دامن وی صاف تے خزانہ وی صاف

دامن وی صاف’ خزانہ وی صاف’ شہباز خاندان دا 16 ارب منی لانڈرنگ کیس آخری ساہواں لے رہیا’ شہباز’ حمزہ شہباز بری ہو چکے’ سلمان شہباز’ باقی خاندان وی باعزت بری ہو جاوے گا پر اوہ کہانی سگوں مبینہ کہانی ہضم نہیں ہو رہی۔ اوہ منی لانڈرنگ کیس دیاں ست جلداں’ اوہ چار ہزار صفحاتی منی لانڈرنگ تحقیقاتی رپورٹ’ اوہ 17 ہزار ٹرانزیکشنز’ اوہ سولاں ملزمان’ اوہ سو گواہ’ اوہ ست جعلی کمپنیاں اوہ اک تھاں توں دوجی تھاں رقماں لے جاندی ہرے رنگ دی بلٹ پروف لینڈ کروزر’ اوہ ایلیٹ فورس دے کمانڈواختر’ صدیق’ عابد دی نگرانی وچ رقماں دا 55 کے ماڈل ٹائون توں 96 ایچ ماڈل ٹائون جانا’ اوہ حمزہ شہباز دا جوہرٹائون والا پلاٹ’ اوہ شہبازشریف دا بیوی تہمینہ درانی نوں دلاورکاٹیج لے کے دینا’ اوہ حمزہ توں ولاد دے اثاثیاں دا سوال’ جواب’ والد توں پچھ لوو’ اوہ شہبازشریف توں اپنے پُتراں حمزہ’ سلمان دی دولت’ جائیداداں دا سوال’ جواب بچیاں توں پچھو۔ اوہ شہبازشریف توں اوہناں دی بیوی دی دولتاں دا سوال’ جواب بیوی توں پچھو’ اوہ دس ورھیاں وچ جدوں شہباز وزیراعلیٰ’ اوہناں دے اثاثیاں وچ ستر گنا اضافہ ہویا’ کوئی کاروبار نہیں’ تنخواہ اوہ لیندے نہیں سن’ اوہ پچھیا جانا ایہ سب کتھوں آیا’ جواب مینوں نہیں پتہ’ اوہ سلمان شہباز دے اثاثیاں وچ ست ہزار گنا اضافہ’ اوہ حمزہ شہباز دے اثاثیاں وچ تن ہزار گنا اضافہ۔
ایہناں اضافیاں وچ اہم کردار ٹی ٹیاں دا’ اوہناں توں سب مشکوک ٹی ٹیاں دا پچھیا جانا’ سب دا جواب سانوں نہیں پتہ’ اوہ سلمان شہباز دا کلاس فیلو علی احمد جو وزیراعلیٰ شہباز شریف دا ڈائریکٹر پالیسی اینڈ اسٹرٹیجی’ اوہ سلمان شہباز دا کلاس فیلو نثارگل جو وزیراعلیٰ شہبازشریف دا ڈائریکٹر پولیٹیکل افیئر’ نیب دا ایہناں دوہاں نوں شہباز فیملی دے فرنٹ مین دسنا’ اوہ مرحوم مقصود چپڑاسی’ پنج مرلے دے کرائے دے گھر وچ رہن والا’ سولاں ہزار تنخواہ والا جہدے اکائونٹس وچ چار ارب آئے’ گئے’ اوہ محبوب پھیری والا’ اوہ منظور پاپڑ فروش’ اوہ رقماں اک تھاں توں دوجی تھاں لے جان والا سلمان شہباز دا جم ٹرینر طاہر نقوی’ اوہ رقماں وصول کرن والے قاسم قیوم’ فضل داد عباسی’ اوہ رقماں کڈھوان والے شعیب قمر’ مسرور انور’ اوہ کباڑیئے دے شہباز ٹبراں دے اکائونٹاں وچ پیسے پانا’ اوہ چائے والے دے ست کروڑ’ اوہ گھی ویچن والے دے چار کروڑ’ اوہ ڈرائی فروٹ دے چالھی لکھ’ اوہ پھلاں’ سبزیاں’ میڈیکل سٹوراں’ کپڑے دیاں دکاناں’ کھڈونے ویچن والیاں دیاں رقماں جمع کرانا’ اوہ اظہرمغل جنہے کروڑاں شہباز خاندان دے اکائونٹس وچ جمع کرائے اوہدے توں پچھیا جانا’ جواب مینوں نہیں پتہ ہو سکدا اے میرا شناختی کارڈ استعمال ہویا ہووے’ اوہ چار غیرملکی جہناں نے شہباز خاندان نوں پیسے گھلے’ اوہ توقیر ڈار پیسیاں دیاں انٹریاں کرن والا’ اوہ سب اکائونٹاں دی نگرانی کرن والا چیف فنانشل افسر محمد عثمان’ اوہ گواہ مشتاق چینی۔
