جس زبان وچ خواب ہی نہیں ویکھ سکدے : اوس زبان اُتے عبورکِنج ہوئے گا،خلیل الرحمن قمر

لہور(راجہ ناصرتوں) معاشرے دے سُلگدے مسائل اُتے لکھن والے ملک دے نامور ڈرامہ نگار خلیل الرحمن قمر حیدرآبادوچ میڈیا نال گل بات کر دیاں آکھیا کہ اسیں جَد تک امیر، جاگیرداراں، وڈیریاں توں آزادی نہیں کرلیندے تَد تک ذہنی غلام رہواں گے،دنیا وچ کوئی اینج دا ملک نہیں جس نے اپنی قومی زبان نوں چھڈکے ترقی حاصلِ کیتی ہوئے ،اپنی قومی زبان نہ بولن پاروں اسیں اج تک، سندھی، پٹھان، بلوچ، تے پنجابی بنے ہوئے ہاں، کاش!اسیں ایہ گل سمجھ لیندے تے ساڈے آپس وچ اینج دے تعلقات ہندے جیہڑے اک کامیاب قوم دے ہُندے نیں،تے ایہ مستحکم تعلقات کَدی وی نہ ٹٹدے،ایہہ گلاں معروف ڈرامہ نگار خلیل الرحمن قمر نے حیدرآباد دے مقامی شادی ہال وچ پاکستان تحریک انصاف ولوں منعقدہ’’خرد کو غلامی سے آزاد کر‘دے موضوع اُتے کانفرنس وچ بحثیت اُچیچے پروہنے اپنے خطاب وچ کیتیاں،اوہناں نے سامعین توں سوال کیتا کہ کیا تُسی کَدی انگریزی زبان وچ خواب ویکھیا اے؟نہیں! جی ہاں،جس زبان وچ خواب وی نہیں ویکھ سکدے بھلا اوس زبان اُتے عبور کس طرح حاصل ہوئے گا، افسوس کہ ساڈے ملک وچ سارے دفتری معاملات انگریزی زبان وچ ہُندے نیں،میں ایس گل اُتے فخر کرداہاں کہ میں ٹھیک نال اردو بول سکدا ہاں،ٹی وی ڈرامہ سیریل، میرے پاس تم ہو توں شہرت حاصل کرن والے ڈرامہ نگار خلیل الرحمن قمر نے معاشرے دے سُلگدے مسائل دے موضوع نوں اپنی تحریر دا حصہ بنادیاں ہویاں کئی کامیاب ڈرامے دتے جناں وچ بوٹا فرام ٹوبہ ٹیک سنگھ، پیارے افضل، میرے پاس تم ہو تے ہور شامل نیں،اوہناں نے ہور آکھیا کہ میں جداں دا کریکٹر ہُندا اے اوس مناسبت نال ڈرامہ وچ نام، جگہ تے شہر دا تعین کردا ہاں، پیارا افضل اوس دی واضح مثال وی اے،میں جَد وی حیدرآبادتوں لنگداساں تے مڑ مڑ کے حیدرآباد نوں ضرور ویکھیا کردا ساں،تے’’ سوچدا ساں کہ حیدرآباد دا کجھ قرض مینوںاُتارنا اے،بعد وچ مینوں حیدرآباد توں بے انتہا محبت مصطفی ایوب پاروں ہوئی، ہر انسان مٹی دا بنا ہویا اے،اگراختلاف اے تے صرف و صرف نظریات تے قیادت دا اے،میںغربت نوں اپنیاں آکھاں نال ویکھیا اے،ایسی لئی سب نوں یاد رکھدا ہاں،اوہناں نے افسردہ لہجے وچ آکھیا کہ ارشد شریف دی شہادت توں بعد ایہ ہی اوہ خوف سی جیہڑا طاری کیتا گیا،دعا کرو کہ میں ڈر جان توں پہلاں مر جاواں، کیونکہ موت تے بہادراںاُتے ہی آندی اے، اگر مینوں زندہ چھڈ دتا گیا تے میں اوس توں وڈا خلیل الرحمن قمر بن جاواںگا۔