غزل

اقتدار جاوید

کجھ بے رنگی ظاہر ہوئی کجھ ظاہر رت رنگی
اتے چوغے پا پا پھردی وچوں ہر شے ننگی
کالے شاہ رکھاں دے تھلے جگر جگر پئی کردی
ہک فجر ست رنگاں والی ہک کڑی نو رنگی
افق آفاق بنیرے اتے رنگ برنگے غنچے
کہڑی دولت ہتھ آئی ساڈے کہڑی دولت منگی
اوڑک ساڈے حق چ پرھیا لایاں اپنیاں مہراں
چنگیاں گلاں اوتھے ہویاں بھبل اُڈی چنگی
خالی خود نوں کیتا اے پر ہن وی نال ای رہندے
پاکٹ مار نشئی اوارہ غنڈے لچے بھنگی
کوئی ہور فلیٹ چ نئیں سی ننگ مننگے لیٹے
ایدھر جھگا چا لٹکایا اودھر ستھن ٹنگی
اِس سمے جاویدا پتہ نئیں کیہ کیہ توپاں چلیاں
واء موافق ہو گئے دشمن واء موافق سنگی