جیون کھیڈ
خالد حسین تھتھال
جیون کھیڈدا بڑا کھلار ہوندا اے
تے کھلار وی ایس دا ڈھیر ہوندا اے
موج میلا سجن بیلی
سکھی سہیلی سنگی ساتھی
رُولے سمے دی پھُوہر پھوہار دے نال
ایہدے اُپر بُور تے پھل پھُل لگدے رہندے
دوڑاں بھیڑاں سُکھ تے سوڑاں
رنگ سواد ، مٹھاس ، کُڑتّن
خوشیاں غمیاں ، کلپن پھڑکن
امتحان سوال بُجھارتاں
نفعے نقصان تے لابھ لبھت
سدھراں دے پُرے
چِنتیاں دیاں انھیریاں
تے اس کھیڈ کھلارے دے وچ
جِتاں وی نیں ہاراں وی نیں
جیون دے اس پِڑ دا گھیرا
موکلا ہوندا رہندا اے
وس کلاوا زور تران
ویلے دے سنگ
سُنگڑدا رہندا اے
ساہواں دی ڈوری د ا لام
کسے گھڑی تے مُک جاندا اے
منُکھ اس کھیڈ وچ پُک جاند ا اے
تے فیر پِڑ وچوں باہر ہو جاندا اے
