کیسی بے حسی اے ؟

رقیہ غزل

دنیا بدل رہی اے لیکن پاکستانی سیاست کدی نہیں بدلدی۔ کہن نوں اسیں تریخ دے اہم دوراہے اتے کھڑے ہونے آں لیکن سیاسی ورقیاں وچ کجھ نواں رقم نہیں ہوندا۔ اوہو سیاسی کھینچا تانی جہڑی سالہا سال توں چل رہی اے ایہدا سیاپا ہوندا اے جہدے تے کسے نوں افسوس وی نہیں ہوندا کیوں جے عوام وی اپنے مسائل توں ودھ ایواناں دی راہداریاں وچ ہون والی سازشاں بارے تجسس رکھدے نیں۔جہنوں میڈیائی باوے سیاسی ٹاک شوز وچ ہور ودھا دیندے نیں تے سنگین توں سنگین مسائل نوں وی انج الجھا دیندے نیں کہ اوہ اپنی وقعت گوا دیندے نیں۔ عوامی بے پروائی دا فیدہ سیاسی کاریگر چکدے نیں جہڑے من مانیاں تے نادانیاں کردے ویلے اقتدار گزار دیندے نیں لیکن سمجھ تے فیر آندی اے جدوں ایہہ ریشہ دوانیاں ناقابل برداشت ہوندیاں نیں تے ڈھٹائی رسوائی دا طوق بن جاندیاں نیں نتیجتاً اوہو ہوندا اے جو ہو رہیا اے۔ اک پاسے ماضی دے حکمران مبینہ کرپشن دے الزامات توں بری ہو رہے نیں تے دوجے پاسے تحریک انصاف لائم لائیٹ توں غائب ہور ہی اے۔ سازشی بیانیہ مکمل طور تے بے نقاب ہو گیا اے تے پی ٹی آئی قیادت غصے وچ پچھدی پھر رہی اے کہ وزیراعظم ہائوس دی گل بات لیک کیویں ہوئی تے ایس طرح آڈیوز دا سامنے آنا سکیورٹی اداریاں دی سکیورٹی اتے سوالیہ نشان اے یعنی الٹا چور کوتوال کو ڈانٹے ۔ جہڑے جھوٹے بیانیے نوں لے کے خان صاحب عوام نوں گمراہ کر رہے سن اوہدی حقیقت سامنے آن تے وی کمال ہنرمندی وکھا رہے نیں۔ سانوں تے غالب یاد آ گئے۔
یہ مسائل تصوف یہ تیرا بیان غالب
تجھے ہم ولی سمجھتے جو نہ بادہ خوار ہوتا
ویسے تے سارے گفتار دے ای غازی نیں کہ
دیتے ہیں دھوکہ یہ بازی گر کھلا
لہٰذا پہلاں وی پانامہ لیکس تے وکی لیکس پاروں کوئی فرق نہیں پیا سی تے ہن وی آڈیو لیکس اتے ردعمل ویکھ لوو کہ جہدی آڈیو لیک ہوندی اے اوہ کمال ڈھٹائی نال میڈیائی سوالاں دے جواب وچ ایہہ آکھ کے چلا جاندا اے کہ جتھے ایہنے پھٹ کھادے’ ایہہ پیڑ وی جرجاوو’ بس عوام ای آڈیو لیکس وچ دلچسپی لے رہی اے۔ حالانکہ ایہناں لیکاں نے حکومتی سیٹ اپ وچ ہون والی تبدیلیاں توں یکسر توجہ ہٹا دتی اے تے منہ زور مہنگائی بھلا دتی اے۔ شاید مقصد وی ایہو سی۔ پہلے ارادہ سی کہ میں وی دوجے مبصرین وانگوں آڈیو لیکس اتے لکھاں’ مریم نواز دی بریت نوں سیاست وچ بھونچال قرار دیاں تے آڈیو الیکس نوں سکیورٹی خطرات نال جوڑدے ہوئے لکھاں کہ پاکستان دی سلامتی اتے بڑے سوالیہ نشان اٹھ گئے نیں جیویں سائبر سکیورٹی نے معاملات درہم برہم کیتے۔ ایس طرح ایہہ بڑے نظام خراب کر سکدا اے لیکن فیر خیال آیا کہ جو وی آڈیو لیکس ہوئیاں نیں اوہناں وچ سیاسی بازیگراں دی منافقت نوں بے نقاب کیتا گیا اے جو پہلاں ہو چکے نیں بس خان صاحب ای بچے سن تے اوہناں دی 22سالہ شخصیت سازی نوں دو آڈیوز نے زمین بوس کر دتا اے۔ اک رائے ایہہ وی اے کہ لیول کر دتا گیا اے تاں جے عوام دے دلوں خان لئی ہمدردی تے مقبولیت ختم ہو جاوے تے (ن) لیگ اپنے قدم جمان وچ کامیاب ہو جاوے۔ سردست تے ایہہ ممکن وکھائی نہیں دیندا ہور جتھے دیدہ سمجھدے نیں کہ عوام نہ ای کسی نوں لیا سکدے نیں تے نہ ای حکومت سٹ سکدے نیں فیر وی جو شخص وی ایہہ کم کر رہیا اے بس حقیقی مسائل توں توجہ ای ہٹا رہیا اے جد کہ ویلا تے حقیقی خطریاں بارے سوچن دا سی کہ پاکستان اک ایسی ریاست اے جہڑ دشمناں وچ گھری ہوئی اے۔ ساریاں دی نظر اے تے ایہہ گل عام ہو گئی اے کہ عوام ناخوش نیں جد کہ حکمران دھڑا دھڑ قرضے لیتے جا رہے نیں اوہ واپس کیویں ہون گے۔ جے حکومت پاکستان قرض ادا نہ کرسکی تے خاکم بدہن ملک ڈیفالٹ کر گیا جہدا تذکرہ سارے کر رہے نیں تے ساڈے نال کیہ ہووے گا؟ حالات تے نہیں بدلن گے۔
تھک جائے گا ڈال ڈال کر کنکر خالی متکے میں
پاگل کوا پانی کی امید میں مارا جائے گا
مینوں کہن دیو کہ قول و فعل دے تضاد دا شکار صرف خان صاحب ای نہیں بلکہ لمحہ موجود دے سارے سیاستدان نیں۔ ایہناں دی غریب پروری تے عوامی محبت اکو جئی اے جو کہ لیک ہون والی آڈیوز توں وی ثابت ہو چکی اے بظاہر زبان توں شائستگی ٹپکدی اے تے شریف النفسی دا لبادھا اوڑھے گھمدے نیں جد کہ اوہناں دے اعمال کجھ ہور ای داستان بیان کردے نیں۔ اک پاسے
سادگی دا درس دیندے نیں تے دوجے پاسے اپنے محل نما گھراں دے لان وچ بیٹھ کے سوچدے نیں کہ کہڑی شے اتے ٹیکس لگ گیا اے تے کیہڑی رہ گئی اے۔ عوام دی جان و مال دی حفاظت نوں یقینی بنان دا بیان اٹھارہ 20گڈیاں دے جلوس تے درجناں گاڈاں دی موجودگی وچ دیندے نیں۔ 50قسم دے کھانے میز اتے سجا کے کھاندے نیں تے مافیاز دے مطالبے من کے عوام کولوں اک روٹی کھان دی سکت وی کھول لیندے نیں۔ اپنے پہناویاںدا ایہہ عالم اے کہ لکھاں دے سوٹ بوٹ زیب تن کردے نیں مگر عوام نوں عاجزی دا سبق دیندے نہیں تھکدے۔ یقینا ن لیگ بڑی چھیتی ملک دا کنٹرول سنبھال لووے گی کہ پرانی روایت برقرار رکھدے ہوئے میاں صاحب نے گھر والیاں نوں ای دلکش عہدے نوازنے شروع کر دتے نیں۔ سوال تاں ایہہ اے کہ کیہ عوام نوں ریلیف ملے گا؟ تے آڈیو لیکس دے ذریعے عوام نوں پتہ چل گیا اے کہ موجودہ حکومتی سیٹ اپ وی ٹپائو تے چل چلائو پالیسی اتے عمل پیرا اے جہدے تے عوام برہم نیں جو کسی دے مفاد وچ نہیں۔ کیسی بے حسی اے’ عوام سسک رہے نیں’ ہر طبقے دے حالات خراب ہو چکے نیں۔ دووقت دی روٹی کھانا اوکھا ہو گیا اے اوہدے اتے یوٹیلٹی تے بجلی دے بلاں تے ٹرانسپورٹ دے کرایاں نے عدم برداشت دا ایسا ماحول پیدا کردتا اے کہ اک دوجے نوں مارن تے خودکشیاں دا رواج عام ہو گیا اے جو کہ لمحہ فکریہ اے لیکن الٹا قیمتاں ودھان تے تھوڑی بہت جو آسانیاںنیں اوہناں نوں ختم کرن بارے منصوبہ بندی کیتی جا رہیاں نیں۔ افسوس’ چہرے بدلدے نیں کردار نہیں بدلدے۔ایس لئی تے جدوں وی ملکی حالات تے سمائل اتے نظر پانے آں تے دل بے ساختہ کہہ اٹھدا اے کہ
جو تھے سیاسی گھرانے والے سب ایک نکلے
بجھانے والے جلانے والے سب ایک نکلے
حرام کے رزق میں کوئی امتیاز کیسا ،کہ
کھانیوالے کھلانے والے سب ایک نکلے
اور ہمارے ماضی کی اک عمارت یہ کہہ رہی ہے
بچانے والے گرانے والے سب ایک نکلے