بس ویکھی جائو اگے کیہ کیہ ہوندا اے

کمپیوٹر نوں چنگے کماں لئی ایجاد کیتا سی پر ایہدے نال سرور توں کجھ کم مرضی دے وی لئے جاندے نیں۔ ہر غلط کم ایہدے ذمے لا دتے جاندے نیں۔ انج تے سپریم کورٹ دے پلاٹاں دی قرعہ اندازی کران دی لوڑ نہیں سی۔ جس سیریل نمبر توں وکیلاں نے پیسے جمع کرائے سن اوسے نمبر توں پلاٹ دے دتے جاندے ایس طرح امور تے خدمت تنقید دی زد وچ نہ آندے۔ کمپیوٹر دے سرور نے ایہ چال چل کے اجہے کرداراں نوں ننگا کر دتا اے۔ وڈے ناں تے وڈے قد دے حامل وکیلاں نوں غلط کم کرنا زیب نہیں دیندا۔ قرعہ اندازی لئی وزیر صاحب نوں بٹن دبان لئی لیاندا گیا۔ ہن کہیا جاندا اے کہ ایس قرعہ اندازی دا رزلٹ دبان لئی مولانا صاحب دے محکمے دے تعاون نال ایہ سب کجھ ہویا نہیں تے ایدھر بٹن دبایا اودھر اوہدا رزلٹ ساریاں دے سامنے آ جاندا۔ کمپیوٹر قرعہ اندازی کران والیاں وچ کجھ دے ارادے خراب سن۔ سوچیا ہووے گا کہ غلط کم اسیں کراں گے الزامات ایسے کمپیوٹر تے لگن گے۔ چلو من لینے آں سرور نے غلط کم کیتے پر ایہ کہن دا حق رکھنے آں کہ کمپیوٹر دا ایہ سرور گھٹیا نکلیا جنہے اک مہینے توں ودھ کمپیوٹر دا گلا دبائی رکھیا۔ رزلٹ سامنے نہیں لیاندا سرور توں پچھیا گیا کہ تینوں انج غلط کم کرن دی کیہ لوڑ سی؟ کہیا چنگا نہیں ہویا کجھ انج کرکے پہچانے گئے۔ میرے توں ایہ کم الیکشن جتن دے ناں تے کرایا گیا۔ کجھ دوستاں نوں نوازن نال ووٹ ملن گے اوہناں نوں میں سمجھاندا رہیا انج نہ کرو۔
جزا اور سزا سب یہیں پہ ہو گا ، یہی پہ عذاب و ثواب ہو گا یہی سے اٹھے کا شور محشر، یہی پہ روز حساب ہو گا ۔
مظلوم کمپیوٹر نے کہیا مینوں ایہ کہندے توں اپنی زبان بند رکھ جو اسیں کہنے آں اوہو کردا جا۔ غلام نے کہیا سرگوشی دی میں عاجز آں۔ میرا کم حکم مننا ہوندا اے حکم دین والیاں نے کدی سوچیا نہیں کہ ایہ جو کجھ ایتھے میرے توں کروا رہے نیں اوہدا وی کل حساب ہووے گا تے بے حساب ہووے گا۔ جہناں دے نال زیادتی ہوئی اے اوہدی وی سنی جاوے گی۔ جو پہلے پنجاہ نمبراں تے اکٹھے سن اوہناں نوں شامل ہون والیاں دے نال ملا دتا اوہناں نوں چنگے پلاٹ دوا دتے جہناں نے آخری لمحے پیسے جمع کرائے کہیا سر تسیں ایہناں دی فکر نہ کرو چپ رہو۔ جے مین بلیوارڈ یاں کارنر دا پلاٹ نہیں دتا تے چنگا ہویا ٹریفک دے شور توں بچ گئے۔ قتیل شفائی یادآ گئے:
دنیا میں قتیل اس سا منافق نہیں کوئی
جو ظلم تو سہتا ہے بغاوت نہیں کرتا
