، پنجابی رہتل دے راکھے، پنجابی ادبی تنظیم دل دریا پاکستان (رجسٹرڈ) دے بانی تے صدر ساڈے ویر علی احمد گجراتی جی نوں ورھے گنڈھ دیاں بہت بہت ودھائیاں ہون۔ رب تہانوں نِت چڑھدی کلا وچ رکھے۔ آمین۔
پنجابی لیکھک پنجابی سیوک ڈاکٹر عامر ظہیر بھٹی۔نمل یونیورسٹی اسلام آباد

علی احمد گجراتی چنگا شاعر تے ہے ای پنجابی سیوک کیا کہنے بابے شریف کنجاہی ہوراں دی دھرتی چوں پنجاب تے پنجابی زبان نال محبت دا اک سورج جہڑا ہر روز نویں ارادیاں نال چڑھدا اے تے ہر روز پنجابی زبان واسطے کُجھ نا کُجھ کردا سلیوٹ پنج پانیاں دی دھرتی دے ایس انکھی پُتر واسطے
پنجابی سیوک پنجابی شاعر حکیم احمد نعیم ارشد شکر گڑھ۔

علی احمد گجراتی سوھنی مہینوال دی دھرتی گجرات دا اوہ طرحدار جوان اے جس دا تصور کردیاں اک خوبصورت گبھرو جٹ دی تصویر زہن چ رقص کرن لگ پیندی اے۔ ایہ خوبرو’ خوش خو تے خوش گلو جوان اک نڈر تے جی دار انسان اے۔ اردو تے پنجابی دوناں زباناں وچ برابر صلاحیت دے نال ودھیا شاعری کردا اے لیکن پنجاب دھرتی دا وسنیک ھون دے ناطے پنجابی زبان تے ادب دا سچا تے سُچّا خدمت گزار وی اے۔ پنجابی زبان تے ثقافت دے فروغ لئی پورے پنجاب وچ متحرک تے فعال نظر آندا اے۔
اس محنتی مستعد سادہ تے پُرخلوص جوان دی فعالیت تے اپنے مقصد نال دیوانہ وار لگن ویکھ کے رشک آندا اے کہ محدود وساٸل ہون دے باوجود موسم دی شدت تے سختیاں جھل کے وی ایہ دن رات دی پرواہ کیتے بغیر مشاعریاں مظاھریاں جلسے جلوساں پنجابی دے حوالے نال ثقافتی پروگراماں تے مباحثاں وچ نہ صرف پرجوش شرکت کردا اے بلکہ اوہناں نوں آرگناٸز وی کردا اے۔ پنجابی زبان دی ترویج تے فروغ لئی دل دریا پاکستان دے ناں نال اک پنجابی تنظیم “دل دریا پاکستان”دا بانی تے صدر وی اے۔ بہت پیارا ہنس مکھ ملنسار تے یار باش انسان اے۔
میری دعا اے کہ پاک پروردگار پنجتن پاک دے صدقے علی احمد گجراتی ورگے حوصلہ مند پُرعزم تے متحرک جوان دی توفیقات تے وساٸل وچ ہور اضافہ فرمائے۔ آمین!
کیونکہ “یہی چراغ جلیں گے تو روشنی ھوگی”۔
ایہ ساڈا حقیقی قیمتی اثاثہ ساڈی سماجی زندگی دی خوبصورتی دا درخشاں حال تے مستقبل اے۔ ایہو جئے گلاب رتاں دے سفیراں دی موجودگی ساڈی ثقافتی روایات دے تسلسل تے بقا دی ضمانت اے۔
شاعر تبسم نواز وڑائچ سرگودھا
ساڈے متر،اُستاد شاعر،ادب پرور تے سُخن شناس،سماجی رہنما،پنجابی سیوک،جناب علی احمد گجراتی ہوراں نوں جمن دیہاڑ دیاں لکھ لکھ ودھائیاں۔۔۔اللہ سوہنا اوہناں دی جھولی عزت، شہرت، صحت تے سلامتی،امن تے آشتی نال انج بھرے کہ اوہناں نوں دامن دی تنگی دا احساس ہووے- پروردگار شیطاناں دی شیطانی تے ظالماں دے ظلم توں محفوظ رکھے- اوہ پنجابی ادب دے راکھے تے پنجابی رہتل دی جان نے-پنجابی شاعر پنجابی سیوک محمد ادریس چیمہ اسلام آباد

علی احمد گجراتی نال پہلی وار شریف کنجاہی ایوارڈ دے پروگرام کنجاہ وچ ملاقات ہوئی ۔علی احمد گجراتی پنجابی زبان دی پہچان اے۔تسی پنجابی نال جڑے ہر پروگرام وچ علی احمد گجراتی نوں اگے ویکھو گے۔ میرے ویر علی احمد گجراتی نوں جنم دیہاڑ دیاں ڈھیر ودھائیاں۔شاعرہ رفعت وحید راولپنڈی

