بانی پاکستان قائداعظم محمد علی جناح اک عظیم شخصیت

بانی پاکستان قائداعظم محمد علی جناح دا پیدائشی نام محمد علی جناح بھائی سی۔ اوہ 25دسمبر 1876نوں پیدا ہوئے۔ اوہ اپنے ویلے دے اک نامور وکیل’ سیاست دان سن۔ قائداعظم محمد علی جناح 1913 توں لے کے پاکستان دی آزادی 14 اگست 1947 تک آل انڈیا مسلم لیگ دے سربراہ رہے۔ فیر قیام پاکستان مگروں اپنی وفات تک’ اوہ ملک دے پہلے گورنر جنرل رہے۔ سرکاری طور تے پاکستان وچ اوہناں نوں قائداعظم یعنی سب توں عظیم رہبر تے بابائے قوم یعنی قوم دا پیو وی آکھیا جاندا اے۔
جناح دا اپنے بھین بھراواں وچ دوجا نمبر سی۔ اوہناں دے تن بھرا تے تن بھیناں سن جہناں وچ فاطمہ جناح وی شامل سن۔ اوہناں دے والدین گجراتی زبان بولدے سن جد کہ بچے کچھی زبان تے انگریزی وی بولن لگے سن سوائے فاطمہ جناح دے’ جناح دے باقی بھین بھراواں دے متعلق گھٹ ای معلومات دستیاب نیں جیویں کہ اوہ کتھے رہے تے یا کدی اوہ جناح دے وکالتی تے سیاسی میدان وچ کامیابیاں دے دوران وچ اوہناں نال ملے وی یا نہیں؟ لڑکپن وچ جناح اپنی خالہ دے ہاں ممبئی وچ وی کجھ عرصہ رہے سن جتھے شاید اوہ گوکال داس تیج پرائمری سکول وچ پڑھے۔ مگروں اوہناں نے کیتھڈرل اینڈ جان کینون سکول وچ تعلیم حاصل کیتی۔ کراچی وچ اوہ سندھ مدرس الاسلام تے کرسچن مشنری سوسائٹی ہائی سکول وچ داخل رہے۔
اوہناں نے میٹرک جامعہ ممبئی دے ہائی سکول توں کیتا۔ اوہناں دے اگلے سالاں بالخصوص اوہناں دی وفات مگروں بانی پاکستان دے لڑکپن دے حوالے نال کئی کہانیاں گردش کردیاں رہیاں جیویں اوہ اپنے فراغت دے اوقات پلس سٹیشن وچ قنونی کارروائیاں نوں ویکھن وچ صرف کردے سن یا اوہ گلی دی روشنی وچ اپنی کتاباں پڑھدے سن جہدی وجہ دوجے ذرائع توں محرومی سی۔ اوہناں دے سرکاری سوانح نگار ہکٹر بولیتھو نے 1954 وچ اوہناں دے کئی لڑکپن دے ساتھیاں دے انٹرویو کیتے۔ اوہناں نے اک کہانی سنائی کہ جناح اپنے ساتھیاں نوں کنچے کھیڈن توں منع کردے سن تے اوہ اوہناں نوں آکھیا کردے کہ اوہ مٹی وچ کنچے کھیڈ کے اپنے کپڑے گندے کرن دی بجائے کرکٹ کھیڈن۔
