پاکستان چین دا کثیر جہتی تعاون بڑھان تے اتفاق

بیجنگ(پنجابی میڈیا)پاکستان تے چین نے سی پیک سنے کثیر جہتی تعاون ودھان اُتے اتفاق کیتا اے ۔وزیر اعظم شہباز شریف نے چین دے صدر شی جن پنگ نال ملاقات کیتی جس وچ چین تے پاکستان دے وِچکار باہمی تعاون اُتے گل بات کیتی گئی،دوناں رہنماواں دے وچکار ملاقات بیجنگ وچ چینی حکومت دے دفتر وچ موجود پیپلز گریٹ ہال آف چائنا وچ ہوئی۔ ملاقات دے دوران دوناں رہنماواں نے چین تے پاکستان دے وچکار سی پیک سنے کثیر جہتی تعاون ودھان تے اسٹریٹجک شراکت داری ہور مضبوط کرن اُتے اتفاق کیتا۔علاوہ ازیں ملاقات دے دوران وزیر اعظم شہباز شریف نے صدر شی جن پنگ نال علاقائی تے عالمی پیش رفت اپتے تبادلہ خیال وی کیتا۔جاری اعلامیہ دے مطابق وزیر اعظم شہباز شریف نے چینی کمیونسٹ پارٹی دی20ویں مرکزی کمیٹی دا جنرل سیکرٹری منتخب ہون اُتے صدر شی جن پنگ نوں مبارکباددتی۔اوہناں نے پاکستان وچ آن والے سپر فلڈ نال ہون والی تباہی دے تناظر وچ پاکستان دی امداد، بحالی تے تعمیر نو دیاں کوششاں وچ چین دی گراں قدر مدد اُتے اوی اوہناں دا شکریہ ادا کیتا۔ دوناں رہنماواں نے پاک چین دوطرفہ تعلقات وچ پیش رفت دا جائزہ لیا تے باہمی دلچسپی دے علاقائی تے عالمی امور اُتے تبادلہ خیال کیتا۔ اوہناں نے دوناں ملکاں دے وچکار آل ویدر اسٹریٹجک کوآپریٹو پارٹنرشپ لئی اپنی وابستگی دا اعادہ کیتا جس نے ویلے دی ہر آزمائش دا مقابلہ کیتا اے۔
دونوں ملک امن، استحکام، ترقی تے خوشحالی دے اپنے سانجھے ویژن نوں عملی جامہ پہنان وچ مضبوطی نال کھڑے نیں۔چین دے نال پاکستان دے منفرد تریخی تعلقات تے علاقائی امن واستحکام لئی دوطرفہ دوستی دے عزم دااعادہ کردیاں ہویاں وزیر اعظم نے ایس گل دا بھرپور اعادہ کیتا کہ پاک چین دوستی پاکستان وچ سیاسی میدان وچ مکمل اتفاق رائے رکھدی اے تے ایہ بین الریاستی تعلقات دے حوالے نال اک مثال اے۔چین دی خوشحالی لئی صدر شی دی قیادت تے دوطرفہ تعلقات نوں مضبوط بنان لئی اوہناں دے ویژن نوں خراج تحسین پیش کردیاں ہویاں،وزیراعظم نے آکھیا کہ پاکستان نے چین دی سماجی تے اقتصادی ترقی تے ملک دی ترقی تے خوشحالی دے قومی عزم نال تحریک حاصل کیتی اے۔دوناں رہنماواں نے دفاع، تجارت تے سرمایہ کاری، زراعت، صحت، تعلیم، متبادل توانائی، سائنس تے ٹیکنالوجی تے آفات توں نمٹن لئی تیاری سنے کئی امور اُتے تبادلہ خیال کیتا۔
اوہناں نے سی پیک لئی اپنی باہمی وابستگی دااعادہ کیتا، تے ایس گل نوں اُجاگر کیتا کہ سی پیک دی اعلیٰ معیار دی ترقی نال پاکستان تے چین دے وچکار دوطرفہ تعلقات ہورمضبوط ہون گے ایس سلسلے وچ دوناں رہنماواں نے ایس گل اُتے اتفاق کیتا کہ اسٹریٹجک اہمیت دے منصوبے اُتے،دونوں فریق سی پیک فریم ورک دے تحتML1 نوں ابتدائی منصوبے دے طور اُتے شروع کرن لئی سانجھیاں کوششاں کرن گے۔ اوہناں نے کراچی وچ ماس ٹرانزٹ منصوبے دی لوڑ نوں وی تسلیم کیتا تے کراچی سرکلر ریلوے دے چھیتی آغازلئی ساریاں رسمی کارروائیاں نوں حتمی شکل دین اُتے اتفاق کیتا۔اوہناں نے دورے دے دوران دوطرفہ تعاون دی وسیع رینج دا احاطہ کرن والے کئی معاہدیاں اُتے دستخط نوں وی سراہیا۔صدر شی جن پنگ نے یقین دلایا کہ چین پائیدار اقتصادی ترقی تے جیو اکنامک حب دے طور اُتے اپنیاں صلاحیتاں نوں بروئے کار لیان لئی پاکستان دی حمایت جاری رکھے گا۔
اوہناں نے پاکستان وچ سیلاب توں بعد دی امداد تے بحالی دیاں کوششاں لئی RMB 500 ملین دے وَدھ امدادی پیکج دا وی اعلان کیتا۔ دوناں رہنماواں نے بین الاقوامی محول وچ تیزی نال تبدیلی بارے تبادلہ خیال کیتا،جس نے ترقی پذیر ملکاں لئی اقتصادی چیلنجاں نوں ودھا دتا اے۔ اوہناں نے برابری تے باہمی فائدے اُتے مبنی گل بات تے تعاون اُتے اپنے سانجھے یقین دی توثیق کیتی جیہڑی عالمی امن تے خوشحالی لئی اہم اے۔اوہناں نے ایس گل اُتے اتفاق کیتا کہ موسمیاتی تبدیلی، صحت دی وبائی امراض تے وَدھدی ہوئی عدم مساوات ورگے عصری چیلنجاں لئی اقوام متحدہ دے چارٹر دے مقصد تے اصولاں دے مطابق ریاستاں دے وچکار تعاون دی لوڑاے۔وزیر اعظم شہباز شریف تے صدر شی جن پنگ نےIIOJK تے افغانستان دی صورتحال سنے خطے بارے اہم امور اُتے وی تبادلہ خیال کیتا۔دوناں رہنماواں نے تسلیم کیتا کہ اک پُرامن تے مستحکم افغانستان علاقائی سلامتی تے اقتصادی ترقی نوں ودھائے گا تے ایس گل اُتے اتفاق کیتا کہ سی پیک دی افغانستان تک توسیع نال علاقائی رابطیاں دے اقدامات نوں تقویت ملے گی۔
وزیراعظم نے صدر شی جن پنگ نوں چھیتی توں چھیتی پاکستان دا دورہ کرن دی پرتپاک دعوت وی دتی جس نوں اوہناں نے قبول کر لیا۔وزیر اعظم شہباز شریف نے آکھیا اے کہ میری چینی قیادت دے نال بوہت’’سیر حاصل‘‘ملاقاتاں ہوئیاں،سی پیک دے تحت اسیں پشورتوں کراچی ایم ایل ون تے کراچی سرکلر ریلوے منصوبے اُتے توجہ مرکوز کرن گے،سی پیک تحت کو ل پاور پراجیکٹس دے برعکس، سولر پراجیکٹ دا طریقہ کار مختلف ہوئے گا،ضمانت تے تیجے فریق کول جائے بغیر60دناں دے اندراندرادائیگیاں ہون گیاں۔گوادرپرو دے مطابق11ویں سی پیک جوائنٹ کوآپریٹو کمیٹی (جے جے سی) نے سی پیک دی حالیہ پیشرفت دا جائزہ لیا تے اُس نوں مضبوط کیتا اے، بیجنگ وچ پاکستانی سفارتخانے ذریعے بدھ (2 نومبر) نوں منعقدہ چین پاکستان بزنس فورم وچ پاکستانی وزیر اعظم شہباز شریف نے آکھیا کہ ہُن اسیں اپنے سی پیک تعاون وچ تازہ عناصر داخل کرن رستے اُتے نیں۔ ایہ فورم اوہناں دے دورہ چین دیاں سرگرمیاں دا حصہ اے۔ گوادر پرو دے مطابق کانفرنس وچ آن لائن رَلتیاں400 توں وَدھ چینی کاروباری اداریاں دے اک گروپ نال خطاب کردیاں ہویاں وزیر اعظم نے آکھیا کہ بدھ دی صبح میری چینی فریق دے نال بوہت’’سیر حاصل‘‘ملاقات ہوئی۔