غزل

حنیف ساقی

رہبر ساڈے جے نہ ساقی آپ لٹیرے ہندے
دھرتی دی سونہہ دھرتی دے اج شان اچیرے ہندے
جے نہ منصف دنیا اتے چور چکیرے ہندے
ہاسے ماڑے لوکاں دے وی چار چفیرے ہندے
اپنے دیسوں چانن نوں جے دیس نکالا دیئے
کد دھرتی دے لیکھاں اندر فیر سویرے ہندے
مظلوماں دے لہو دی گرمی سینہ تان کھلوندی
ظلم دے جھکھڑ جس دیوے دے چار چفیرے ہندے
کامے سہکن ٹکر نوں تے کتے کھاون کھیراں
اچیاں لوکں دے نیں لوکو شوق اچیرے ہندے
جیوندیاں جنہوں کوٹھے جڈی دھی دا ور نہ لبھے
منجی اوہدی چکن دے لئی لوک بتھیرے ہندے
سجناں دے ہر وار نوں ساقی سینے اُتے جھلدا
جیکر میری کنڈ دے پچھے دشمن میرے ہندے