توشہ خانہ توں شوشہ خانہ تک

اسیں چھوٹے ہوندے کرکٹ کھیڈدے سی۔ اسیں جدوں کوئی ٹورنامنٹ کھیڈدے تے خوش قسمتی یاں غلام مصطفی صادق موجودہ ایڈووکیٹ یاں ماسٹر فاروق اسلم دی ذہانت نال جت جاندے تے جتیا ہویا کپ جھگڑے دا کارن بن جاندا۔ جھگڑا کپ نوں گھر لے جان دا ہوندا سی جو کھڈاری چنگا کھیڈدا سی اوہدا موقف ہوندا کہ اوہ چنگا کھیڈیا اے تے کپ جتن دا کارن بنیا اے ایس لئی کپ تے اوہدا حق اے۔ کپتان کہندا کہ اوہ ٹیم دا کپتان اے کپ تے اوہدا حق اے۔ ایس جھگڑے وچ اشفاق بوکا’ جاویدبھیڑ’ عباس کمبوہ’ مصطفی صادق تے راقم اگے اگے ہوندے سن تے کپ نوں توشہ خانہ چوں کڈھ کے اپنی بیٹھک وچ نال لے جا سکن۔ ہن رہیا مسئلہ توشہ خانے دا… انج ایہ لفظ مرزا غالب دے استعمال دے بعد پہلی واری میری بصارت چوں گزریا اے تے سماعتاں وچ سماع خراشی دا کارن بنیا۔ دوستو آئو میں تہانوں توشہ خانے دی کہانی اپنی زبانی سنانا واں۔
1997ء وچ جناب نوازشریف اوس ویلے دے وزیراعظم نے ترکمانستانی حکومت دا دتا ہویا قارلین صرف 50 روپیے دے کے اپنے گھر لے گئے سن تے اپنے ڈرائنگ روم دی زینت بنا لیا سی۔ اوہدے بعد جناب قطر دے ولی عہد دا دتا ہویا بریف کیس صرف 875 روپیے دے کے اپنے گھر لے گئے یعنی اپنے استعمال وچ لیاندے رہے۔ فیر 1999ء وچ اوسے ورھے جس ورھے پرویزمشرف نے اوہناں دی حکومت تے شب خون ماریا سی سعودی عرب توں ملن والی 45 لکھ دی مرسڈیز میاں صاحب چھ لکھ وچ لے گئے سن ۔ایہدے بعد سعودی حکومت دی دتی رائفل جہڑی اک لکھ توں اُتے دی سی میاں صاحب 14 ہزار وچ گھر لے گئے۔ ابوظہبی دے حکمران ولوں نوازشریف’ مریم نواز’ بیگم کلثوم نواز مرحومہ نوں تن گھڑیاں تحفے وچ دتیاں گئیاں دو گھڑیاں توشہ خانہ وچ جمع کرا دتیاں۔ اک گھڑی مریم نواز نے 45 ہزار وچ کڈھوا لئی ایس گھڑی دی قیمت 1999ء وچ دس لکھ توں اُتے سی۔ ایہدے بعد شوکت عزیز اوہو شوکت عزیز جہنوں امپورٹ کرکے وزیراعظم لایا گیا سی تے لال مسجد دی شہادت وچ اگے اگے سن۔ 26 کروڑ دے تحفیاں دی قیمت ست کروڑ لوا کے ڈھائی کروڑ وچ گھر لے گئے ایہدے بعد یوسف رضا گیلانی اوہو یوسف رضا گیلانی جہنے ساڑھے تن ورھے دی وزیراعظم شپ وچ قومی خزانے چوں ہر روز ساڑھے پنج لکھ دا سوٹ پایا تے سوٹ اک واری پایا اوہدی بعد فیر اوہدی واری نہیں آئی اوہناں 2011 وچ سعودی حکومت توں ملن والے 20 لکھ توں اُتے دے تحفے گھڑی’ پن’ خنجر تے کف لنک صرف دو لکھ 83 ہزار وچ گھر لے گئے جد کہ گیلانی صاحب دی بیوی 30 لکھ دا جیولری سیٹ تن لکھ وچ گھر لے گئیاں۔
تسیں ایہ نہ سمجھنا کہ ایس کھیڈ وچ زرداری صاحب پچھے رہے نیں۔ ایہ کیویں ممکن ہو سکدا اے؟۔ 2009ء وچ آصف علی زرداری نوں معمرقذافی نے تن کروڑ دی گڈی گفٹ کیتی زرداری صاحب 40 لکھ روپیے وچ لے اڑے سگوں گڈی زرداری صاحب نوں لے کے اڑ گئی۔ 2009ء وچ یو اے ای دے حکمران نے زرداری صاحب نوں 12 کروڑ دی لگژری گڈی گفٹ کیتی اوس گڈی نوں ویکھ کے زرداری صاحب کیویں پچھے رہ سکدے سن؟ فیر اوہو ہویا جہدا ڈر سی… زرداری صاحب اوہ مہنگی ترین گڈی اک کروڑ 60 لکھ وچ لے گئے۔ ایہدے بعد پرویزمشرف چار کروڑ دے تحفے 55 لکھ وچ گھر لے گئے۔ ایہناں تحفیاں وچ دو پستول وی سن جو امریکی وزیر دفاع رمیزفلیڈ نے مشرف نوں گفٹ کیتے سن۔ مشرف صاحب اوہ پستول 19 ہزار وچ لے اڑے۔ ایہدے وچ اک پستول امیرمقام نوں گفٹ کیتا سی اوہناں دا فرمان اے کہ گھڑی نوں اثاثیاں وچ ظاہر نہیں کیتا۔ بقول یارغار ذوالفقارعلی صادق ایڈیشنل کمشنر ایف بی آر جو چیز ایف بی آر دے مالی ورھے دے آخری دن 30 جون توں پہلاں تسیں ویچ دیو گے اوہ چیز اثاثیاں وچ ظاہر نہیں کردے۔ اوس چیز نوں ویچن نال حاصل ہون والی رقم یاں اوہدے تے ہن والا پرافٹ شو کیتا جاندا اے۔ عمران خان نے گھڑی ویچ کے اوہدی قیمت پنج کروڑ روپیے جو اوس گھڑی نوں ویچن توں حاصل ہوئی اوہ رقم اپنے اثاثیاں وچ ظاہر کیتی اے کیوں جے گھڑی ویچ دتی۔ جدوں گھڑی ملکیت ای نہ رہی تے اوہ کیہ ظاہر کرے گا۔
الیکشن کمیشن کہندا اے کہ جو گھڑی ویچ دتی تے تہاڈی ملکیت ای نہیں سی اوس گھڑی نوں شو کیوں نہیں کیتا جد کہ عمران اوہدے حصے دے پیسے شو کر چکیا سی تے اوہناں پیسیاں نال اوہ اک سڑک وی تعمیر کر چکیا اے ایس لئی ن لیگ والے اپنے کاں نوں چٹا نہ کرن سگوں کالا ای رہن دین اوہناں دی انج دیاں حرکتاں نال عمران دی مقبولیت وچ وادھا ہو رہیا اے۔ میں پچھلے 45 ورھے توں کوئی اجیہا حکمران نہیں ویکھیا جہنوں اینی مقبولیت ملی ہووے جنی عمران خان نوں ملی ہووے۔ ن لیگ دی حالت بالکل اوس لطیفے نال مشابہت رکھدی اے۔
اک انگریز نوں بچپن توں ای ایہ ڈر سی کہ جدوں اوہ سوندا اے تے اوہدے بیڈ دے تھلے کوئی ہوندا اے پر وڈا ہون دے بعد اوہدا ایہ ڈر دور نہ ہویا۔ بڑی سوچ وچار دے بعد اوہ اک ماہر نفسیات دے کول گیا تے اوہنوں اپنا مسئلہ دسیا کہ کوئی حل دسو نہیں تے میں ایس ڈر نال پاگل ہو جاواں گا۔ ماہر نفسیات نے اوہنوں کہیا کہ میرے توں علاج کرا لوو۔ اک ورھے وچ تیرا ایہ مسئلہ گارنٹی دے نال حل ہو جاوے گا۔ بس ہفتے وچ تن دن تینوں آنا ہووے گا میرے کول۔ انگریز نے پچھیا تے تہاڈی فیس کنی ہووے گی 200 ڈالر فی وزٹ’ ماہر نفسیات نے دسیا۔ چلو میں سوچ کے دسنا واں’ انگریز بولیا فیر کوئی اک ورھے بعد اوس گورے تے ماہر نفسیات دی کسے فنکشن تے ملاقات ہوئی تے ماہر نفسیات نے پچھیا کہ تسیں نہیں میرے کول… گورے نے جواب دتا کہ میرا اوہ مسئلہ میرے اک پاکستانی دوست نے صرف اک بریانی دی پلیٹ تے اک بوتل تے دور کرا دتا تے تہاڈی فیس دے پیسے بچا کے میں گڈی وی خرید لئی اے۔ ماہر نفسیات نے بڑی حیرانی نال پچھیا: بھئی اوہنے کیہ علاج دسیا مینوں وی پلیز دس۔ گورا: پاکستانی دوست نے مشورہ دتا کہ بیڈ ویچ دیو تے فرش تے گدا پا کے سُتا کرو۔
بس مسلم لیگ ن تے دوجیاں جماعتاں نوں عمرن خان دی مقبولیت دا ڈر اے تے ڈر اوہناں نوں آئے دن پاگل تے ڈپریشن دا شکار کر رہیا اے۔ ایہ ساریاں جماعتاں خان نوں سیاست چوں باہر کڈھن لئی نت نویں حربے ازماندیاں نیں تے شوشے چھڈدیاں نیں۔ توشہ خانہ دی کہانی وی اک شوشہ اے۔ ہن ایہناں جماعتاں نوں چاہیدا اے کہ اوہ الیکشن کرا دین تے گدا پا کے سو جان تاں جے اوہناں نوں سیاسی منجی تے سوندے ہوئے ڈر نہ لگے۔٭