نظم
ملک خوشی محمد
تیرا اپنا دین ایمان کوئی نہ
ڈوری تیری کوئی ہور ہلاوندا اے
نہ توں اپنی آپ زبان کھولیں
گلاں تیتھوں کوئی ہور کراوندا اے
مسلمان عورت تے لا فتوا
ایہنوں دین توں خارج کراوندا اے
جے اوہ چاہوے تے کافر عورتاں دا
تیتھوں استقبال کراوندا اے
غیر عورتاں نال گل نہیں ٹھیک ہوندی
پر تیتھوں اوہ گلاں کرواندا اے
جہدا سر تے گوڈے وی ہون ننگے
چادر اس دے موڈھے پواندا اے
جدوں چاہوے اوہ تینوں خرید لیندا
مل تیری اوہ مرضی دا پاوندا اے
اس سودے وچ گھاٹ اوہ کھاندے نہیں
جنا چاہوے منافع کماندا اے
تیری کنڈ دے اولھے اوہ کھلو کے
کئی ملاں تے کوٹھیاں پاندا اے
پی کے رت غریباں دی اوہ تیتھوں
و عز من تشاء اکھواندا اے
ملاں ایہو اے دین ایمان تیرا
تیتھوں حق تے پردا پواندا اے
جد تیرے قیام دا ہووے ویلا
تیتھوں رکوع سجود کراوندا اے
ملک تہاڈی قسمت وچ ایہو لکھیا اے
دے پیسے تیتھوں تقریراں کرواندا اے
