کساناں لئی وزیر اعظم دا تریخی پیکج

وزیراعظم شہباز شریف نے پاکستان دی معاشی ترقی لئی زرعی ترقی تے کساناں دی بہبود نوں ناگزیر قرار دیندے ہوئے کساناں لئی 1800 ارب روپے توں ودھ مالیت دے تریخی قومی زرعی پیکیج دا اعلان کر دتا اے جہدے تحت پنج سال تک استعمال شدہ ٹریکٹر درآمد کیتے جا سکن گے’ تن لکھ ٹیوب ویلز نوں سولر اتے منتقل کرن لئی بلا سود قرضے فراہم کراں گے۔ کساناں لئی 13روپے فی یونٹ فکسڈ قیمت اتے بجلی فراہم کیتی جاوے گی۔ وزیراعظم آفس وچ وفاقی وزرا اسحاق ڈار’ طارق بشیر چیمہ’ رانا ثنااللہ’ مریم اورنگزیب دے نال پریس کانفرنس
نال خطاب کردے ہوئے وزیراعظم نے آکھیا کہ سیلاب توں40لکھ ایکڑ اتے کھڑی فصلاں تباہ ہوئیاں۔وفاق نے 70ارب روپے بے نظیر انکم سپورٹ پروگرام تے 18ارب روپے این ڈی ایم اے دے ذریعے تقیسم کیتے نیں۔ کساناں نوں 1800ارب روپے دے قرض دتے جان گے جہڑے پچھلے سال دے مقابلے وچ 400 ارب روپے بوہتے نیں۔ چھوٹے کاشتکاراں دے قرض وچ
ریلیف لئی 10ارب 60کروڑ روپے مختص کیتے گئے نیں۔ متاثرہ علاقیاں وچ چھوٹے صوبیاں نوں صوبائی حکومت دے نال رَل کے 8ارب 60کروڑ روپے مہیا کیتے جان گے۔ دیہی علاقیاں وچ بے روزگار نوجواناں نوں قرض پروگرام وچ شامل کیتا گیا اے ایہدے لئی 50ارب روپے مختص کیتے گئے نیں۔ ایہدے تے 6ارب 21کروڑ روپے دی سبسڈی دتی جاوے گی۔ اوہناں نے آکھیا کہ ڈی اے پی دا زرعی پیداوار ودھان وچ کلیدی کردار اے۔ اسیں باہروں مہنگی گیس خرید کے فرٹیلائزر کمپنیاں نوں سستے مل مہیا کرنے آں۔ ایہدے تے اسیں گل بات مگروں 2500 روپے فی بوری قیمت گھٹ کرائی اے۔ ایہدے توں کاشت کاراں نوں 58 ارب روپے دا فیدہ ہووے گا۔ ہن 11ہزار 250 روپے فی بوری دستیاب ہووے گی جہڑی 14ہزار روپے دے کول کول سی۔ وزیراعظم نے آکھیا کہ سیلاب توں متاثرہ علاقیاں لئی سرٹیفائیڈ بیج دے 12لکھ تھیلیاں دی فراہمی لئی 13ارب روپے مختص کیتے گئے نیں۔ ایہدے وچ وفاق تے صوبے 50,50فیصد حصہ پان گے۔ سیلاب زدہ علاقیاںدے بے زمین ہارایاں لئی بلاسود5 ارب روپے قرض سبسڈی دتی جاوے گی۔ پی آئی یو 4ہزار توں ودھا کے 10ہزار تک کردتا اے جہدی بنیاد تے ہن کاشت کار بوہتا قرض لے سکن گے۔ ایس ایم ایز معیشت وچ ریڑھ دی ہڈی ہوندے نیں۔ا وہناں لئی بینک قرض فراہم نہیں کردے سن’ وزیر خزانہ بینکاں نوں آکھن کہ اوہ اوہناں نوں قرض فراہم کرن۔ اوہناں نوں ایس حوالے توں پابند کیتا جاوے کہ اوہ ایس ایم ایز نوں قرض دین۔ بینک حکومتی بانڈاں اتے منافع لے کے اپنی آمدن لئی آسانیاں تلاش کردے نیں۔ اوہناں لئی 10ارب روپے دی سبسڈی دتی جا رہی ہے۔ تن لکھ ٹیوب ویلاں نوں سولر اتے منتقل کرن لئی بلاسود قرضے دین گے۔ حکومت نے مجبور ہو کے ایہہ فیصلہ کیتا اے کہ پنج سال تک استعمال شدہ ٹریکٹر درآمد کرن دی اجازت دتی جا رہی اے۔تن لکھ ٹیوب ویلاں اتے منتقل کرن لئی بلاسود قرضے دیاں گے۔ حکومت نے مجبور ہو کے ایہہ فیصلہ کیتا اے کہ پنج سال تک استعمال شدہ ٹریکٹر درآمد کرن دی اجازت دتی جا رہی اے۔ ایہدے تے اوہناں نوں50فیصد ڈیوٹی وچ چھوٹ دتی جاوے گی تاں جے زرعی شعبہ اگے ودھے۔ وزیراعظم نے دسیا کہ پنج لکھ ٹن یوریا درآمد کیتی جا رہی اے جہدے وچوں 2لکھ ٹن آ چکی اے۔ وزیر صنعت نے اوہدی قیمت وچ نمایاں کمی کرائی۔ گندم تے چینی دی درآمد تے برآمد دے حوالے نال پچھلی حکومت دا موجودہ حکومت نال موازنہ کر لیتا جاوے۔ تن لکھ ٹن ہور یوریا دی درآمد دا انتظام کیتا جا رہیا اے۔ پاکستان دی معیشت نوںمضبوط بنان لئی یوریا دی مد وچ 30ارب روپے سبسڈی مختص کیتی گئی اے تاں جے کاشتکار نوں سستی یوریا مل سکے۔ وزیراعظم نے کہیا کہ ٹریکٹر سازی وچ نویں انٹر پرینیور دا خیر مقدم کراں گے۔ اوہناں نوں بیرون ملک توں پرزیاں دی درآمد اتے ڈیوٹی وچ 35فیصد نال چھوٹ دے کے 15فیصد کراں گے۔ اوہناں نوں مراعات دیاں گے تاں جے اوہناں دی حوصلہ افزائی ہووے تے اوہ ایتھے سرمایہ کاری کرن۔ 40ورھیاں وچ ایس شعبہ توں ارباں روپے کمائے گئے۔ ایہہ طے سی کہ مرحلہ وار ٹریکٹر اندرون ملک مکمل طور تے تیار کیتے جان گے تاہم اج تک سو فیصد مقامی سطح اتے ٹریکٹر تیار نہیں ہو رہے۔ ٹریکٹر دے تیار کنندگان لئی ضروری سی کہ اوہ مقامی سطح تے آلات دی تیاری لئی اقدامات کرن’ 40سال وچ 90فیصد تک ٹریکٹر دے پرزے مقامی سطح تے تیار ہو رہے نیں۔ وزیراعظم نے آکھیا کہ پچھلے دور حکومت وچ کھاد بلیک وچ فروخت ہون نال مل نہیں رہی سی ایس لئی مجبوراً باہروں منگوانی پئی۔ اسیں 26 لکھ ٹن گندم درآمد کرن دا فیصلہ کیتا جہدے وچوں 10لکھ آ چکی اے۔سب توں گھٹ بولی دین والیاں کولوں وی قیمت کرائی گئی۔ گندم دی ملک وچ کمی نہیں ہووے گی’ صوبے جدوں چاہن گے اوہناں نوں گندم فراہم کراں گے۔ اسیں ڈالر بچان لئی نجی شعبہ نوں گندم درآمد کرن دی اجازت نہیں دتی کیوں جے جدوں اجتماعی کاوش ہو رہی اے تے اوہدے تے ڈالر باہر جان توں بچ رہیا اے۔ جے گندم تے اجناس باہروں درآمد کراں گے تے اوہدے اتے کروڑاں ڈالر باہر جان گے تے اسیں اوہدے متحمل نہیں ہو سکدے۔ حکومت نے ساری مشکلاں دے باوجود پیکیج دتا اے۔ سولر لان مگروں بجلی دا بل دین دے بجائے کاشتکار قرض دی قسط فراہم کرے گا۔ ایہہ کاشتکار لئی بہت وڈا ریلیف تے مخلوط حکومت دا وڈا فیصلہ اے۔ وزیراعظم نے آکھیا کہ کاشتکار کولوں بجلی دی 13روپے فی یونٹ فکسڈ قیمت لواں گے۔ اوہدے اتے 43ارب روپے دی سبسڈی دتی جاوے گی۔ ایس تریخی پیکیج اتے ساری اتحادی جماعتاں دے قائدین نوں مبارکباد پیش کرنا واں۔ ایس تریخی پیکیج اتے حرف بحرف عملدرآمد یقینی بنایا جاوے گا۔ ایس طرحاں 4توں 6مہینے وچ زرعی معیشت توانا ہون نال قومی معیشت وچ جان پووے گی۔ پاکستان دی برآمدات وچ وادھا ہووے گا۔ وزیراعظم نے کہیا کہ مافیا تے کارٹیل نوں توڑنا خالصتاً صوبائی معاملہ اے۔ پنجاب وچ جدوں میری حکومت سی تے آٹے دی قیمت وچ معمولی وادھے تے حکومت تے انتظامیہ حرکت وچ آندی سی۔ صوبائی حکومتاں پرائس کنٹرول کمیٹیاں نوں فعال کرن تے بے جا منافع دا سدباب کرن۔ ایہہ خالصتاً صوبائی معاملہ اے۔ وزیراعظم نے اک ہور سوال دے جواب وچ آکھیا کہ پاکستان تے بیرونی دنیا توں سرمایہ کاراں لئی پاکستان وچ ٹریکٹر دی پیداوار لئی سرمایہ کاری دی کھلی پیشکش اے۔ صوبیاں نوں توسیعی زراعت دے پروگرام نوں بحال کرنا چاہیدا اے۔ اوہناں نے آکھیا کہ گھٹ قیمت اتے گندم دی درآمد دا بنیادی مقصد عام بندے نوں ریلیف دینا اے۔ اسیں جہڑی گندم پہلے خریدی اوہ 500ڈالر دے حساب نال سی جد کہ ہن اوہدی قیمت وچ ہور کمی ہوئی اے تے اوہدی قیمت 370ڈالر اتے آ چکی اے۔ تیل دی درآمد اتے ساڈے ارباں ڈالر صرف ہوندے نیں۔ ایہدے توں بچن لئی مقامی سطح اتے زرعی پیداوار ودھان دی لوڑ اے۔