بانی پاکستان قائداعظم محمد علی جناح 25دسمبر 1876 نوں کراچی وچ پیدا ہوئے سن۔اوہناں نے شروع دی تعلیم ایسے شہر توں حاصل کیتی فیر اعلیٰ تعلیم دے حصول لئی انگلستان تشریف لے گئے جتھے اوہناں نے 1896 وچ بار ایٹ لا دا امتحان پاس کیتا۔ وطن واپس آن مگروں اوہ وکالت دے پیشے نال جڑ گئے تے فیر 1909 وچ مجلس قنون ساز دے رکن منتخب ہوئے۔قائداعظم نے اپنی سیاسی زندگی دا آغاز کانگریس وچ شمولیت توں کیتا’ فیر کجھ عرصہ تک اوہ کانگریس دے نال نال مسلم لیگ دے رکن وی رہے لیکن جدوں اوہناں اتے کانگریس دے انتہا پسند ہندو لیڈراں دے عزائم آشکار ہوئے تے اوہ ہمیشہ ہمیشہ لئی مسلم لیگ دے ہو گئے تے ایس تنظیم دے جھنڈے تھلے برصغیر دے مسلماناں نوں مجتمع کرن وچ مصروف ہو گئے۔
1929 وچ اوہناںنے موتی لال نہرو نوں نہرو رپورٹ دے جواب وچ اپنے مشہور چودہ نکات پیش کیتے جہناں وچ برصغیر دے مسلماناں دے مسائل دا حل تجویز کیتا گیا سی۔ ایہدے مگروں اوہناں نے لندن وچ گول میز کانفرنساں وچ مسلماناں دی نمائندگی کیتی۔ فیر اوہ کجھ عرصے لئی سیاست توںدلبرداشتہ ہو کے انگلستان ای وچ مقیم ہو گئے لیکن جدوں ہندوستان دے مسلماناں نے اوہناں نوں اپنی قیادت لئی آواز دتی تے اوہ اوہدے اتے لبیک کہندے ہوئے وطن واپس آ گئے۔
1937 وچ اوہ آل انڈیا مسلم لیگ دے صدر منتخب ہوئے تے فیر قیام پاکستان تک ایس عہدے اتے فائز رہے۔ 1940 وچ اوہناں دی زیر صدارت لہور وچ تریخی قرارداد پاکستان پیش کیتی گئی جہدے وچ واشگاف الفاظ وچ برصغیر دے مسلماناں لئی اک وکھرے وطن دا مطالبہ کیتا گیا۔ اوہناں دی لمی جدوجہد دے نتیجے وچ ایہہ مطالبہ انگریزاں نے وی تسلیم کیتا تے بالآخر 1947 وچ دنیا دے نقشے اتے اک نویں مسلم ملک پاکستان دا وادھا ہو گیا۔
قیام پاکستان مگروں قائداعظم’ پاکستان دے پہلے گورنر جنرل بنے۔ اوہ پاکستان لئی بہت کجھ کرن دے خواہاں سن لیکن اوہناں دی بیماری نے اوہناں دے تعبیری منصوبیاں نوں پایہ تکمیل تک نہ پہنچن دتا تے مسلمانان پاکستان 11ستمبر 1948 نوں اپنے ایس عظیم رہنما دی قیادت توں محروم ہو گئے۔
پاکستان دے پہلے گورنر جنرل دے طور تے جناح نے اپنی حکومتی پالیسیاںدے قیام لئی کم کیتا نیز اوہناں نے اوہناں لکھاں لوکاں دے بہبود تے آبادکاری لئی وی کم کیتا جہڑے تقسیم ہند مگروں پاکستان ول ہجرت کر چلے سن۔ اوہناں نے اوہناں مہاجر کیمپاں دی ذاتی طور تے دیکھ بھال کیتی۔جناح 71 ورھیاں دی عمر وچ انتقال کر گئے جد کہ اوہناں دے نوزائیدہ ملک نوں سلطنت برطانیہ توں آزاد ہوئے محض اک سال دا عرصہ ہویا سی۔ اوہناں دی سوانح عمری لکھن والے لکھاری’ اسٹینلی وولپرٹ لکھدے نیں کہ اوہ (یعنی جناح) پاکستان دے عظیم ترین رہنما رہن گے۔
اج قائداعظم محمد علی جناح ساڈے وچ نہیں لیکن اوہناں دے افکار تے فرمودات ساڈے لئی مشعل راہ نیں۔