کمپیوٹر سرور نے کہیا اسیں تے کئی خونیں رشتے والیاں نوں اکٹھے پلاٹ دتے نیں۔ لہوریاں نوں تے خوب نوازیا اے۔ وڈی شخصیات نوں مین بلیوارڈ تے کارنر دے پلاٹ دتے۔ سرور نے ایہ وی دسیا کہ اپنی مرضی نال کجھ نوں کارنر دے پلاٹ دتے کجھ نوں کارنر کر دتا۔ سرور نے کہیا سپریم کورٹ دے دوجے کماں تے وی گل کیوں نہیں کردے؟ جیویں سپریم کورٹ گروپ سیروتفریح تے جان والے وکیلاں دے گروپ وچ ہائیکورٹ دے وکیلاں نوں وی نال لے کے گئے۔ کدی کدی کجھ نوں اوہو چھڈ آندے نیں۔ ایہ اجیہا اپنی ذات لئی نہیں کردے ایہ ملک دی معاشی حالت دی بہتری لئی کردے نیں۔ سیروسیاحت توں ایتھے زرمبادلہ آندا اے۔ کہیا سرور توں جو گل کھلائے نیں اوہناں تک رہو اوہناں نوں پیار نال مشورہ دتا سی کہ ایہدے وچ قرعہ اندازی کران دی لوڑ نہیں سیریل نمبر دے مطابق پلاٹ دیاں گے تے کوئی شکایت نہیں کرے گا۔
موجودہ بار کابینہ دے کجھ چنگے کم وی نیں۔ ساڈے وکیلاں توں تے سرکاری ملازماں دے افسر چنگے سن جہناں نے وزیراعظم توں قرعہ اندازی کراندے ای رزلٹ ویب تے لا دتا جس دن ہائوسنگ منسٹر صاحب نے قرعہ اندازی دے ناں تے کمپیوٹر دبان نوں کہیا گیا فیر اوسے ویلے اعلان کر دتا کہ ایہدا رزلٹ فارن ٹور بعد کراں گے۔ یاد رہوے اوہناں دا فارن ٹور تے جانا اہم سی یاں وکیلاں نوں چھیتی پلاٹ دینا ضروری سی۔ مولانا صاحب تے اوہناں دے وکیلاں نے وی کمپیوٹر رزلٹ روکن تے ساتھ دتا۔ صدر بار تے سیکرٹری بار ایس ٹور وچ جے نہ جاندے تے قیامت نہیں سی آنی۔ اوہناں نے ایہناں پلاٹاں نوں الیکشن دی نذر کر دتا ایہدے لئی چوداں تریخ 2022ء نوں کنونشن سنٹر وچ شام چار وجے بار دے سینئر صدر نوں پلاٹ لیٹر وزیراعظم دے ہتھوں دوائے گئے۔ اوس دن وی قرعہ اندازی دی لسٹ نہیں لائی گئی جد کہ ہائوسنگ والیاں نے اپنی قرعہ اندازی وچ اوس دن وزیراعظم شہبازشریف توں کرائی تے لسٹ فوراً لا دتی گئی۔وکیل لسٹ نوں اک مہینے دا عرصہ گزرن دے بعد آخری دن تک چھپائی رکھیا۔ جدوں اعلان کیتا تے دو نقشے دی ویڈیوسامنے آئی اک سپریم کورٹ دی تے دوجی محکمہ والیاں دی بہرحال ایہ سب کجھ سرور نے کیتا۔ ایہ تے معصوم ٹھہرے وکیلاں دا غصہ ٹھنڈا نہیں ہو رہیا کجھ قنونی کاروائی کرن دے موڈ وچ نیں۔ دسیا جاندا اے کہ حکمران پارٹی دا پلان ایہ وے کہ متنازعہ الاٹمنٹ لیٹر دے کے فارغ ہو جان تاں جے ایہ رولا پان ‘ احتجاج کرن فیر اسیں رولا پاواں گے کہ ہن کیس عدالت وچ اے اسیں کم نہیں کر سکدے۔٭٭