سیاست توں ہٹ کے دلچسپ گلاں

عمر گزری ہے دربدر اپنی
ہم ہلے تھے ذرا ٹھکانے سے
ہم زمانے سے خود ہی ٹکرائے
کچھ گلہ بھی نہیں زمانے سے
اوہی جو کہیا گیا اے کہ اکثر ہتھاں نال دتی گنڈھ دنداں نال کھولنی پیندی اے تے ایس کوشش وچ اکثر اوقات اک دند وی نکل جاندا اے۔ میں تے بس کجھ دلچسپ گلاں کرنیاں نیں کہ عقدہ کشائی اکثر اوقات کوئی ہور رخ اختیار کر لیندی اے اجہے وچ غالب دا اک بڑا ودھیاتے بلیغ شعر یادآ گیا:
دل ہوا کشمکش چارہ زحمت میں تمام
مٹ گیا گھسنے اس عقدہ کا وا ہو جانا
کیسی کمال دی گل اے کہ اوہ گنڈھ ای غایب ہو گئی ایس لئی ہن کیہ کھولاں گے۔ کوشش وچ اصل مقصد ای فوت ہو گیا شعر وچ کیسیاں نزاکتاں ہوندیاں نیں چلو ایس غزل دا اک ہور شعر اے جہدے وچ دوری شعر وچ دکھا دتی گئی اے انج جیویں کوئی تصویر چوں آواز اٹھائے یاں آواز توں تصویر بنا دیوے ۔
تجھ سے قسمت میں مری صورت قفل ابجد
تھا لکھا بات کے بنتے ہی جدا ہو جانا
نمبراں والے جندرے تے تسیں ویکھے ای ہون گے کہ نمبر ملان نال جندرا کھل جاندا اے۔ اودوں ہندسیاں تے حروف والے جندرے سن ینی ابجد ملا کے کھولے جاندے سن۔ جیویں جدوں کم بنن تے آندا تے جندرے وانگوں دوویں وکھ ہو گئے جیویں بند جندرا کٹک کر کے کھلدا اے۔ دوجے مصرعے دے اخیر توں یعنی جدا ہون توں تسیں بس لطف اٹھائو کہ ایہ کوئی سیاسی گل نہیں کہ تسیں ایہنوں کسے ہجر یاں وچھوڑے دی گل سمجھ لوو سگوں پہلے تے ایہ اک پیج تے سن فیر پیج کیویں بدل گیا وغیرہ وغیرہ دل کردا اے کہ سیاست نوں اک پاسے رکھ کے کجھ ہور دلچسپ گلاں کیتیاں جان۔ میں ہنے ہنے اک مذہبی مقرر نوں سن رہیا سی تے خوب لطف اٹھا رہیا سی۔ پہلی واری میں کسے عربی دیاں گرداناں دہرا کے لوکاں توں ڈھیر داد لیندے ویکھیا ایہ عربی توں ناواقفیت دا نتیجہ اے انج ای جیویں کوئی اپنی انگریزی وکھان لئی بچپن وچ رٹیا ہویا مائی بیسٹ فرینڈ مضمون سنا دیوے۔ میں اوہ ویڈیو شیئر وی کیتی تے لوکاں نے دلچسپ کمنٹس وی کیتے آپ ای سوچو ضرب بضروب ضارب تے لاتضرب نوں تسیں رٹ کے سامعین دے سامنے اک ساہ وچ پڑھ دیو فیر ایہ کسے وی لفظ تے بناندے جان جیویں کسب یکسب وغیرہ جو عربی دی شدبد رکھدے نیں اوہ خوب لطف اندوز ہون گے۔ اک زبان توں ناواقف تے اوہنوں عربی سمجھ کے خوب داد دیوے گا کہ پتہ نہیں مولانا کہڑا فلسفہ بیان کر رہے نیں۔