دامن وی صاف’ خزانہ وی صاف’ اوہ نیب دی پیشی’ اوہ شہباز شریف توں پچھیا جانا’ ایہ دولتاں’ جائیداداں کتھوں آئیاں’ اوہ جواب دینا مینوں ایہ سب وراثت وچ ملیا’ اوہ اوہناں نوں دسیا جانا تہانوں تے 2009ء وچ وراثت وچ صرف اک رمضان شوگر مل ملی’ اوہدی ہن تک ڈکلیئرڈ آمدنی ایہ’ باقی سب کتھوں آیا’ جواب چپ’ اوہ شہبازشریف نوں بچیاں دے حوالے نال چند کاغذات’ ثبوت دکھائے جانا’ اوہ سرد آہ بھر کے بولنا اللہ میری اولاد نوں ہدایت دے’ اوہ نیب دی پیشی’ اوہ شہبازشریف توں پچھیا جانا تہاڈی بیوی تے ہائوس وائف’ کوئی کاروبار نہیں’ اوہناں دے اکائونٹ وچ ٹی ٹیاں کیوں’ اوہ گل کٹ کے جواب دینا مینوں کیہ پتہ’ اوہناں توں پچھو’ اوہ تحقیقاتی ٹیم دا کہنا ایہ تہاڈی بیوی’ تسیں ذمہ دار’ اوہ جواب دینا کہہ دتا ناں میں ذمہ دار نہیں’ جے ایس گل تے مینوں گرفتار کرنا اے تے کر لوو’ سوال کیتا گیا تہاڈی بیوی دے اکائونٹ وچ برطانیہ’ دبئی توں باراں کروڑ آئے’ جہناں نے پیسے گھلے’ اوہ مُکر گئے’ سگوں اوہناں نوں پتہ ای نہیں جواب دتا میرے توں انج دے سوال نہ کرو پچھیا گیا’ تہاڈے زیراستعمال ڈونگا گلی مری وچ اک گھر’ ایہ مشکوک منی توں خریدیا گیا’ کیہ کہو گے’ جواب دتا ایہ گھر میری بیوی دے ناں’ اوہناں توں پچھو’ دسیا گیا نیب قنوناں دے مطابق جے بیوی جائیداد دی مالک ہووے اوہدا کوئی ذریعہ آمدن نہ ہووے اوہ ذریعہ آمدن دسن وچ نکام ہو جاوے تے اوہدا جواب خاوند نوں دینا پوے گا’ جواب دتا میں جو کہنا سی کہہ دتا۔
دامن وی صاف خزانہ وی صاف’ قصہ مختصر مبینہ ٹی ٹی کہانی جو سنائی’ شہباز خاندان تن سو ٹی ٹیاں’ 23 بار رقماں آئیاں حمزہ شہباز دے اکائونٹ وچ’ دو سو واری رقماں آئیاں سلمان شہباز دے اکائونٹ وچ’ اوہ جو رقماں دبئی’ برطانیہ توں گھل رہے سن اوہنا ںنے دبئی’ برطانیہ کیہ جانا’ اوہناں دے تے پاسپورٹ وی نہیں سن بنے ہوئے۔ اوہ ٹی ٹی تحقیقات وچ نفسانفسی دا ایہ عالم کہ باپ بیٹے نوں نہیں پچھان رہیا۔ بیٹا باپ نوں پچھانن توں انکاری’ خاوند کہہ رہیا میں اپنی بیوی دا ذمہ دار نہیں سگوں پتر کہہ رہیا اے والدہ دا والدہ توں پچھو’ ایہ ٹی ٹی کیس اجہے ثبوتاں والا’ اک جھلک’ محبوب پھیری والا جو پھیری لا کے اپنے بچیاں دا پیٹ پالے’ اوہ 14دسمبر 2007ء نوں اک لکھ 27 ہزار ڈالر بطور سرمایہ کاری نصرت شہباز دے اکائونٹ وچ گھلے’ محبوب پھیری والا تن اپریل 2008ء نوں سلمان شہباز دے اکائونٹ سوا لکھ ڈالر گھلے تے اوہ منظور پاپڑ فروش جو 27 جولائی 2008ء نوں سلمان شہباز دے اکائونٹ وچ اک لکھ 86 ہزار ڈالر گھلے’ کنے امیر نیں اپنے پاپڑ فروش’ پھیری والے وی۔
مٹی پائو’ ایہ مبینہ کہانیاں’ سگوں جھوٹھیاں کہانیاں’ میں معذرت خواہ’ ایہ جھوٹھیاں کہانیاں سنان بہہ گیا’ سچ تے ایہ کہ شہبازشریف’ حمزہ شہباز بری ہو چکے’ مریم نواز لندن’ اسحاق ڈار پاکستان آ چکے’ نیب ختم ہو چکیا’ احتساب گالھ بن چکیا تے سچ تے ایہ کہ دمن وی صاف تے خزانہ وی صاف۔٭