توشہ خانہ:کون اہل تے کون نااہل؟

سب توں پہلاں تے قوم نوں ایف اے ٹی ایف دی گرے لسٹ چوں نکلن تے مبارک ہووے۔ ساڈے دشمن تے بلیک لسٹ ول پاکستان نوں دھک رہے سن۔ عمران خان حکومت ولوں چنگے اقدامات پاروں پاکستان اک پاسے بلیک لسٹ وچ شامل ہون توں محفوظ رہیا تے دوجا گرے لسٹ چوں وی نکل گیا۔ ایہدے نال ای اک ہور کنفیوژن وی جنرل قمرجاوید باجوہ صاحب نے ایہ آکھ کے کر دتی کہ اوہ 20 نومبر نوں اپنی مدت ملازمت پوری کرکے ریٹائر ہو جان گے۔ اوہناں دا توسیع لین دا ارادہ نہیں۔ نال ای اوہناں آکھیا کہ کجھ ہفتیاں وچ نویں آرمی چیف دا ناں سامنے آ جاوے گا۔ جے ناں سامنے آ جاندا تے بہتر سی کہ قیاس ارائیاں تے چہ میگوئیاں دا سلسلہ رک جاندا۔ الیکشن کمیشن ولوں عمران خان دی نااہلیت دا فیصلہ وی آ چکیا اے۔ ایہدے تے مثبت تے منفی دوہاں طرح دا ردعمل سامنے آیا اے عمران خان نے کل ای ست وچوں چھ قومی اسمبلی دیاں سیٹاں تے کامیابی حاصل کیتی اے۔ ایہ سیٹاں پی ٹی آئی دے اوہناں ایم این ایز دے استعفیاں دے بعد خالی ہوئیاں سن جہناں دے استعفے راجہ پرویزاشرف نے منظور کیتے سن۔ ایہ اوہ حلقے نیں جتھے تحریک انصاف دے مقابلے وچ ہارن والے امیدواراں نے تحریک انصاف دے جتن والے امیدوار دے مقابلے وچ مجموعی طور تے تقریباً دونے ووٹ حاصل کیتے سن۔ گویا ضمنی الیکشن وچ پی ٹی آئی دے امیدوار نوں ہران دا مکمل یقین سی پر عمران خان آپ ای ہر حلقے توں کھڑے ہو گئے تے جت وی گئے۔ ایہدے نال اوہناں دی عوامی مقبولیت دا اندازہ ہوندا اے۔ بھاویں مقبولیت دا مطلب ایہ نہیں کہ جے اوہناں تے اجہے الزامات ثابت ہو جان جہناں دی پاداش وچ سزا ہو سکدی اے تے سزا نہ دتی جاوے پر توشہ خانہ کیس نوں تحریک انصاف قرار دیندی اے کہ ایہ عمران خان نوں سیاست توں آئوٹ کرن لئی بنایا گیا۔ الیکشن کمیشن پہلے وی درجن بھر فیصلے پارٹی دے خلاف دے چکیا اے جو ہائیکورٹ تے سپریم کورٹ وچ رد ہو گئے سن۔ توشہ خانہ وچ دتا جان والا فیصلہ وی انج ای لگدا اے۔
اخبارات وچ چھپن والیاں خبراں دے مطابق ایس کیس وچ عمران خان دی نااہلی دی مدت موجودہ اسمبلی تک ہووے گی۔ توشہ خانہ توں حاصل تحفے اثاثیاں وچ ڈیکلیئر نہ کر کے آرٹیکل 63 ون پی دے تحت نااہل ہوئے۔ کہیا گیا اے کہ ایہ متفقہ فیصلہ اے پر تحریری فیصلہ ایس لئی جاری نہیں کیتا گیا کہ بیماری پاروں پنجاب دے الیکشن کمشنر بابرحسن بھروانہ دے دستخط نہیں ہوئے۔ آخر اینی جلد بازی دی کیہ لوڑ سی ایہ سوال کئی حلقیاں ولوں اٹھایا جا رہیا اے۔ تحریک انصاف ولوں ایس فیصلے نوں اسلام آباد ہائیکورٹ وچ چیلنج کرن دا اعلان کیتا گیا اے۔ عمران خان تے ایہناں تحفیاں نوں اک خاص مدت دوران ڈیکلیئر نہ کرن دا الزام اے۔ کل مالیت کجھ کروڑ روپیے بن دی اے اک پاسے ایہدے تے عمران خان نوں نااہل قرار دے دتا گیا اے دوجے پاسے نیب وچ موجود 11 سو ارب روپیے دے کیس ختم کیتے جا رہے نیں۔ ارباں روپیے دی کرپشن وچ ملوث سیاسی لیڈراں دی بریت دے فیصلے سامنے آ رہے نیں۔ کیہ عجب منطق دتی جاندی اے کہ مجرم سامنے کھڑا اقرار کرے تے وی مجرم استغاثہ نے ثابت کرنا اے۔
نوازشریف 2013ء دے انتخابات دے بعد اقتدار وچ آئے تے اوہناں نے کراچی دی اک کورٹ دا حوالا دیندے ہوئے کہیا سی کہ جج دے سامنے کھڑا مجرم اعتراف کر رہیا سی جد کہ جج اوہنوں بے گناہ لکھ رہیا سی۔ ہن اوہ صورتحال قنون دا درجہ اختیار کر گئی اے۔ پی ٹی آئی ولوں عمران خان دے خلاف فیصلہ آن دے بعد ملک بھر وچ احتجاج کیتا گیا جو پرامن رہیا۔ توشہ خانہ کیس وچ دتا جان والا ایہ فیصلہ ہن اسلام آباد ہائیکورٹ وچ جاوے گا۔ ویکھنا اے کہ ایہدا اوتھے کیہ مستقبل ہوندا اے۔ جے عمران خان دے حق وچ فیصلہ نہیں آندا تے وی اوہ اگلی اسمبلی دا الیکشن لڑ سکن گے۔ نوازشریف نال موازنہ فیر وی نہیں بن سکیا۔ انج ایس فیصلے تے عالمی میڈیا پاکستان دے نظام عدل تے انگلیاں اٹھا رہیا اے۔
دوستو! توشہ خانہ اصل وچ اوس سرکاری خزانے نوں کہندے نیں جو پاکستانی صدر’ وزیراعظم’ آرمی چیف تے وزیراں نوں ملن والے غیرملکی تحفے اکٹھے کردا اے۔ ایہدا باقاعدہ ریکارڈ ہوندا اے۔ ماضی وچ وی سابق وزیراعظم یوسف رضا گیلانی تے اوہناں دی بیوی نے توشہ خانہ توں غیرملکاں توں ملن والے تحفیاں نوں کوڑیاں دے بھاء اپنے کول رکھ لئے۔ ایہدے وچ گڈیاں’ قیمتی نوادرات تے خاص طور تے ترکی دی خاتون اول توں ملن والا ہیریاں دا اوہ ہار وی شامل سی جو طیب اردگان دی بیگم نے اپنے گلے چوں لاہ کے اوس ویلے سیلاب زدگان دے ریلیف فنڈ وچ دتا سی تے نال ایہ الفاظ وی کہے سن کہ برصغیر ہندوستان دی مسلمان عورتاں نے تحریک خلافت دوران جدوں ترکی دی خلافت بچان دی تحریک چلی سی تے اپنے زیور لاہ کے تحریک خلافت وچ عطیے کر دتے سن۔ بعد وچ جدوں گل گھروں باہر نکلی تے بادل نخواستہ پاکستان دی خاتون اول فوزیہ گیلانی صاحبہ نوں ایہ ہیریاں دا سیٹ واپس کرنا پیا۔ ایسے طرح جناب نوازشریف’ راجہ پرویزاشرف تے آصف علی زرداری نے بحیثیت قدر قیمتی تحفے تے لگژری گڈیاں کوڈیاں دے بھاء حاصل کیتیاں حالاں کہ ضابطے دے مطابق توشہ خانہ وچ آئی ہوئی گڈی خریدی نہیں جا سکدی۔٭