لیگی رہنماواں شاہد خاقان عباسی تے احسن اقبال نوں اڈیالہ جیل توں رہا کر دتا گیا

راولپنڈی: مسلم لیگ (ن) دے رہنما شاہد خاقان عباسی تے احسن اقبال نوں ضمانتی مچلکے جمع کران دے بعد راولپنڈی دی اڈیالہ جیل توں رہ کر دتا گیا اے۔ سابق وزیراعظم شاہد خاقان عباسی دی رہائی لئی اک کروڑ دے ضمانتی مچلکے راجہ وقار ممتاز نے احتساب عدالت وچ جمع کرائے جہدے بعد جج اعظم خان نے رہائی دی روبکار جاری کر دتی۔ دوجے پاسے نارووال سپورٹس سٹی کیس وچ احسن اقبال دی رہائی لئی اک کروڑ دے ضمانتی مچلکے انجم عقیل خان نے جمع کرائے۔

احتساب عدالت دے جج بشیر نے ضمانتی مچلکے جمع کروان دے بعد احسن اقبال دی رہائی دی روبکار جاری کیتی۔ روبکاراں جاری ہون دے بعد مسلم لیگ دے دوواں رہنماواں نوں اڈیالہ جیل توں رہا کر دتا گیا اے ۔ احسن اقبال تے شاہد خاقان عباسی دی رہائی دے موقع تے جیل دے باہر لیگی کارکناں دی چوکھی تعداد جمع سی جہناں نے اوہناں دے حق وچ نعرے بازی کیتی تے پُھلاں دی پتیاں نچھاور کیتیاں۔