ویلڈن وزیراعلیٰ پرویز الٰہی!

وزیراعلیٰ پنجاب چودھری پرویزالٰہی دے پچھلے دور وچ کئی قابل ذکر کارنامے ایسے نیں کہ اوہناں دے پچھلے وزارت اعلیٰ دے دور دی بازگشت اج وی سنائی دیندی اے۔ لہور تے ملتان وچ چودھری پرویزالٰہی انسٹی ٹیوٹ آف کارڈیالوجی دا قیام’ ریسکیو 1122 دا فیدہ مند اجرا تے پڑھیا لکھیا پنجاب دا نعرہ اج وی اوہناں دے اہم کارنامیاں وچ شمار کیتا جاندا اے۔ اگرچہ اجے اوہناں دے حالیہ دو ر وزارت دا عرصہ کجھ بوہتا نہیں ہویا لیکن اوہناں نے کجھ ایسے قابل قدر اقدامات کیتے نیں کہ جہناں دی نہ صرف تعریف کرنا چاہیدی اے بلکہ اوہناں دے مشیراں تے ترجماناں نوں عوام تک ایہدے مثبت اثرات تے ثمرات وی پہنچانا چاہیدے نیں۔
وزیراعلیٰ چودھری پرویزالٰہی نے پروٹوکول کلچر دے خاتمے لئی وی خاصے قابل قدر اقدامات کیتے نیں۔پلس نوں عوام دا خادم بنان دے فارمولے اتے وی عمل پیرا نیں۔ چودھری پرویزالٰہی دے بقول اوہ پچھلے وزیراعظم عمران خان دے ویژن دے مطابق پنجاب وچ ایسے اقدامات کر رہے نیں کہ عوام نوں اوہناں دے تے ماضی دے حکمراناں وچ واضح فرق نظر آوے۔
ربیع الاول دی مناسبت نال اوہناں نے پنجاب دے سارے اضلاع تے تحصیل دی
سطح تے عشرہ شان رحمت اللعالمینۖ دی تقریبات دے پربندھ دی ہدایت کیتی اے۔ صوبہ بھر وچ تعلیمی اداریاں وچ حسن قرات’ نعت تے سیرت النبیۖ اتے تقریر دے مقابلہ جات’ کانفرنساں تے محفل نعت دا انعقاد یقینا خوش آئند اے۔ سرکاری تے نجی عمارتاں اتے چراغاں تے صوبائی دارالحکومت وچ عظیم الشان سیرت کانفرنس دا پربندھ وی ایسے سلسلے دی اک کڑی اے۔ مختلف اضلاع وچ میلاد ریلیاں تے سیمینارز وی خوش آئند نیں۔
موجودہ نفسا نفسی تے پریشانی دے دور وچ اسوۂ حسنہ اتے عمل پیرا ہون وچ ای دین و دنیا دی فلاح تے آخرت دی نجات اے۔ نسل نو نوں وی ایس ماحول توں آگاہی دلانا ویلے دی ا ہم لوڑ اے۔ قومی یکجہتی لئی وی ایسی تقریباں دا پربندھ انتہائی ضروری اے۔ مذہبی تے سیاسی منافرت دے خاتمے تے قومی ہم آہنگی دی فضا پیدا کرن لئی ہر ضلع’ تحصیل تے شہر وچ سیمینار تے تقریباں منعقد کر کے امن و آتشی تے قومی بھائی چارے تے یکجہتی دی فضا نوں فروغ دتا جا سکدا اے۔
چودھری پرویزالٰہی دی حکومت نے اک ہور قابل تحسین اقدام جو کیتا اے اوہ صوبے وچ سود دی لعنت دے خاتمے دا اے۔ زمانہ جاہلیت وانگوں اج دے جدید تے ترقی یافتہ دور وچ وی کئی ساہوکار لوکاں نوں بھاری منافع اتے قرض دے کے سینکڑاں خانداناں دی زندگیاں نوں مصیبت وچ پائے ہوئے نیں۔ سود دے خاتمے لئی جرمانے تے جیل دی سزاواں مقرر کیتی گئیاں نیں جو خوش آئند نیں۔ ایس ویلے پورے ملک تے خاص کر پنجاب دے اضلاع دے مختلف شہراں وچ ایہہ لعنت خاصی عام اے۔ سود در سود دی رقم دی ادائیگی لئی لوک اپنی جائیداد تے مکان تک ویچ دیندے نیں۔ کئی لوک اپنی جان توں وی ہتھ دھو بیٹھدے نیں تے ایہہ ناسورنسل در نسل وی منتقل ہوندا رہندا اے۔ پنجاب حکومت نے ایس پاسے توجہ کر کے اک اہم معاشرتی ناسور دے خاتمے لئی مثبت قدم چکیا اے۔
ایسے طرحاں مختلف شہراں وچ جوئے دے اڈیاں دا خاتمہ وی انتہائی ضروری اے۔ شہراں تے پنڈاں وچ وی ایہہ جوئے دے مرکز خورد رو جھاڑیاں وانگوں اگ آئے نیں۔ پلس دا محکمہ اوہناں دے خاتمے تے جرماں دی بیخ کنی کرن دے بجائے الٹا اوہناں جوئے دے اڈیاں دی سرپرستی کردا وکھائی دیندا اے۔ پنجاب حکومت نوں سود داکاروبار کرن والیاں دی حوصلہ شکنی تے اوہناں لئی سخت سزاواں وانگوں جوئے دے اڈے چلان والیاں دے خلاف وی کریک ڈائون کرنا چاہیدا اے۔ بلیئرڈ کلباں دی صورت وی جوئے دے ایہناں اڈیاں نوں فروغ دتا جا رہیا اے۔
ایسے طرح تعلیمی اداریاں تے دوجے درس گاہواں وچ منشیات دی فروخت تے اوہدے استعمال ول وی حکومت نوں فوری توجہ دینی چاہیدی اے۔ایہناں خباثتاں دی وجہ نال جتھے نویں نسل اپنے مستقبل نوں دائو تے لا رہی ا ے اوتھے والدین لئی وی کئی مسئلے پیدا ہو رہے نیں۔ حکومتی ارباب و اختیار تے حکومتی اداریاں نوں اپنی کارکردگی بہتر بنان تے اپنی وزارتاں دے وجود نوں درست ثابت کرن لئی فعال کردار ادا کرنا ہووے گا۔ عوام نوں حکومتاں تے اوہناں دی وزارتاں دی کارکردگی نظر وی آنی چاہیدی اے۔ عوام پہلے ای مسائل دی چکی وچ پس رہے نیں۔ مہنگائی دا جن بوتل توں نکل چکیا اے۔ بجلی تے گیس دے مسائل انج دے انج نیں۔ایس لئی حکومتاں ملکی وسائل دا صحیح استعمال جے درست سمت وچ کرن تے جتھے متعلقہ اداریاں دی کارکردگی نوں بہتر بنایا جا سکدا اے اوتھے ای عوامی مسائل نوں وی کسے حد تک گھٹ کر کے اوہناں دی حیاتیاں نوں آسان بنایا جا سکدا اے۔
یہی چراغ جلیں گے تو روشنی ہو گی