پرائڈ آف پنجاب

ہر ملک’ قوم تے تہذیب دے کجھ مخصوص تہوار ہوندے نیں جہڑے اوتھے دے واسیاں نوں رل بیٹھن دا موقع دیندے نیں۔ ایہناں تہواراں توں جتھے باہمی رسم و رواج نوں فروغ ملدا اے اوتھے ای معاشرے وچ مثبت رجحانات جنم لیندے نیں مگر ایہناں تہواراں دے علاوہ وی کجھ ایسا اے کہ جہڑا اک قوم تے ملت نوں آپس وچ جوڑدا اے تے اوتھے رہن والیاں نوں قریب لیاندا اے تے ایہہ ساڈے کھیڈ نیں جہڑے حالات یا موقع جیسا وی ہووے قوم نوں ناصرف ہمت تے امنگ دیندے نیں بلکہ دنیا وچ ملک دا نام روشن کرن دا کارن وی بندے نیں۔ اک عرصے تک پاکستان ہاکی دے میداناں تے سکوائش کورٹس وچ دنیا لئی ناقابل تسخیر بنیا رہیا۔ کرکٹ دے میداناں وچ فتح یاب رہیا۔ سنوکر دے عالمی کپ دا تاج وی پہنیا مگر فیر ہولی ہولی جتھے ملک معاشی’ سیاسی تے سماجی لحاظ نال پستی دا شکار ہوندا گیا’ ملک وچ ات گردی نے میداناں نوں اجارد تا’ حکومتی عدم توجہی کارن بہت سارے کھیڈاں توں پاکستان دا نام تک نکل گیا۔ جدوں ملک وچ عمران خان دی حکومت آئی تے اوہناں نے آندے ای ملک وچ اجڑے ہوئے ویران میداناں نوں دوبارہ توں آباد کرن دا پلان بنایا جہدے مگروں دوبارہ پاکستان کھیڈ دے میداناں وچ سرخرو ہون لگیا۔ کرکٹ دے میدان ہون یا فیر کامن ویلتھ گیمز وچ جتے سونے دے تمغے جہناں وچ پچھے کئی پچھلے سالاں دی محنت شامل کار سی۔
جتھے حکومتی عدم توجہی کھیڈاں وچ قومی تنزلی دا کارن بنی اوتھے ہن حکومت پنجاب نے ناصرف کھیڈاں دی سرپرستی کرن دا اعادہ کیتا بلکہ ماضی وچ پاکستان روشن کرن والے نامور کھیڈاریاں نوں حکومت پنجاب ولوں خصوصی ایوارڈ وی دتے گئے۔ ایہناں ایوارڈاں نوں پرائڈ آف پنجاب دا ناں دتا گیاتے جہدی پروقار تقریب نشتر پارک سپورٹس کمپلیکس وچ پچھلے دناں واقع ہوئی جہدے وچ موجودہ تے ماضی دے نامور کھیڈاریاں نے رلت کیتی۔ ایس تقریب وچ وزیراعلیٰ پنجاب چودھری پرویزالٰہی نے کامن ویلتھ گیمز وچ گولڈ میڈلز حاصل کرن والے نیزہ باز ارشد ندیم ‘ ویٹ لفٹر نوح دستگیر بٹ’ سنوکر چیمپئن احسن رمضان نوں پرائیڈ آف پنجاب ایوارڈ تے 20,20لکھ روپے کیش انعام دتا۔ سلور میڈل حاصل کرن و الے ریسلر انعام بٹ’ طاہر شریف زمان انور نوں پرائیڈ آف پنجاب تے 10,10لکھ روپے انعام نال نوازیا گیا۔ وزیراعلیٰ چودھری پرویزالٰہی نے برانز میڈلز حاصل کرن والے ریسلر علی اسدنوں 5لکھ روپے تے پرائیڈ آف پنجاب ایوارڈ تا۔ وزیراعلیٰ نے اکرم ساہی’ممتاز پچھلے کبڈی پلیئر ارشد ستار’ بیڈمنٹن پلیئرز زرینہ وقار’ پچھلے اتھلیٹ عبدالخالق مرحوم نوں لائف ٹائم اچیومنٹ ایوارڈ نال نوازیا تے 5,5لکھ روپے انعام دتا۔ عبدالخالق مرحوم دا ایوارڈ تے کیش انعام اوہناں دے پتر نے وصول کیتا۔ وزیراعلیٰ نے 1954 دے منیلا ایشین گیمز وچ پاکستان دا پہلا گولڈ میڈل حاصل کرن والے اتھلیٹ دین محمد نوں اوہناں دی نشست اتے جا کے گولڈ میدل پیش کیتا تے 5لکھ روپے انعام دتا۔ وزیراعلیٰ چودھری پرویزالٰہی نے خاتون اتھلیٹ شبانہ اختر نوں وی انعام دین دا اعلان کیتا۔ وزیراعلیٰ دی کھیڈاں وچ خصوصی دلچسپی دی وجہ نال اوہناں نے ہدایت دتی کہ ارشد ندیم دے علاقے میاں چنوں وچ اتھلیٹس سٹیڈیم وی قائم کیتا جاوے گا۔ ایس موقع تے وزیراعلیٰ چودھری پرویزالٰہی تے ملک تیمور مسعود نوں پنجاب دی روایتی پگ پوائی گئی۔ صوبائی وزیر کھیڈ ملک تیمور مسعود’ صوبائی مشیر اطلاعات عمر سرفراز چیمہ’ چیف سیکرٹری کامران افضل’ سیکرٹری سپورٹس علی جان’ ڈی جی پنجاب سپورٹس بورڈ’ اراکین اسمبلی تے متعلقہ حکام وی ایس موقع تے موجود سن۔ صوبے دے دوجے علاقیاں وچ کھیڈاں دے فروغ لئی وزیراعلیٰ پنجاب چودھری پرویزالٰہی نے گوجرانوالہ ‘ لہور’ ملتان سنے 4 شہراں وچ پہلواناں لئی جم تے کمپلیکس بنان دا اعلان کیتا۔ ایس دے علاوہ اوہناں نے وڈے اداریاں نوں کھیڈاں نوں فروغ دین لئی کھیڈاں نوں فروغ دین لئی کھیڈاریاں نوں ملازمتاں دین دا آکھیا تاں جے اوہ روزگار توں بے فکر ہو کے کھیڈ سکن۔ ایسے موقعے تے کرکٹ دے میچاں دے دوراں شہریاں نوں گھٹ کرن تے سکیورٹی اتے حکومتی اخراجات نوں گھٹ کرن لئی وزیراعلیٰ پرویزالٰہی نے قذافی سٹیڈیم دے نزدیک اک ارب ڈالر نال 25منزلہ کمپلیکس تعمیر کرن دا اعلان کیتا۔ا یس نویں کمپلیکس وچ پنجاب گورنمنٹ 30فیصد تے 70 فیصد متحدہ عرب امارات دی حکومت دا حصہ ہووے گا۔ کھیڈاریاں دے سٹیڈیم آن جان لئی زیر زمین ٹنل بنائی جاوے گی۔ جدید کمپلیکس بنن نال کرکٹ دے میچ دبئی دے بجائے لہور وچ کرانا آسان ہووے گا۔ اوہناں نے وعدہ کیتاکہ آئندہ حکومت پنجاب سپورٹس دے شعبے نوں نظرانداز نہیں کرے گی۔ ایہدے نال نال وزیراعلیٰ چودھری پرویزالٰہی نے پاکستان دے پہلے گولڈ میدلسٹ اتھلیٹ دین محمد نوں گھر دین دا اعلان کیتا۔ وزیراعلیٰ نے سنوکر چیمپئن احسن رمضان نوں 10لکھ روپے دی سنوکر ٹیبل دین دا وی اعلان کیتا۔ اللہ کرے کہ چودھری پرویزالٰہی اِنج ای کھیڈاں نال اپنا لگائو قائم رکھن تے صوبے بھر دے سارے میداناں نوں آباد کرن تاں جے نوجوان نسل مثبت سرگرمیاں وچ مشغول ہووے تے ملک و قوم دا نام روشن کرے۔