غزل
عبدالکریم قدسی
جی کردا اے دھوکھا تیرے نال کراں
پر میں جگرا کس دا استعمال کراں
ہنجواں دے موتی یاں ہیرے زخماں دے
سجناں دی خدمت وچ کیہ ارسال کراں
تیری یاد دے بال گواچے بھیڑاں وچ
ہن میں کیویں تیرا استقبال کراں
پیسے دی تھاں کھیسا بھریا شعراں نال
اپنے بچیاں دا کیہ ہور خیال کراں
جس دی لو وی میری قسمت ورگی اے
اوہ دیوا کیہ محفل دے وچ بال کراں
درد سمیٹ کے آکھیا میرے خالق نے
آ! ہن قدسی تینوں مالا مال کراں