علی احمد گجراتی کسے پنجابی پروگرام وچ میرا جانو بنیا۔پہلی ہی ملنی وچ اوس نال تعلق پیڈا ہو گیا۔علی احمد پنجابی دا اک گبھرو تے سوہنا سیوک اے ۔پنجابی نال جڑے ہر پروگرام وچ نہ چھڑا اپڑ کے حصہ لیندا اے بلکہ حصہ پاندا وی اے۔علی احمد نے تھوڑے جہے ویلے وچ پنجابی واتے چوکھا کم کر پنجاب وچ اپنی چنگی پچھان بنا لئی اے ۔اج علی احمد گجراتی دا جنم دن اے دعا کہ اللہ میاں اس نوں لمی حیاتی دے تاں جے علی اپنے گھر دے نال نال پنجابی دی چوکھی سیوا کر سکے۔ پنجابی لیکھک پنجابی سیوک سلیم رضا ٹھاکر گجرات

مہان پنجابی شاعر، ماں بولی دے اِک وڈے سیوک،جگ دُھمی ادبی تنظیم دل دریاپاکستان دے بانی صدر تے میرے نِکے ویر علی احمد گُجراتی نوں جنم دیہاڑ تے ڈھیر ودھائیاں۔
ماں بولی دے ایس مان تران نوں رب سوہنا لمی حیاتی دیوے۔آمین
لیاقت گڈگور گجرات پنجابی شاعر پنجابی سیوک ۔۔۔۔۔۔
شعری چون وچ ونگی دے طور تے کجھ کلام ویکھو
چھنکی ونگ تے سُتیاں سدھراں جاگ پیاں
سوچاں دی اکھ اُگڑی غزلاں جاگ پیاں

اک جوبن انگڑائی لئی تے دساں کیہ؟
کنِیاں اکھاں دیوچ رُتاں جاگ پیاں

ڈِڈھ دی بھُکھ دا دسیا اک بھیکارن نیں
ذہناں دیوچ کیہ کیہ بُھکھاں جاگ پیاں؟

کِنج دا خاب اج کُچھڑ چکیا نیندر نے؟
اکھ دے متھے تے دو بُلہیاں جاگ پیاں

چن دی چھاویں اپنے ای پرچھاویں نال
گلاں کردی سی پئی،سکھیاں جاگ پیاں

اکھ وچ منظر نچیا تیری نتھلی دا
دل کوہ قاف دے اندر پریاں جاگ پیاں

میل کیہ ہویا ساہنواں دے نال ساہنواں دا
سارے بیلے دیوچ مہکاں جاگ پیاں

۔۔۔۔۔۔۔۔۔۔۔۔۔۔۔۔

مہاتڑ ہاہ دا سیک جو پاٹے بُلہاں تیکر آیا اے
اِنجے سمجھو بھاہ دا شعلہ میحلاں تیکر آیا اے

ایہناں کولوں کھوہ نہیں سکیا فِطری تحفہ چھاواں دا
جیڈا مرضی تپدا سورج رُکھاں تیکر آیا اے

اِک اِک اَکھر وِچوں یارو جوبن ڈُھل ڈُھل جاندا اے
چِلمن چھڈ کے سوہنا سجن غزلاں تیکر آیا اے

دھڑکن اُتے گھوڑے بھجدے سوچاں چڑھیاں نیزے تے
تاں کربل دا خونی نقشہ حرفاں تیکر آیا اے

مٹی وچوں اُگے نیں تے مٹی ورگے ہونے سن
ایہ مالی دا لہو اے جہڑا پُھلاں تیکر آیا اے
ناڑاں وِچوں کنڈے اُگے اکھیاں وچوں ریت کِرے
سسیئے ! تیری موت دا منظر سوچاں تیکر آیا اے

میرے لہو تے جہڑا میرے سینے دیوچ پلدا سی
اتھرو بن کے اوہو صدمہ اکھیاں تیکر آیا اے

ایہ تے فیر اج دل کڑمے دا چاء کوئی سولی چڑھیا اے
بھلیا توں جو سمجھیں اتھر پلکاں تیکر آیا اے

ایہو سوچ کےمرمر جاواں کیہ ورتی اے بندے نوں
اکو ماں تے پیو دا جایا جنگاں تیکر آیا اے

ایدھر جد وی جھاتی ماراں امبر جُھکیا ویہنا واں
بخت مدینے دا ایہ احمدؔ عرشاں تیکرآیا اے۔۔۔۔۔۔۔