جیل یاترا یاں ملک بدری؟

ایہ کیویں ٹھیک ہو سکدا اے کہ ہاریا ہویا بندہ وکٹاں چک کے نس جاوے۔ نویں ٹیم کھیڈنا شروع کرے تے اوہ ایہ کہہ کے میچ ای اکھاڑنا شروع کر دیوے کہ کھیڈاں گے نہ کھیڈن دیاں گے۔ لگدا اے کرسی کیہ گئی’ اوہدا رہندا کھوہندا دماغی توازن وی وگڑ گیا۔ کدی اوہنوں بھٹو چنگا لگنا شروع ہو جاندا اے پر جدوں معاملہ پھانسی دا آندا اے تے تھر تھر کنبدا شروع ہو جاندا اے کدی اوہ نیلسن منڈیلا بننا چاہندا اے پر جیل جان توں نسدا پھردا اے۔ وطن والے تے خوب جان دے نیں پر ہن غیرملکی حکمران تے سفارتکار وی اوہنوں چنگی طرح جان گئے نیں کہ اجہے چشمے کدی سیراب نہیں کر سکدے چار ورھے توں تسبیح گھمان والا جعلساز بنگالی بابا نکلیا جو تعویذاں تے دھونی دے سر تے اپنی دھوکہ منڈی چلاندا اے یاد رکھو قدرت کسے بندے نوں دین دا ٹول استعمال کرکے کامیاب ہون دی اجازت بالکل نہیں دیندی۔ آخر کار جدوں احتساب دی خدائی چکی چلنا شروع ہو جاندی اے تے اوہ گھن نوں ہمیشہ لئی پیہہ دیندی اے۔ وطن دی معیشت نوں لگا میانوالی دا گھن بری طرح کھا گیا اے۔ اللہ نے چاہیا تے مقررہ مدت وچ ڈار کیمیکل دے کجھ سپرے ایس دیمک نوں تباہ کر دین گے۔ اپنے آپ نوں مولاجٹ قرار دین والا تے نوری نت وی نہ نکلیا۔ شکست دا مقابلہ کرن دی تھاں دوجیاں تے چکڑ سٹن لگا’ بھلا قدرت نال لڑائی کدی کسے نوں راس آئی اے؟ سائفر دی جعلی ٹیک تے چڑھ کے قد تے ودھ گیا پر غرور تے آکڑ نے مل کے اوہنوں زمین بوس کر دتا۔ فطرت ہن اوہدے سارے خوشنما جعلی نقاب اک اک کرکے لاہی جا رہی اے۔ اوہدے بولے جھوٹ کلنک داٹیکہ بن کے اوہدے متھے تے واضح ہوندے جا رہے نیں تے اوہدے الٰہ دینی چراغ چوں نکلے سازشی جن اینے وڈے ہو گئے نیں کہ آپ اوہدے قابو چوں باہر ہو گئے نیں۔
کرسی کرسی کرسی دا ماتم کرن والا قلابازیاں لاندا پھر رہیا اے۔ وزارت عظمیٰ وی اپنی حماقتاں دے طفیل کھو دتی’ اوہدے تے وی بس نہیں سگوں بچی کھچی عزت دی بحالی لئی سونے دی پڑیا یعنی سائفر ہتھ لگا تے اوہ وی کھو دتا۔ خاتون اینکر نے جدوں پچھیا سائفر کتھے اے تے بولیا غایب ہو گیا مینوں نہیں پتہ؟ کون لوک ایہدی گل تے یقین کرن گے کہ جس کاغذ نے اوہنوں زندگی دتی اوہ اہم ترین کاغذ کھو گیا جہنوں اوہ جلسیاں وچ لہراندا پھردا سی اوہ کاغذ گواچ گیا۔ بہت ساریاں دی رائے اے کہ اوہ مخصوص سازشی ایجنڈے تے کم کر رہیا سی تے ہن وی ایہو کر رہیا اے۔ نیازی فیس سیونگ دی تلاش وچ ہن وی شریفاں تے تنقید کر رہیا اے پر کیا بنے بات جہاں بات بنائے نہ بنے۔ ایہنے علیم خان دی علانیہ بغاوت تے اوہدی نجی سوسائٹی تے حملے شروع کروا دتے۔ اجے کئی ہور بغاوتاں وی سامنے آن والیاں نیں فیر کہدے کہدے خلاف کیہ کاروائی کرے گا؟ زبان درازی وچ عالمی ریکارڈ بنان والے نے اپنے آپ تے بتیرے لیبل لگوائے نیں پر ایہناں وچ سب توں ودھ خوفناک اک ای اے تے اوہ اے محسن کش’ ناقدین دا کہنا اے کہ اوہ لفظ کھڈاری دی مجسم توہین اے کیوں جے اوہ کھیڈ دی روح دا دشمن ثابت ہویا۔ ملک دے نال کھلواڑ کرن والے سازشی دے نال جیل جیل دا کھیڈ شروع ہو چکیا اے جہدے توں اوہدا تراہ نکل گیا اے۔ اجے تے صرف اسحاق میزائل نے اوہدے اڈیاں نوں تباہ کرنا شروع کیتا اے جس دن قائد میاں نوازشریف دے آن دی تریخ آئی تے ایہ کردار کناں ماتم کرے گا؟ لکھ لوو جدوں ایہنوں جیل جان دا یقین ہو جاوے گا تے شاہ سنے اوہدے سارے حواری تتر بتر ہو جان گے پر ایہ جیل جان دی تھاں بخوشی سیاست تے ملک بدری دا این آر قبول کر لوے گا۔٭