لانگ مارچ دوبارہ شروع: قوم چیف جسٹس وَل ویکھ رہی اے،عمران خان

وزیر آباد( پنجابی میڈیا)پاکستان تحریک انصاف دے چیئرمین تے سابق وزیراعظم عمران خان نے آکھیا اے کہ چیف جسٹس صاحب!تہانوں4چیزاں ویکھنیاں پین گیاں،ایف آئی آر، اعظم سواتی، ارشد شریف نال جو کجھ ہویا اوس اُتے انصاف ضروری اے، ارشد شریف دیاں جیہڑیاں تصویراں وکھائیاں اوہ کِنج ایہناں کول آیاں،مینوں سیاست چمکان دی لوڑ نہیں اے،ایہ ملک دا مسئلہ اے، قوم چیف جسٹس وَل ویکھ رہی اے۔تحریک انصاف نے اک ہفتے دے وقفے توں بعد جمعرات نوں احتجاجی لانگ مارچ دوبارہ شروع کر دتا گیا اے۔مختلف شہراں توں لوگ وزیر آباد پہنچنا شروع ہو گئے نیں۔لانگ مارچ نے ایسی مقام توںاسلام آباد لئی اپنے سفردا دوبارہ آغاز کیتا،جیتھے3نومبر نوںعمران خان دے کنٹینراُتے فائرنگ توں بعد ایس مارچ نوں معطل کردتا گیا سی۔وزیر آباد وچ پاکستان تحریک انصاف دے لانگ مارچ نال خطاب کردیاں ہویاں سابق وزیراعظم نے آکھیا کہ چوراں دا دین نال کوئی تعلق نہیں اوہناں نوں اپنی چوری بچان دی فکر ہُندی اے۔زندگی موت جس دے ہتھ وچ اے اوس نے مینوںبچالیا،شہباز گل توں بعد اعظم سواتی اُتے تشدد کیتا گیا اوس اُتے ایکشن نہیں لیا گیا، ملک وچ جو کجھ کیتا جا رہیا اے اوس اُتے دنیا وچ بدنامی ہوئی اے، اعظم سواتی نے دسیا کہ میری ویڈیو بنا کے بیوی نوں گھلی گئی،ویکھنا ہوئے گا ساڈے ملک دا نظام کَدوں تحفظ دیوے گا۔اپنی گل نوں جاری رکھدیاں ہویاں عمران خان دا کہنا سی کہ چیف جسٹس صاحب!تہانوں4چیزاں ویکھنیاں پین گیاں،ایف آئی آر، اعظم سواتی، ارشد شریف نال جو کجھ ہویا اوس اُتے انصاف ضروری اے، ارشد شریف دیاں جیہڑیاں تصویراں وکھائیاں اوہ کِنج ایہناں کول آیاں ارشد شریف دی والدہ پوسٹمارٹم رپورٹ منگ رہی اے مگر اوہناں نوں نہیں ملی، ہُن تے واضح ہو گیا اے کہ ارشد شریف نوں پلان کر کے تشدد کر کے ماریا گیا، غریب تے امیر ملکاں وچ فرق ایہ اے اوہناں دے ادارے مضبوط ہُندے نیں۔