غزل

بابا نجمی

اپنی سوچ نوں جہناں دتا تقدیراں دے چکر وچ
ہتھ کدے وی پا نہیں سکدے تعمیراں دے چکر وچ
منزل ولّے میں ٹریا واں سورج لے کے جذبے دا
فر میں کسراں آ سکناں واں راہگیراں دے چکر وچ
میری سوچ عوامی تیرا کنج قصیدہ لکھاں میں
میرے جہے فنکار نہیں آوندے جاگیراں دے چکر وچ
نھیرا آپے دس دیوے گا دیوا کتھے بلدا اے
ٹر تے سہی توں ہمت کر کے تنویراں دے چکر وچ
تیرے وانگ کنوہواں کڈھن توبہ بہہ نہ جاواں میں
مُلاں بہتا پا نہ مینوں تفسیراں دے چکر وچ
بابا اج سنا کے سفنا دھی نے رنگلے محلاں دا
سوچ مری نوں پا دتا اے تعبیراں دے چکر وچ