فرق پَے سکدا اے

اٹلی دے کسے ساحل تے طوفان آ گیا طوفان جدوں رکیا تے ساحل تے ان گنت مچھیاں پئیاں سن۔ ایہ نیم مردہ مچھیاں سن تے ایہ ساحل دی ریت تے پئیاں بری طرح تڑپ رہیاں سن۔ اگلی سویرے اک بچہ ساحل تے اپڑیا تے اوہنے اک اک مچھی چک کے سمندر وچ سٹنی شروع کر دتی اوہ شام تک سمندر وچ مچھیاں سٹدا رہیا تے اک اطالوی بڈھا فلوڈنگ چیئر تے بہہ کے بچے نوں ویکھ رہیا سی۔ شام نوں جدوں بچہ سستان لئی رکیا تے بڈھا اٹھ کے اوہدے کول آیا تے اوہنے پچھیا بیٹا توں کیہ کر رہیا ایں’ بچے نے مسکرا کے بڈھے ول ویکھیا تے شائستگی نال بولیا میں مچھیاں نوں مرن توں بچا رہیا واں۔ بڈھے نے بچے دی گل سنی’ اک لمحے لئی کجھ سوچیا تے اوہدے بعد بولیا اودھر ساحل ول ویکھو بچے نے ساحل ول ویکھیا ساحل تے دور دور تک لکھاں مچھیاں تڑپ رہیاں سن’ بڈھے نے بچے نوں اپنے ول متوجہ کیتا تے اوہدے بعد بولیا بیٹا ساحل تے لکھاں مچھیاں پئیاں نیں توں اوہناں وچوں کنیاں مچھیاں نوں بچا لویں گا’ تیری ایس کوشش نال کیہ فرق پوے گا بچے نے بابا جی دی گل سنی’ قہقہہ لایا اوہ نس کے ساحل تے گیا’ ریت تے جھکیا’ اک مچھی چکی’ نسدا ہویا پانی دے کول گیا’ مچھی نوں احتیاط دے نال پانی دے کول رکھیا تے نسدا ہویا بڈھے دے کول آیا تے مسکرا کے بولیا تسیں ٹھیک کہہ رہے او میری ایس کوشش نال واقعی کوئی فرق نہ پوے پر میں گھٹو گھٹ اک مچھی دی زندگی وچ فرق تے پیدا کر دتا۔ بچہ رکیا تے فیر بولیا ایہ مچھی جدوں پانی دے کول اتری ہووے گی اوہدی ملاقات دوجیاں مچھیاں نال ہوئی ہووے گی تے اوہنے اوہناں نوں کہیا ہووے گا اسیں انساناں دے بارے غلط فہمی دا شکار سی اسیں اوہناں نوں ظالم’ قاتل’ مفاد پرست تے وحشی سمجھدیاں سی پر ایہ تے بڑے ہمدرد’ بے غرض تے مخلص نیں اوہ رکیا تے فیر بولیا میں انسان دے بارے سمندری مخلوق دے خیالات بدل دتے تے ایہ وی اک بہت وڈا فرق اے بڈھے نے بچے دی گل سن کے قہقہہ لایا تے اوہ وی اوہدے نال مل کے مچھیاں سمندر وچ سٹن لگ پیا۔
دوستو! اک واقعہ ہور پڑھو تے زندگیاں نوں آپ خشحال بنان دی کوشش کرو۔ مسیحا دی تلاش چھڈ دیو۔ محنت’ لگن’ حوصلہ تے ایمانداری نوں اپنا شعار بنائو فیر ویکھو تہاڈی زندگی وچ معاشی تے سماجی تبدیلیاں کیویں رونما ہوندیاں نیں۔ پنج ورھے دی عمر وچ اوہدے والد دا انتقال ہو گیا۔ 16 ورھے دی عمر وچ اوہنے سکول چھڈ دتا۔ 17 ورھے دی عمر تک اوہنے چار ملازمتاں کھو دتیاں۔ 18 ورھے دی عمر وچ اوہنے ویاہ کر لیا۔ 18 توں 22 ورھے دی عمر دے درمیان اوہ اک ریلوے کنڈیکٹر رہیا پر نکام رہیا۔ 19 ورھے دی عمر وچ اوہ باپ بن گیا۔ 20 ورھے دی عمر وچ اوہدی بیوی نے اوہنوں چھڈ دتا تے دھی نوں لے گئی۔ اوہ فوج وچ شامل ہویا پر کڈھ دتا گیا۔ اوہنے قنون دی پڑھائی لئی درخواست دتی پر اوہنوں رد کر دتا گیا۔ اوہ اک انشورنس سیلز مین بن گیا پر اک واری فیر نکام ہویا۔ اوہ اک چھوٹے جہے کیفے وچ اک باورچی تے بیرہ بن گیا۔ اوہنے اپنی دھی نوں اغوا کرن دی کوشش کیتی پر آخر کار اوہ اپنی بیوی تے دھی نوں گھر واپس لیان وچ کامیاب ہو گیا۔ 65 ورھے دی عمر وچ اوہدی سبکدوشی دے موقعے تے حکومت ولوں اوہنوں صرف 105 ڈالر دا اک چیک ملیا۔ اوہنوں لگا حکومت ایس چیک راہیں اوہنوں اک نااہل انسان ثابت کرنا چاہندی اے۔
اوہنے خودکشی کرن دا فیصلہ کیتا کیوں جے اوہ اینی واری نکام ہویا سی کہ ہن اوہ ہور زندگی گزارن دے قابل نہیں سی۔ اوہ اپنی وصیت لکھن اک رُکھ تھلے بہہ گیا پر وصیت لکھن دی تھاں اوہنے ایہ لکھیا کہ زندگی وچ اوہنے کس کم وچ مہارت حاصل کیتی۔ اوہنے لکھیا کہ اوہ صرف اک کم دوجیاں دے مقابلے وچ بہتر کر سکدا اے تے اوہ اے کھانا پکانا تے اوہنے اپنے چیک دے بدلے 87 ڈالر ادھار لئے تے کجھ چکن خریدیا۔ اک خاص مسالہ استعمال کرکے اوہنے چکن نوں تل لیا تے کینٹکی وچ اپنے گوانڈھیاں نوں ویچن لئی گھروں نکل پیا۔ یاد رکھو 65 ورھے دی عمر وچ اوہ خودکشی لئی تیار سی پر 88 ورھے دی عمر وچ اوہ یعنی کرنل سٹینڈرز’ کینٹکی فرائیڈ چکن (KFC) سلطنت دا بانی تے اک ارب پتی بزنس مین سی۔ کدی مایوس نہیں ہونا چاہیدا انسان نکام اودوں ہوندا اے جدوں ہار من لیندا اے۔٭