آئی ایم ایف پروگرام پورا کراں گے:وزیراعظم شہباز شریف

قاہرہ( پنجابی میڈیا)وزیراعظم شہباز شریف نے آکھیا اے کہ عالمی مالیاتی ادارے (آئی ایم ایف) دے تعاون نوں قدر دی نگاہ نال ویکھدے ہاں،پروگرام نوں پورا کراں گے،سیلاب دی صورتحال دے پاکستان دی معاشی بحالی دی رفتاراُتے منفی اثرات مرتب ہوئے نیں۔وزیراعظم شہباز شریف نے عالمی مالیاتی ادارے (آئی ایم ایف)دی منیجنگ ڈائریکٹر (ایم ڈی)کرسٹالینا جورجیوا نال ملاقات کیتی،ملاقات موسمیاتی تبدیلیاں دے اثرات نال نمٹن لئی منعقدہ کاپ27سربراہی اجلاس دے موقع اُتے ہوئی۔ایس موقع اُتے شہباز شریف نے آکھیا کہ آئی ایم ایف پروگرام پورا کراں گے،آئی ایم ایف دے تعاون نوں قدر دی نگاہ نال ویکھدے ہاں،سیلاب متاثرین دی فوری مدد تے بحالی لئی بجٹ تخمیناں وچ تبدیلی لیائے نیں،کورونا، عالمی کساد بازاری توں بعد سیلاب دی صورتحال دے پاکستان دی معاشی بحالی دی رفتاراُتے منفی اثرات مرتب ہوئے نیں۔وزیراعظم دا کہنا سی کہ عوام دی جان بچانا تے متاثرین سیلاب دی بحالی پہلی ترجیح اے، اُمید اے کہ کاپ27کانفرنس موسمیاتی انصاف دلان وچ سنگ میل ثابت ہوئے گی۔وزیراعظم دے کلائمیٹ امپلی منٹیشن سمٹ دے موقع اُتے وزیراعظم محمد شہباز شریف نال یورپی یونین کمشنر ارسلا وون ڈیر لین نے ملاقات کیتی۔وزیراعظم نے یورپی یونین ملکاں دی پاکستان وچ سیلاب متاثرین دی امداد دے جذبے نوں سراہیا ۔وزیراعظم نے آکھیا کہ پاکستان تے یورپی یونین سانجھے مقصد لئی اہم شراکت دار نیں، موسمیاتی تبدیلیاں دے اثرات دا مقابلہ کرن لئی عالمی اتحاد ضروری اے، ترقی پذیر ملکں اج جناں اثرات دا مقابلہ کر رہے نیں،کل ساری دُنیا نوں ایس دا خمیازہ بُھگتنا پئے گا۔وزیر اعظم نے فیٹف دی گرے لسٹ توں پاکستان دا نام نکلن وچ یورپی ملکاں دے تعاون نوں سراہندیان ہویاں آکھیا کہ یورپی یونین تے پاکستان وچ دوطرفہ تجارت ودھان دی بوہت گنجائش موجود اے۔یورپی یونین دی کمشنر نے محولیاتی تبدیلیاں نال نمٹن لئی متحدہ کوششاں اُتے اتفاق کیتا۔