مقرر دا کمال ایہ ہونا چاہیدا اے کہ فل سٹاپ نہ آوے بے تکان بولدا جاوے۔ انج تسیں پانی دا بلبلہ تے سنیا ہووے گا اہنے وی ہر خبر نوں اوہدے نال ملا دتا۔ یکسانیت نوں فن بنانا وی کمال اے۔ لوو جی اک ہور خبر نظر نواز ہو گئی کہ سکھر وچ اک ڈاکٹر نے غلطی نال ٹھیک لت دا اپریشن کرکے راڈ پا دتا مریض ہوش وچ آیا تے چیکاں مارن لگ پیا کہ متاثرہ لت تے چھیڑی ای نہیں گئی ایہ وی چنگی گل کہ ڈاکٹر نے غلطی دا اعتراف کردے ہوئے دوجی لت دا وی اپریشن کر دتا نال ای ادارے نے متاثرہ لوکاں نوں احتجاج توں روکدے ہوئے وعدہ کیتا کہ اوہ مریض نوں دو مہینے وچ چلن دے قابل بنا دین گے۔ پر ایہ پتہ نہیں لگ سکیا کہ اوہ مریض نوں بیساکھیاں تے چلان گے یاں اپنیاں لتاں تے’ بالکل انجدا ای واقعہ ساڈے اک دندان ساز صدیق صاحب دے نال وی پیش آیا کہ اوہ مریض نوں سن کرن دا ٹیکا لا کے جمور چک کے آئے تے اوہ مریض اٹھ کے تھُک سٹن گیا تے اوہدی تھاں کوئی ہور مریض آن بیٹھا۔ ڈاکٹر صاحب انج وی موٹے شیشیاں والی عینک لاندے نیں۔ جاندے ای اوہدا منہ کھولیا تے کہیا کہ ہتھ رکھو آن والے نے نشاندہی کیتی کہ ایہ دند درد کردا اے ڈاکٹر صاحب نے جمور پایا تے دند کڈھ دتا اوہ بندہ چیکاں ماردا رہ گیا ایہ حادثات واقعات نیں۔
ایس واقعے توں اک ہور بڑا دلچسپ واقعہ یاد آگیا کہ جہڑے دناں اسیں سار ا دن پی ٹی وی تے نغمے تے پروگرامز لکھدے سی ساڈے اک پروڈیوسر نوں لانگ لیگ کہیا جاندا سی پتہ کرن تے سانوں ذوالفقار فرخ صاحب نے دسیا کہ اوہ بڑے لائق فائق پروڈیوسر سن پر کجھ ورھے پہلاں اک حادثے وچ اوہناں دے دماغ تے چوٹ لگی تے زخم آ گیا علاج کرانا پیا بس کیہ سی کہ اوہناں دے دماغ نوں لت دا کجھ حصہ لانا پیا تے دماغ دا لت نوں اودوں توں ای کدی کدی دماغ وچ لت دی تاثیر آ جاندی اے تے کدی کدی اوہ لت توں دماغ دا کم لیندے نیں۔ سوچدے سوچدے کدی لت جنبش کردی اے تے کدی منصوبہ بندی وچ اوہ لت پھسان لگدے نیں۔ ایہ گل سن کے اوہ پرروڈیوسر زیرلب مسکراندے رہے تے گل دی تردید نہیں کیتی ۔
تسیں میرے کالم نوں اوٹ پٹانگ سمجھدے رہو کہ میں لکھیا ای انج اے کہ لانگ مارچ تے کیہ لکھدا کہ اوہ اک تھاں رکے تے کجھ لکھاں گے جدوں تک کوئی گل سامنے نہیں آندی اسیں وی ایدھر اودھر دیاں گلاں کردے رہواں گے۔ بہرحال نوجوان نکلے ہوئے نیں لطف اٹھا رہے نیں بڑے عرصے دے بعد اوہناں نوں کوئی شغل ملیا اے کہ نوکری تے ملدی نہیں اوہ خان صاحب نال محبت کردے نیں تے اوہناں پچھدے کہ نوکریاں دا کیہ بنیا۔ محبت انج دی ای ہوندی اے۔ اوہی جو کسے نے پچھیا سی کہ آئو چلیے پچھیا گیا کہ کتھے؟ گل کرن والے نے کہیا لعنت اے ایس پچھن تے کہ کتھے جتھے رابطے ہوندے نیں۔ اک شعر:
بات کرتا رہا میں اس سے مگر
بات بنتی نہیں بنانے سے